ފްރާންސްގައި ފުރަަތަމަ ފަހަރަސް އެއްލައްކައިން މަތިން ކޮވިޑް ކޭސްތައް ރިޕޯޓްކޮށްފިއެވެ.
ހޮނިހިރު ދުވަހު އެ ގައުމުގައިވަނީ 104،611 މީހުންނަށް ބަލި ޖެހިގެން ރިޕޯޓް ކޮށްފައެވެ. މިއީ ޕެންޑަމިކް ފެށުނު ފަހުން މިހާތަނަށް ބަލި ޖެހިގެން އެންމެ ގިނައި ރިޕޯޓްކުރި ދުވަހެވެ.
ހަލުވި ކަމާއެކު އައު ވޭރިއަންޓް އެ ގައުމުގައި ފެތުރެމުން އަންނާތީ ސަރުކާރުންވަނީ ކަންބޮޑުވުން ފައުޅުކޮށްފައެވެ. ހުކުރު ދުވަހު ފްރާންސްގައި ވަނީ، ވެކްސިންގެ ދެވަނަ ޑޯޒް ޖެހިތާ ތިން މަސް ވެފައިވާ މީހުން ބޫސްޓަރ ޑޯޒް ޖެހުމަށް އަންގާފައެވެ.
ބޫސްޓަރ ޑޯޒް ޖެހުމުން ވެކްސިން ފާސް ދޭ ގޮތުގެ އުސޫލަށް ބަދަލު ގެނައުމަށް އެ ގައުމުގެ ސަރުކާރުން އަންނަނީ މަސައްކަތް ކުރަމުންނެވެ. މި ފާހަކީ، ގައުމުން ބޭރަށް ކުރާ ދަތުރުތަކުގައާއި، ކެފޭ، ރެސްޓޯރަންޓް އަދި ސްޕާތަކަށް ވަނުމަށް ބޭނުން ކުރަން ޖެހޭ ފާހެކެވެ.
ފްރާންސްގެ އާބާދީގެ 76.5 އިންސައްތަ މީހުން ވަނީ ވެކްސިން ފުރިހަމަކޮށްފައެވެ. މިހާތަނަށް ބަލީގައި މަރުވެފައިވަނީ، 122،546 މީހުންނެވެ.
