ރާއްޖޭގެ ފަތުރުވެރިކަން އިޝްތިހާރު ކުރުމަށް ބެލްޖިއަމްގެ މީޑިއާ ޓީމެއް ރާއްޖެއަށް!

ދިވެހިރާއްޖޭގެ ފަތުރުވެރިކަން އިޝްތިހާރު ކުރުމުގެ ގޮތުން މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ހިންގާ ފެމިލަރައިޒޭޝަން ދަތުރަކަށް ބެލްޖިއަމްގެ މީޑިއާ ޓީމެއް ރާއްޖެ އަތުވެއްޖެއެވެ.

އެމްއެމްޕީއާރްސީން ބުނީ މިދަތުރުގައި ބައިވެރިވެފައިވަނީ މަޝްހޫރު ޕަބްލިކޭޝަންތައް ކަމަށްވާ ލަ ލިބްރޭ، މޭރީ ކްލެއަރ ބެލްޖިއަމް، ޓުގެދާ މެގަޒިން، ހެޑް ނިއުސްބްލާޑް އަދި ސައިކޮލޮޖީސް މެގަޒިން އަށް ނިޞްބަތްވާ ނޫސްވެރިން ކަމަށެވެ.

މި ދަތުރުގައި ބައިވެރިން ތިބުމަށް ހަމަޖެހިފައިވަނީ ތަފާތު ތިން ރިސޯޓުގައެވެ. އެގޮތުން ޕެރެޑައިޒް އައިލޭންޑް ރިސޯޓް އެންޑް ސްޕާ އާއި، ނިކަ އައިލޭންޑް ރިސޯޓް އެންޑް ސްޕާގެ އިތުރުން މީރު އައިލޭންޑް ރިސޯޓުގައި ދަތުރުގެ ބައިވެރިން މަޑު ކުރާނެއެވެ. މި ރިސޯޓް ތަކުން ދަތުރުވެރިންނަށް ޚާއްޞަކޮށްގެން ވޯޓަރ ސްޕޯޓްސްއާއި، ކަނޑު އަޑީގެ ރީތި މަންޒަރުތައް ބަލައިލުމުގެ އިތުރުން ރާއްޖޭގެ ޘަޤާފަތް ބަލައިލުމަށް ރިސޯޓް ކައިރީ ރަށް ތަކަށް ދަތުރުކުރާނެ ކަމަށް އެމްއެމްޕީއާރްސީން ބުނެއެވެ.

ބެލްޖިއަމުން ރާއްޖެ އަންނަ ފަތުރުވެރިންގެ ޢަދަދު މިދިޔަ ފަސް އަހަރާ އަޅާކިޔާއިރު، މިއަހަރު ވަރަށް ބޮޑުތަން އިތުރު ވެފައިވެއެވެ. އެގޮތުން މި އަހަރުގެ ސެޕްޓެންބަރުމަހުގެ ނިޔަލަށް އެ ޤައުމުން އައި ފަތުރުވެރިންގެ ނިޞްބަތް ވަނީ 2018 ވަނަ އަހަރާއި އަޅާ ބަލާއިރު 20.5 އިންސައްތް އިތުރުވެފައެވެ. މިއީ މި އަހަރު ހިންގަމުންދާ މާރކެޓިންގ ޙަރަކާތްތަކުގެ ސަބަބުން ލިބެމުން އަންނަ ކުރިއެރުމެއް ކަމަށް އެމްއެމްޕީއާރްސީން ބުނެއެވެ.