ޖައިލަމްގެ މަރު: މިއަދުވެސް ޚުލާސާ ބަޔާން ކުރިއަކަށް ނުގެންދެވުނު
ޖައިލަމްގެ މަރުގެ މައްސަލައިގައި 4 މީހަކަށް ދައުލަތުން ދައުވާކުރޭ
ޖައިލަމްގެ މަރުގެ މައްސަލައިގައި ދައުވާ އުފުލާފައިވާ ފަރާތްތައް
ހ. ހަންޑްރެޑް ފްލާވާސް, ޖައިލަމް އަހުމަދު ޝާކިރުގެ މަރުގެ މައްސަލައިގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ޖައިލަމްގެ މަރުގެ މައްސަލައިގައި ތޫނު އެއްޗެއް ބޭނުން ކޮށްގެން ޤަސްތުގައި މީހަކު މެރުމުގެ ކުށުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ނަސީބު ސައީދު، އިސްމާއިލް އަނީޤު، އަލީ އިރުފާން އަދި މުޙައްމަދު ހުމައިދުއެވެ.
މި އަޑުއެހުމުގައި މައްސަލަ ބައްލަވާ ގާޒީ އިސްމާއިލް ޝަފީޤު ވަނީ ދައުލަތުން އެދިފައިވާ ގޮތަށް ޑޮކްޓަރުގެ ރިޕޯޓާއި ގުޅިގެން ޚަބީރެއްގެ ގޮތުން ހާޒިރު ކުރަން ބޭނުންވި ފަރާތް ހާޒިރު ނުކުރުމަށް ނިންމަވާފައެވެ. އެއީ ޖައިލަމްގެ މެޑިކޯ ލީގަލް ރިޕޯޓު ތައްޔާރު ކުރެއްވި ބިދޭސީ ޑޮކްޓަރުގެ ބަދަލުގައި ހާޒިރު ކުރަން އެދުނު، އެ ރިޕޯޓު ތަރުޖަމާ ކުރެއްވި ދިވެހި ޑޮކްޓަރެވެ.
ދެން މި މައްސަލައިގައި ކުރިއަށް ގެންގޮސްފައިވަނީ ޚުލާސާ ބަޔާން އިއްވުމެވެ. އެހެންނަަމަވެސް، މި އަޑުއެހުމުގައި އެއް ދިފާއީ ވަކީލު ކަމަށްވާ އަލީ ސައީދު ވަނީ ބައެއް ލިއެކިއުންތައް ލިބިފައިނުވާ ކަމުގެ ކަންބޮޑުވުން ފާޅު ކުރައްވާފައެވެ. އަދި ސިއްރު ކޮށްފައި ދޫކުރެވެން ހުރި ލިއެކިއުންތައް ދޫކޮށްދިނުމަށް ވަކީލު އެދިވަޑައިގެންނެވިއެވެ. އެގޮތުން ޚުލާސާ ބަޔާން ތައްޔާރު ކުރުމުގައި ކޮންމެހެން ބޭނުންވާ ލިއެކިއުންތައް ލިބިފައިނުވާކަމަށް ދިފާއީ ވަކީލު ވިދާޅުވުމާއި ގުޅިގެން ގާޒީ ވަނީ އެކަމަށް ރިއާޔަތް ކުރެއްވުމަށް ނިންމަވައި، އަޑުއެހުން ކުރިއަށް ނުގެންދިއުމަށް ނިންމަވާފައެވެ.
އެހެންނަމަވެސް، ދިފާއީ ވަކީލު އަލީ ޝާހު ވަނީ އެ ލިއެކިއުންތައް އެހާ މުހިއްމު ނޫންކަމަށް ވިދާޅުވެފައެވެ.
ގާޒީ އިސްމާއިލް ޝަފީއު ވަނީ ނުލިބި ހުރި ލިއެކިއުންތައް ފާހަގަ ކުރައްވައި ޝަރީއަތަށް އެކަން އެންގުމަށް އަމުރު ކުރައްވާފައެވެ. އަދި އެއަށްފަހު ޖެނުއަރީ މަހު އިތުރު އަޑުއެހުމެއް ބާއްވަވާނެ ކަމަށް މައްސަލަ ބައްލަވާ ގާޒީ ވިދާޅުވިއެވެ. އެގޮތުން ޖެނުއަރީ މަހުގެ 2 ވަނަ ހަފުތާ ތެރޭގައި އަޑުއެހުމެއް ބާއްވަވާނެ ކަމަށް ގާޒީ ވިދާޅުވިއެވެ.
