އެއްބައިވަންތަކަމުގެ ނަމޫނާ ދިވެހިންގެ ހިތްތަކުގައި ވަނީ ބިންވަޅު ނެގިފައި: ރައީސް ސޯލިހު
26 ޑިސެމްބަރު 2021 | އާދީއްތަ 12:01ދިވެހިން ވަނީ އެކުވެރިކަން ދައްކުވައިދީފައި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ރާއްޖެއަށް ކުރިމަތިވި ސުނާމީ ކާރިސާއާ ގުޅިގެން ދެއްކި އެއްބައިވަންތަކަމުގެ ނަމޫނާ ދިވެހިންގެ ހިތްތަކުގައި ބިންވަޅު ނެގިފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެއްބައިވަންތަކަމުގެ ދުވަހުގެ ހެޔޮއެދުންތައް ރާއްޖޭގެ ރައްޔިތުންނަށް އަރިސްކޮށް ރައީސް ސޯލިހު ވިދާޅުވީ، ސުނާމީ ކާރިސާއާ ގުޅިގެން ދިވެހިން ދެއްކި އެކުވެރިކަމާއި އެއްބައިވަންތަކަމުގެ މަތިވެރި ގައުމީ ނަމޫނާ މިއަދުވެސް ހިތްތަކުގައި ބިންވަޅު ނެގިފައިވާ ކަމަށެވެ.
ކޮންމެ އަހަރެއްގެވެސް ޑިސެމްބަރު 26 ވަނަ ދުވަސް މީގެ 17 އަހަރު ކުރިން ފެށިގެން ރާއްޖޭގައި ފާހަގަ ކުރަމުން އަންނަނީ ގައުމީ އެއްބައިވަންތަކަމުގެ ދުވަހުގެ ގޮތުގައެވެ. މިގޮތުން އެންމެ ފުރަތަމަ މިދުވަސް ފާހަގަ ކުރެވުނީ ރައީސް މައުމޫނުގެ ދައުރުގައި 26 ޑިސެންބަރު 2005 ގައެވެ. ދުވަސް ނިސްބަތްވަނީ 26 ޑިސެންބަރު 2004ގައި ރާއްޖެއަށް ކުރިމަތިވި ގުދުރަތީ އެންމެބޮޑު ކާރިސާއަށެވެ. 2004 ވަނަ އަހަރު ހިނގައިދިޔަ ސުނާމީ ކާރިސާގައި ރާއްޖޭގެ ގިނަ ރަށްރަށަށް ވަނީ އެކި ވަރުގެ ގެއްލުން ލިބިފައެވެ. 9 ރަށެއް ފިޔަވައި އެހެން ހުރިހާ ރަށަކަށް ސުނާމީގެ އަސަރު ކޮށްފައިވާއިރު، މި ހާދިސާގައި 82 މީހަކު ނިޔާވެ، 24 މީހަކު ވީނުވީއެއް ނޭނގި ގެއްލިފައިވާކަމަށް ވަނީ ރިޕޯޓުކޮށްފައެވެ.
އެއްބައިވަންތަކަމުގެ ދުވަސް ފާހަގަ ކުރެވެނީ ހިތާމަޔާއި ބިރުވެރިކަމުގެ އެދުވަހު އެންމެހައި ދިވެހިން ގުޅިގެން ދެއްކި އެއްބައިވަންތަކަމުން ފިލާވަޅު ލިބިގަނެ ގައުމީ ޖޯޝާއި އެއްބައިވަންތަަކަން އިތުރުކޮށް ދެމެހެއްޓުމަށް ބާރުއަޅައި ހިތްވަރު ދިނުމެވެ.
