އެނބޫދޫ ފަޅުގައި ހަދާ ހާޑްރޮކް ހޮޓެލް އަންނަ އަހަރު ހުޅުވަނީ

މާލެ އަތޮޅު އެނބޫދޫ ފަޅު ހިއްކައިގެން ތަރައްޤީކުރާ ސަރަހައްދުގައި ހަދާ 3 ރިޒޯޓްގެ ތެރެއިން އެއް ރިޒޯޓްކަމަށްވާ ހާޑްރޮކް ހޮޓެލް އަންނަ އަހަރުގެ އޮކްޓޯބަރު 1 ގައި ހުޅުވާނެކަމަށް އެކުންފުނިން ބުނެފިއެވެ.

އެމެރިކާގެ ހާޑްރޮކް އިންޓަނޭޝަނަލް އިން ބުނާ ގޮތުގައި އެނބޫދޫ ފިނޮޅުގައި ހަދާ ރިޒޯޓުގައި 178 ކޮޓަރި ހުންނާނެއެވެ. މި ރިޒޯޓާއެކު މަޝްހޫރު ހާޑްރޮކް ކެފޭގެ ރާއްޖޭގެ ފުރަތަމަ އައުޓްލެޓް އެނބޫދޫ ފަޅުގައި ހުޅުވާނެއެވެ. އެކުންފުނިން ބުނާ ގޮތުގައި މިރިޒޯޓުން 350 އާ ވަޒީފާ އުފެދިގެންދާނެއެވެ.

އެނބޫދޫ ފަޅު ތަރައްޤީކުރަމުންދަނީ ތައިލެންޑްގެ ސިންހާ އެސްޓޭޓް ކުންފުނިންނެވެ. ބޭރުގެ ބައެއް މީޑިއާތަކަށް މައުލޫމާތު ދެމުން ސިންހާ އެސްޓޭޓުން ރާއްޖޭގައި ހިންގާ އެނބޫދޫ ފަޅު ޕްރޮޖެކްޓްގެ ޗީފް އިންވެސްޓްމަންޓް އޮފިސަރ ތިޓީ ތޮންބެންޖަމަސް ވިދާޅުވީ ހާޑްރޮކް އިންޓަނޭޝަނަލްއަކީ އެނބޫދޫ ފަޅުގައި ތަރައްޤީކުރާ އިންޓަގްރޭޓެޑް ޑިވެލޮޕްމަންޓަށް އަންނަން އެންމެ ކަމުދާ އެއް ބްރޭންޑްކަމަށެވެ.

ހާޑްރޮކް ކުންފުނިން ބުނީ ހަނީމޫނަށް އަންނަ ފަތުރުވެރިންގެ މެދުގައި މަޤްބޫލު ދިވެހިރާއްޖެއަށް އެހެން ސެގްމަންޓްތަކުގެ ފަތުރުވެރިންނަށްވެސް ރަނގަޅު ފުރުސަތުތަކެއް އެބަހުރިކަމަށާއި، ހާޑްރޮކް ރިޒޯޓުން އެފުރުސަތު ލިބޭނެކަމަށެވެ.

ތީމް ކެފޭ އަދި ރެސްޓޯރަންޓުން ފެށި ހާޑްރޮކް ކުންފުނިން ދުނިޔޭގެ އެކި ކަންކޮޅުތަކުގައި ވިއްސަށްވުރެ ގިނަ ހޮޓެލް ހިންގާއިރު، 168 ކެފޭ އަދި 11 ކެސީނޯ ހިންގައެވެ.

އެކުންފުނީގެ ހޮޓެލްތަކާއި ކެފޭތަކަކީ މިއުޒިކްގެ ތީމްތަކަށް ޑިޒައިންކޮށްފައިވާ ތަންތަނެވެ. ރާއްޖޭގައި ހަދާ ހާޑް ރޮކް ރިޒޯޓާއި ކެފޭގައިވެސް މި ތީމް ބޭނުންކުރާނެއެވެ.