ފަތުރުވެރިކަމުގެ ރަންޔޫބީލާ ގުޅޭ ޚާއްސަ ސްޓޭމްޕްތަކެއް!

ދިވެހިރާއްޖޭގެ ފަތުރުވެރިކަމަށް 50 އަހަރުފުރޭ ރަންއަހަރާ ގުޅުވައިގެން ބެނެލަކްސް ގައުމަތަކުގައި ނެރުނު ޚާއްސަ 3 ސްޓޭމްޕް ސެޓްގެ ސްވެނިއަރ ޕްލާކު، ޓޫރިޒަމް މިނިސްޓްރީއަށް ހަދިޔާކޮށްފިއެވެ.

ފަތުރުރުވެރިކަމުގެ ރަންއަހަރުގެ ލޯގޯޖެހި, ބެލްޖިއަމްގެ ސްޓޭމްޕްސެޓާއި ނެދަރލޭނޑުގެ ސްޓޭމްޕްސެޓާއި، އަދި ލަކްސަމްބަރގަގެ ސްޓޭމްޕްސެޓުގެ ސްވެނިއަރ 3 ޕްލާކު ޓުއަރިޒަމް މިނިސްޓްރީއަށް ވަނީ ހަދިޔާކޮށްފައެވެ. މި ޕްލާކްތައް ހަދިޔާކޮށްދެއްވީ ބެނެލަކްސް މޯލްޑިވްސް ފްރެންޑްޝިޕް ސޮސައިޓީގެ ރައީސް، އަދި ބެލްޖިއަމްގެ ފްލެންޑަރސް ގެ ދިވެހިރާއްޖޭގެ އޮނަރަރީ ކޮންސުލް ޖެރާޑު ހުއިޓިންގއެވެ.

މި ސްޓޭމްޕް ސެޓްތަކަކީ ބެނެލަކްސް ގައުމަތަކުގެ އެތެރެވަރިއާއި އިންޓަރނޭޝަނަލް ޕޯސްޓުގެ ޚިދުމަތަށް މިހާރު ބޭނުންކުރެވެމެންދާ ސެޓްތަކެކެވެ. މި ޚާއްސަ ސްޓޭމްޕް ސެޓްތަކަކީ މޯލްޑިވްސް ބެނެލަކުސް ފްރެންޑުޝިޕް ސޮސައިޓީގެ ފަރާތުން، އެގައުމުތަކުގެ ޕޯސްޓް އޮފީހާއި، ބްރެސެލްސްގައި ހުންނަ ދިވެހިރާއްޖޭގެ ޔޫރަޕިއަން ޔުނިއަންގެ އެމްބަސީއާއި މިނިސްޓްރީ އޮފް ޓޫރިޒަމާ ގުޅިގެން ނެރެނު ސްޓޭމްޕްސެޓް ތަކެކެވެ.

މި ސްޓޭމްޕް ސެޓްތަކުގެ ތެރެއިން މި އަހަރު ޖުލައި 5 ގައި ނެރުނު ބެލްޖިއަމް ސްޓޭމްޕް ސެޓް ނެރެދެއްވުމުގެ ގޮތުން ޔޫރަޕިއަން ޔޫނިއަންއަށް ކަނޑައަޅުއްވާފައި ހުންނަވާ ދިވެހިރާއްޖޭގެ ސަފީރު ހަސަން ސޯބިރު، އެ ސްޓޭމްޕް ޖައްސަވާފައި، ޕޯސްޓްކުރެއްވި ޚާއްސަ ސިޓީއެއް މިނިސްޓަރ އޮފް ޓޫރިޒަމް ޑރ. ޢަބްދު الله މައުސޫމަށް 15 ޖުލައި ވަނަ ދުވަހު ވަނީ ލިބިވަޑައިގެންފައެވެ.

ފަތުރުވެރިކަމުގެ ރަންއަހަރާ ގުޅުވައިގެން މޯލްޑިވްސް ޕޯސްޓު ލިމިޓެޑުގެ ފަރާތުން ވެސް މުނާސަބަތާގުޅޭ ޚާއްސަ ސްޓޭމްޕް ސެޓަކާއި ސްވެނިއަރ ސެޓެއް 2022 ވަނަ އަހަރުގެ ފެބުރުއަރީ މަހު ނެރުމަށް ވަނީ ހަމަޖެހިފައެވެ. އެ ސްޓޭމްޕް ސެޓް ނެރެދެއްވުމަށް ރާއްޖޭގެ ފަތުރުވެރިކަމުގެ ޕައިނިއަރުންގެ ތެރޭގައި ހިމެނޭ އިޓަލީ ވިލާތުގެ ޖޯޖު ކޯބިންއަށް ޓުއަރިޒަމް މިނިސްޓްރީން ވަނީ ދައުވަތު އަރުވާފައެވެ.