މިވަގުތު 16 ރިސޯޓެއް މޮނިޓަރިންގެ ހާލަތުގައި
މޮނިޓަރިންގައި އޮންނަތާ އެންމެ ގިނަ ދުވަސްވީ އެޓްމޯސްފިއަރ ކަނިފުށި ރިސޯޓް
ލިލީ ބީޗް ރިސޯޓް
ކޮވިޑް-19ގެ ހާލަތާއި ގުޅިގެން މިވަގުތު 16 ރިސޯޓެއް އޮތީ މޮނިޓަރިންގެ ހާލަތުގައި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން އާންމުކޮށްފައިވާ މައުލޫމާތުގައިވާގޮތުން މިވަގުތު މޮނިޓަރިންގެ ހާލަތުގައި އޮތް ރިސޯޓުތަކަކީ އެޓްމޯސްފިއަރ ކަނިފުށި ރިސޯޓް، ލިލީ ބީޗް ރިސޯޓް، ސޭންޑީސް ބަތަލާ ރިސޯޓް، ތާޖް ކޮރަލް ރީފް ރިސޯޓް، ފުރަވެރި މޯލްޑިވްސް، ސިނަމަން ހަކުރާ ހުރާ، އޮބްލޫ ސަންގެލި ރިސޯޓް، މީރު އައިލެންޑް ރިސޯޓް، މަނަފަރު އައިލެންޑް ރިސޯޓް، ވަން އެންޑް އޮންލީ ރީތި ރަށް، ޕަޓީނާ މޯލްޑިވްސް - ފަރި ވެލި ހުރާ، ރިޓްޒް ކާލްޓަން މޯލްޑިވްސް- ފަރި ކަނޑު ހުރާ، ކެމްޕަސް އައިލެންޑް ފަރި އިރު ހުރާ، މިރިހި އައިލެންޑް ރިސޯޓް، ކަނޑިންމަ މޯލްޑިވްސް، އަދާރަން ސެލެކްޓް ހުދުރަންފުއްޓެވެ.
މޮނިޓަރިންގައި އޮންނަތާ އެންމެ ގިނަ ދުވަސްވީ ރިސޯޓަކީ އެޓްމޯސްފިއަރ ކަނިފުށި ކަމަށް އެޗްޕީއޭއިން ބުނެފައިވެއެވެ. އެ ރިސޯޓު މޮނިޓަރިންނަށް ލާފައިވަނީ މިދިޔަ ނޮވެމްބަރު މަހުގެ 30 ވަނަ ދުވަހުއެވެ.
މީގެ އިތުރުން މީހުން ދިރިއުޅޭ ރަށްތަކުގެ ތެރެއިން 17 ރަށެއް މިވަގުތު އޮތީ މޮނިޓަރިންގައި ކަމަށް އެޗްޕީއޭއިން ހާމަކޮށްފައިވެއެވެ. އެއީ ސ. ހިތަދޫ، ސ. މަރަދޫ، ސ. މަރަދޫފޭދޫ، ސ. ފޭދޫ، ސ. ހުޅުމީދޫ، މ. މުލައް، ދ. ކުޑަހުވަދޫ، އދ. މާމިގިލި، ނ. މާފަރު، ހދ. ހަނިމާދޫ، ނ. ލަންދޫ، ޅ. ހިންނަވަރު، ތ. ވިލުފުށި، ތ. ހިރިލަންދޫ، ގދ. ރަތަފަންދޫ، ގދ. ވާދޫ އަދި ކ. ތުލުސްދޫއެވެ.
މިރަށްތަކުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސްވީ ސ. ހިތަދޫ، ސ. މަރަދޫ، ސ. މަރަދޫފޭދޫ އަދި ސ. ފޭދޫއެވެ. މި 4 ރަށް މޮނިޓަރިންނަށް ލާފައިވަނީ މިއަހަރުގެ އޮގަސްޓު މަހުގެ 28 ވަނަ ދުވަހުއެވެ.
ރާއްޖެއިން ފެންނަ ކޮވިޑް ކޭސްތައް އަދިވެސް ހުރީ އެއްވަރެއްގައި ހިފެހެއްޓިފައެވެ. މާލެ ސަރަހައްދުން ފެންނަ ކޭސްތައް މަދު ނަމަވެސް އަތޮޅުތެރެއިން ފެންނަ ކޭސްތައް އަދިވެސް ދަނީ އިތުރުވަމުންނެވެ. އަދި ރިސޯޓުތަކުން ފެންނަ ކޭސްތައްވެސް ދަނީ އިތުރުވަމުންނެވެ.
