ޑިސެމްބަރު މަހު އައިލެންޑް އޭވިއޭޝަންގެ މުވައްޒަފުންނަށް 100 އިންސައްތަ މުސާރަ ލިބޭނެ
27 ޑިސެމްބަރު 2021 | ހޯމަ 07:14ޑިސެމްބަރު މަހު ކުންފުނީގެ މުވައްޒަފުންނަށް މުސާރަ ދޭނީ ކޮވިޑްގެ ކުރިން ދެމުން އައި ގޮތަށް
ކޮވިޑާ ގުޅުގެން އައިލެންޑް އޭވިއޭޝަން މުވައްޒަފުންގެ މުސާރަ ކުޑަކޮށްފައިވޭ
ޑިސެމްބަރު މަހު އައިލެންޑް އޭވިއޭޝަންގެ މުވައްޒަފުންނަށް 100 އިންސައްތަ މުސާރަ ލިބޭނެ ކަމަށް އެ ކުންފުނިން ބުނެފިއެވެ.
އެ ކުންފުނީ މެނޭޖންގ ޑިރެކްޓަރ މުހައްމަދު މިހާދު އަދި ޑެޕިއުޓީ މެނޭޖިންގ ޑިރެކްޓަރ އައިޝަތު ޖެނިފަރ ރާއްޖެއެމްވީއާ ވާހަކަދައްކަވަމުން ވިދާޅުވީ، ކޮވިޑާ ގުޅިގެން ކުންފުންޏަށް އާމްދަނީ ލިބުން ހުއްޓުމާ ގުޅިގެން މުވައްޒަފުންގެ މުސާރައިން އުނި ކުރި ބައި ދިނުމަށް މިހާރު މަސައްކަތް ކުރައްވާ ކަމަށެވެ. އެގޮތުން އެބައި ހަމަޖެއްސުމަށް ދެ ފަހަރެއްގެ މަތިން މިސައްކަތް ކޮށްފައިވާނެ ކަމަށާއި، ޑިސެމްބަރު މަހު ކުންފުނީގެ މުވައްޒަފުންނަށް މުސާރަ ދޭނީ ކޮވިޑްގެ ކުރިން ދެމުން އައި ގޮތަށް ކަމަށެވެ.
ކޮވިޑްގެ ސަބަބުން ކުންފުނިން ކުރަމުން އައި ދަތުރުތައް ހުއްޓި އާމްދަނީ ނުލިބި ގިނަ ދުވަސްތަކެއް ދިޔުމުން މުވައްޒަފުންގެ މުސާރައިން ބައެއް އުނި ކުރި ނަމަވެސް ގައުމީ ޚިދުމަތުގައި މުވައްޒަފުންކުރި މަސައްކަތް ފާހަގަ ކުރައްވާ ކަމަށް އެމްޑީ މިހާދު ވިދާޅުވިއެވެ. ކޮވިޑްގެ އެންމެ ޕީކް ދުވަސްވަރު ބަލި މީހުން އުފުލުމުގައި ރިސްކު ނަގައިގެން ކުންފުންފުނީގެ މުވައްޒަފުން ކުރި ބުރަ މަސައްކަތް މިހާދު ފާހަގަކުރެއްވިއެވެ.
މިހާދު ވިދާޅުވީ، މޯލްޑިވިއަން އަކީ ގައުމީ އެއަރލައިން ކަމަށްވާތީ، ހުރިހާ ކަމަކުން ފައިދާ ނުވިނަމަވެސް ގައުމީ ޚިދުމަތް ރައްޔިތުންނަށް ފޯރުކޮށްދޭން ޖެހޭ ކަމަށެވެ. ކޮވިޑްގެ ތެރޭގައި ސަރުކާރުން ކުރި ދަތުރުތައް ކުރީ ކުންފުންޏަށް ފައިދާ ވާގޮތަށް ނޫން ކަމަށާއި، އެކަމުން ކުންފުންޏަށް އާމްދަނީ ނުލިބޭ ކަމަށެވެ. ރާއްޖޭގެ ރަށްރަށަަށް ބޭސް ފޯރުކޮށްދިނުމާއި، ރާއްޖެއިން ބޭރުން ގެންނަން ބޭނުންވާ ތަކެތި ގެނައުމުގައި މޯލްޑިވިއަނުން ކުރީ ގައުމީ ޚިދުމަތެއް ކަމުގައި މިހާދު ފާހަގަކުރެއްވިއެވެ.
ޑީއެމްޑީ ޖެނިފަރ ވިދާޅުވީ، މިހާރުވެސް ކޮންމެ ދުވަހަކު އެވްރެޖްކޮށް ކޮންމެވެސް އެއް ސަރަހައްދަކުން މެޑިކަލް އިވެކުއޭޝަން އަންނަ ކަމަށެވެ. އަދި ރާއްޖޭގެ ޑޮމެސްޓިކް ހުރިހާ އެއަރޕޯޓަކަށް ދަތުރު ކުރުމަކީ ވެސް ކުންފުނީގެ ޒިންމާއެއް ކަމަށް ވިދާޅުވިއެވެ. ޖެނިފަރ ވިދާޅުވީ، 2020 އަދި 2021 އަކީ ކުންފުންޏަށް ބަނަ އަހަރު ތަކެއް ނަމަވެސް އަންނަ އަހަރު ފެންނަނީ ވަރަށް އުޖާލާކޮށް ކަމަށެވެ.
