ކެފޭއެއް ތެރޭގައި އިން މީހަކަށް ހަމަލާދީ ޒަޙަމްކޮށްލައިފި، ސީރިއަސް ހާލަތުގައި
27 ޖުލައި 2017 | ބުރާސްފަތި 16:38ހަމަލާ ދީފައި ވަނީ ބޮލަށް
ކެފޭއެއް ތެރޭގައި އިން މީހަކަށް ހަމަލާދީ ޒަޙަމްކޮށްލައިފި
ލޮނުޒިޔާރަތް މަގާއި ކަށިމާ ހިނގުން ގުޅޭ ކަންމަތީގައި ހުންނަ ޓާމިނަލް ކެފޭ ތެރޭގައި އިން މީހަކަށް ތޫނު އެއްޗަކުން ހަމަލާދީ ޒަހަމްކޮށްލައިފި އެވެ.
ޒަޙަމްކޮށްލައިފައިވަނީ ހއ. ތަކަންދޫ، އިބްރާހިމީ ހިޔާގޭ، އުމުރުން 23 އަހަރުގެ ނަދީމު އަބްދުއްރަހީމްއެވެ.
މަންޒަރު ދުށް މީހަކު ބުނިގޮތުގައި ނަދީމްއަށް ހަމަލާދީފައި ވަނީ މޫނު ނިވާކޮށްގެން ތިބި ހަތަރު މީހުން ކެފޭ ތެރެއަށް ވަދެ އެވެ. ހަމަލާދީފައި ވަނީ ބޮލަށެވެ.
ފުލުހުންގެ މީޑިއާ އޮފިޝަލް ވިދާޅުވީ ނަދީމްއަށް ހަމަލާދީފައި ވަނީ އިރޮއޮއްސި 6.30 ގައި ކަމަށާއި ހަމަލާދީފައި ވަނީ މޫނު ނިވާކޮށްގެން ތިބި ބަޔަކު ކެފޭ ތެރެއަށް ވަދެ ކަމަށެވެ. އަދި އޭނާގެ ހާލު ސީރިއަސްކަމަށާއި އޭޑީކޭ އައިސީޔޫގައި މިހާރު ފަރުވާދެމުންދާ ކަމަށް ފުލުހުން ބުންޏެވެ.
ފުލުހުން ބުނީ މި މައްސަލަ އިތުރަށް ތަހުޤީޤު ކުރަމުންދާ ކަމަށާއި އެއްވެސް މީހަކު އަދި ހައްޔަރުކޮށްފައިނުވާ ކަމަށެވެ.
