ރާއްޖެއިން ބޭރުން އަންނަ ހުރިހާ ފަރާތްތަކުން، 96 ގަޑިއިރުނުވާ ޕީސީއާރު ނެގެޓިވް ޓެސްޓެއް ގެންނަންޖެހޭނެ: އެޗްޕީއޭ
ވެކްސިން ފުރިހަމަވެފައިނުވާ ދިވެހިންނާއި ވޯރކްޕަރމިޓް ހޯލްޑަރުން ރާއްޖެ އެތެރެވުމަށްފަހު، 14 ދުވަހުގެ މުއްދަތަށް ކަރަންޓީނުވާންޖެހޭނެ
ވެލާނާ އިންޓަރނޭޝަނަލް އެއަރޕޯޓް
ރާއްޖެއިން ބޭރުން އަންނަ ހުރިހާ ފަރާތްތަކުން، ފަތުރުވެރިންވެސް ހިމެނޭގޮތަށް ރާއްޖެއަށް ދަތުރުފަށާ ބަދަރުން ފުރާއިރު 96 ގަޑިއިރުނުވާ ޕީ.ސީ.އާރު ނެގެޓިވް ނަތީޖާ ގެންނަންޖެހޭގޮތަށް ހެލްތު ޕްރޮޓެކްޝަން އެޖެންސީ(އެޗްޕީއޭ)ން ކަނޑައަޅައިފިއެވެ.
"އޮމިކްރޯން" ވޭރިއެންޓާ ގުޅިގެން އާންމު ރައްޔިތުންގެ ސިއްހަތާއި ރައްކައުތެރިކަމަށްޓަކައި، ޑިސެމްބަރ 27 ވަނަ ދުވަހުން ފެށިގެން ވަކިގޮތެއް އަންގަންދެން ފިޔަވަޅުތަކެއް އެޅުމަށް ނިންމާ އެކަން އެޗްޕީއޭއިން ވަނީ ހާމަކޮށްފައެވެ. އޭގެތެރޭގައި ރާއްޖެ އެތެރެވާ ހުރިހާ ފަރާތްތަކުން 96 ގަޑިއިރު ނުވާ ޕީސީއާރު ޓެސްޓެއް ގެންނަންޖެހޭއިރު މިގޮތަށް ދަތުރުކުރާ މީހުންނާއި އެކުގައި ދަތުރުކުރާ 1 އަހަރުން ދަށުގެ ތުއްތު ކުދިން ޕީ.ސީ.އާރު ޓެސްޓު ހެދުމުން އިސްތިސްނާ ވާނެކަމަށް އެޗްޕީއޭން ބުނެއެވެ.
މީގެއިތުރުން ފަތުރު ވެރިން ފިޔަވައި ރާއްޖެއިން ބޭރުން އަންނަ ހުރިހާ ފަރާތްތަކުން ރާއްޖެ އެތެރެވުމަށްފަހު، 3 ދުވަހާއި 5 ދުވަހުގެ ތެރޭގައި ޕީ.ސީ.އާރު ޓެސްޓް ހަދަންޖެހޭނެކަމަށް އެޗްޕީއޭއިން ބުނެއެވެ. އަދި ކޮވިޑު-19ގެ ވެކްސިން ފުރިހަމަވެފައިނުވާ، ދިވެހިންނާއި ވޯރކްޕަރމިޓް ހޯލްޑަރުން ރާއްޖެ އެތެރެވުމަށްފަހު، 14 ދުވަހުގެ މުއްދަތަށް ކަރަންޓީނުވާންޖެހޭ ގޮތަށް ވަނީ ކަނޑައަޅާފައެވެ. މީގެ ތެރޭގައި 12 އަހަރުން ދަށުގެ ކުދިން ނުހިމެނޭނެއެވެ. އަދި މިފަރާތްތައް ކަރަންޓީނުން ދޫކޮށްލެވޭނީ 14 ދުވަސް ހަމަވުމުން ކޮވިޑު-19 އަށް ޓެސްޓް ހަދައި ނަތީޖާ ނެގެޓިވް ވުމުން ކަމަށް އެޗްޕީއޭއިން ބުނެއެވެ.
ދުނިޔޭގައި މިހާރު ހަލުވިކަމާއެކު ފެތުރެމުން އަންނަ އޮމިކްރޯން ވޭރިއަންޓްގެ ހަތަރު ކޭހެއް ފެނިފައިވާކަމަށް އެޗްޕީއޭއިން ވަނީ ބުނެފައެވެ. މިއެންމެންނަކީވެސް ފަތުރުވެރިން ކަމަށް އެޗްޕީއޭއިން ވަނީ ބުނެފައެވެ. މިކަމާ ގުޅިގެން ރިސްކް އެސެސްމެންޓްތައް މިހާރު ހަދަމުން އަންނަކަމަށާއި އިތުރަށް އަޅަން ޖެހޭ ފިޔަވަޅުތަކާމެދު މިހާރު މަޝްވަރާ ކުރެވެމުން އަންނަ ކަމަށްވެސް އެޗްޕީއޭއިން ވަނީ ބުނެފައެވެ.
