ދިވެހިރާއްޖޭގައި ދިރިއުޅޭ އިންޑިއާގެ ރައްޔިތުންނަށް ރާއްޖެއިން ދީފައިވާ މެހުމާންދާރީގެ ނުރަނގަޅު ފައިދާ، ރާއްޖޭގައި ދިރިއުޅޭ އިންޑިއާގެ އެއްވެސް ރައްޔިތަކު ނަގައިގެން ނުވާނެ ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، އަކިލޭޝް މިޝްރާ ވިދާޅުވެއްޖެއެވެ.
އިންޑިއާގެ 70 ވަނަ މިނިވަންދުވަސް ފާހަގަކުރުމަށް މާލޭގައި ބޭއްވި ހަފްލާ ޝަރަފްވެރިކޮށްދެއްވާ ސަފީރު ވިދާޅުވީ، ރާއްޖެއާއި އިންޑިއާ އާއި ދެމެދު އޮތީ ވަރަށް ގާތް ގުޅުމެއް ކަމަށާ، އެ ބަދަހި ގުޅުން ހުރިހާ ފެންވަރެއްގައި ދަމަހައްޓަން ޖެހޭ ކަމަށެވެ.
އެކި ބޭނުންތަކުގައި ރާއްޖޭގައި ދިރިއުޅޭ އިންޑިއާގެ ރައްޔިތުންނަށް ރާއްޖެއިން އަދާކޮށްފައިވާ މެހުމާންދާރީގެ ނުރަނގަޅު ފައިދާ، ރާއްޖޭގައި ދިރިއުޅޭ އިންޑިއާގެ އެއްވެސް ރައްޔިތަކު ނަގައިގެން ނުވާނެ ކަމަށް ވިދާޅުވެ، އެފަރާތްތަކަށް ނަސޭހަތް ދެއްވަމުން ސަފީރު ވަނީ ދެޤައުމުގެ މެދުގައި އޮތް ބަދަހި ގުޅުން ވަރުގަދަ ކުރުމަށް އިންޑިއާ އެމްބަސީ އަބަދުވެސް ތައްޔާރަށް ތިބިކަން ފާހަގަކުރައްވާފައެވެ.
އިންޑިއާގެ މިނިވަންދުވަސް ފާހަގަ ކުރުމަށް ބޭއްވި ހަރަކާތުގައި، މާލޭގައި ދިރިއުޅޭ އިންޑިއާގެ ގިނަ އަދަދެއްގެ ރައްޔިތުން ބައިވެރިވެފައިވާއިރު، މި ހަފްލާގައި އިންޑިއާ އެމްބަސީ އާއި ގާތުން، އެކި ދާއިރާތަކުގައި މަސައްކަތްކުރާ ބައެއް ދިވެހިންވެސް ވަނީ ބައިވެރިވެފައެވެ.
އަންގާރަ ދުވަހުގެރޭ ބޭއްވި މި ހަރަކާތުގައި އިންޑިއާގެ ސަގާފީ އެކި ހުށަހެޅުންތައްވެސް ވަނީ ދައްކާލާފައެވެ.