ނަގުދު ފައިސާ މަދުކޮށް، ފައިސާ ދެއްކޭނެ އެހެން ނިޒާމުތަކެއް ޤާއިމްކުރުމަށް ސަރވޭއެއް ހެދުމަށް މަރުކަޒީ ބޭންކުން ނިންމައިފިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު ނޫސްބަޔާނެއްގައި އެއޮތޯރިޓީ އިން ބުނީ ދިވެހިރާއްޖޭގެ ވިޔަފާރީގެ މުޢާމަލާތްކުރުމާއި ފައިސާ ދެއްކުމުގެ ނިޒާމާ ބެހޭ ގޮތުން ދިރާސާއެއް ކުރުމަށް ނިންމާފައިވާ ކަމަށެވެ. ޕޭމެންޓް ސިސްޓަމާ ގުޅޭ މި ސަރވޭގެ މަގުސަދަކީ އެކި މުޢާމަލާތްތަކުގައި ފައިސާ ދެއްކުމުގައި ދިމާވާ ދަތިތަކާއި މައްސަލަތައް ދެނެގަނެ، ނަގުދު ފައިސާ ބޭނުންކުރުން މަދުކޮށް ވީހާ ވެސް ފަސޭހަ ނިޒާމަކުން ފައިސާ ދެއްކޭނެ އިންތިޒާމެއް ހަމަޖެއްސުމަށް މަގުފަހި ކުރުން ކަމަށް މަރުކަޒީ ބޭންކުން ބުންޏެވެ.

އެމްއެމްއޭ އިން ބުނީ މި ސަރވޭގައި މަޢުލޫމާތު ނަގާނެ މައިގަނޑު ދާއިރާތަކުގެ ތެރޭގައި ފަތުރުވެރިކަން، މަސްވެރިކަން، ތަކެތި އުފެއްދުން، އިމާރާތްކުރުން، ދަތުރުފަތުރާއި މުއާސަލާތީ ހިދުމަތް، ވިޔަފާރި، މާލީ ހިދުމަތް، ސިއްހީ އަދި ތަޢުލީމީ ދާއިރާ ހިމެނޭ ކަމަށެވެ. އަދި މި ސަރވޭގައި ފުރަތަމަ މަޢުލޫމާތު އެއްކުރުމަށް އަމާޒުކޮށްފައި ވަނީ މާލެ، ހުޅުމާލެ އަދި ވިލިނގިލި ހިމެނޭ ގޮތަށް މާލެ ސަރަހައްދަށެވެ.

މިމަހުގެ 6 އިން 11 އަށް، ކޮންމެ ދުވަހަކު ހެނދުނު 9:00 އިން ހަވީރު 6:00 އަށް އެމްއެމްއޭގެ ޓީމްތައް އެކިއެކި ފަރާތްތަކާ ބައްދަލުކޮށް، ސަރވޭއަށް ބޭނުންވާ މައުލޫމާތު ހޯދުމުގައި ޙަރަކާތްތެރިވާނެ ކަމަށް އެއިދާރާއިން ބުންޏެވެ. އަދި ޕޭމެންޓް ސިސްޓަމް ހަރުދަނާ ކުރުމަކީ ވަރަށް ބޮޑު ހޭދައެއްކޮށްގެން ކުރާ ގައުމީ މަސައްކަތަކަށްވާތީ، މި ސަރވޭއޭއަށް އެންމެހާ ފަރާތްތަކުން ފުރިހަމަ އެއްބާރުލުން ދެއްވުމަށް އެމްއެމްއޭއިން އެދިފައިވެއެވެ.

ބޭންކިންގގެ ދާއިރާގައި ރާއްޖެ، މިސަރަހައްދުގެ ފާހަގަކޮށްލެވޭ ޤައުމަމަށް ވެފައިވާއިރު، ނަގުދު ފައިސާ މަދުކުރުމަކީ ކުރިއަރާފައިވާ ޤައުމުތަކުގައި މިހާރު ކުރަމުންދާ މަސައްކަތެކެވެ.