ވެލާނާ އިންޓަރނޭޝަނަލް އެއަރޕޯޓުގެ މަސައްކަތް ފުރިހަމައަށް ނިމޭއިރު ރާއްޖެ އަންނަ ފަތުރުވެރިންގެ އަދަދު 3 މިލިއަންއާ ގާތްކުރާނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ވެލާނާ އިންޓަރނޭޝަނަލް އެއަރޕޯޓް ޒަމާނީ ފެންވަރަށް ތަރައްގީކުރުމުގެ މަސައްކަތް ދަނީ ކުރަމުންނެވެ. މިކަމާއެކު ރާއްޖޭގެ ފަތުރުވެރިކަމަށް އަންނާނެ ކުރިއެރުމާ ގުޅޭގޮތުން ރާއްޖެޓީވީއަށް ދެއްވި އިންޓަރވިއުއެއްގައި ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ އެއަރޕޯޓުގެ މަސައްކަތް ފުރިހަމައަށް ނިންމާލެވޭނެ ކަމަށް ލަފާކުރެވެނީ 2023 ވަނަ އަހަރު ކަމަށެވެ.

2023 ވަނަ އަހަރު އެއަރޕޯޓް ތަރައްގީކުރުމުގެ މަސައްކަތް ނިމެންވާއިރަށް ރާއްޖެއަށް 3 މިލިއަނާ ގާތްކުރާ އަދަދަކަށް ފަތުރުވެރިން އަންނާނެ ކަމަށް ޓުއަރިޒަމް މިނިސްޓަރ ވިދާޅުވިއެވެ. އެއަރޕޯޓުގެ މަސައްކަތް ނިމޭއިރު، 6 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްގީކުރެވިގެންދާނެ ކަމަށް މިނިސްޓަރ މައުސޫމް ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ ކުރިއަށް އޮތްތަނުގައި ހަމައެކަނި މާލޭގެ އެއަރޕޯޓަށް ބަރޯސާނުވެ، އަތޮޅުތެރޭގެ އެއަރޕޯޓުތައް ތަރައްގީކުރުން މުހިންމު ކަމަށެވެ. ގިނަ ފަތުރުވެރިންނަކީ އަތޮޅުތެރެއަށް ދަތުރުކުރާ ބަޔަކަށްވުމާއެކު އެ އެއަރޕޯޓްތައް ތަރައްގީކުރެވިގެންދިއުމަކީ ފަތުރުވެރިކަން ކުރިއަރައިގެންދާނެ ކަމެއް ކަމަށް މިނިސްޓަރ ވިދާޅުވިއެވެ.

ވެލާނާ އިންޓަރނޭޝަނަލް އެއަރޕޯޓު ތަރައްގީކުރުމުގެ ދެވަނަ ފިޔަވަހީގެ މަސައްކަތް ކުރިއަށްދާއިރު މި މަސައްކަތުގެ ތެރޭގައި އެއާޕޯޓުގެ އާ ޓާމިނަލް އެޅުމުގެ މަސައްކަތާއި، އާ ރަންވޭ އާއި، އޭޕްރޮން އާއި، ފިއުލް ފާމަކާއި، ކާގޯ ޓާމިނަލްއެއް ތަރައްގީކުރުމަށް ވަނީ ހަމަޖައްސާފައެވެ. މި މަސައްކަތްތައް ނިމުމުން 7 މިލިއަން ފަސިންޖަރުންނަށް ޚިދުމަތް ދެވޭ ވަރަށް އެއަރޕޯޓް ތަރައްގީކުރެވިގެންދާނެ ކަމަށް އެމްއޭސީއެލްއިން ބުނެފައިވެއެވެ.

ރާއްޖޭގެ ފަތުރުވެރިކަމަށް ބަލާއިރު، މި އަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަކީ ސަރުކާރުގެ އަމާޒެކެވެ. މި އަހަރުގެ ޖެނުއަރީ 1 އިން ޑިސެމްބަރު 22 ވަނަ ދުވަހުގެ ނިޔަލަށް 1،271،020 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިގޮތުން މި ހިނގާ ޑިސެމްބަރު މަހުގެ 1 އިން 22 ވަނަ ދުވަހުގެ ނިޔަލަށް 113،367 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. އަދި މި އަހަރުގެ ޖުލައި އިން ފެށިގެން ކޮންމެ މަހަކު ވެސް އެއް ލައްކައަށްވުރެ ގިނަ ފަތުރުވެރިން ރާއްޖެ އަންނަމުންދެއެވެ.

މީގެ އިތުރުން މި އަހަރުގެ ބެޑް ނައިޓްސް 2019 ވަނަ އަހަރުގެ ބެޑް ނައިޓަށްވުރެ އިތުރުވެފައިވާކަމަށް ވެސް ޓުއަރިޒަމް މިނިސްޓަރ ވަނީ ވިދާޅުވެފައެވެ. މިގޮތުން 2019 ވަނަ އަހަރު ބެޑް ނައިޓް ހުރީ 10.7 މިލިއަންގައެވެ. މި އަހަރު ނިމޭއިރު މި އަދަދު 11 މިލިއަނަށް އަރާނެ ކަމަށް ޓުއަރިޒަމް މިނިސްޓަރ ވަނީ ވިދާޅުވެފައެވެ.