އާދިއްތަ ދުވަހުން ފެށިގެން މިފްކޯއަށް މަސް ކިރާ އަދަދު ލިމިޓްކުރަން ނިންމައިފި
މަސް ކިރާ އަދަދު ލިމިޓްކުރީ ކެޕޭސިޓީއަށްވުރެ އިތުރަށް މަސް ލިބެމުންދާތީ
ފެލިވަރު މަސް ފެކްޓަރީ
މިފްކޯގެ ފްރީޒިންގ ކެޕޭސިޓީއަށްވުރެ އިތުރަށް މަސް ލިބެމުންދާތީ، އާދިއްތަ ދުވަހުން ފެށިގެން ދޯންޏަކުން 5 ޓަނުގެ މަސް ކިރާގޮތަށް ހަމަޖައްސައިފިއެވެ.
މިކަމާއި ގުޅިގެން މިފްކޯއިން ނެރުނު ބަޔާނެއްގައި ވަނީ މިދުވަސްވަރު ރާއްޖޭގެ މަސްވެރިކަން އާދަޔާއި ޚިލާފަށް ރަގަޅުވެ، ހުރިހާ ހިސާބެއްގެ ދޯނިފަހަރު އެއްފަހަރާ އެކުންފުނީގެ ސެންޓަރުތަކާއި ބޯޓުފަހަރަށް މަސްކިރުވުމަށް އަންނަމުންދާތީ، މިފްކޯގެ ފްރީޒިންގ ކެޕޭސިޓީއަށް ވުރެ އިތުރަށް މަސް ލިބެމުން ދިއުމާއެކު މަސްކިރުވުމަށް ދަތިތަކާއި ދިމާވަމުންދާކަމަށެވެ.
ދޯނިފަހަރު ކިޔުގައި ހޭދަކުރާ ވަގުތު މަދުކުރުމުގެ ގޮތުންނާއި ރަނގަޅު ކޮލިޓީގައި މަސް ގަންނަން ބޭނުންވާތީ، 23 ޑިސެމްބަރ 2021 ވަނަ ދުވަހު ކިއުއަށް އަރާފައިވާ ދޯނިފަހަރުގެ މަސް، ހުކުރު ދުވަހުގެ ބަޔަކާއިއެކީގައި ކިރުމުގެ މަސައްކަތް ކޮށްފައިވާކަމަށް މިފްކޯއިން ބުނެފައިވެއެވެ. އާންމުގޮތެއްގައި ހުކުރު ދުވަހަކީ މަސް ނުކިރާ ދުވަހެއް ނަމަވެސް ހާލަތަށް ބަލައި ފާއިތުވި 4 ހުކުރުދުވަހު ވެސް މަސް ކިރުމުގެ މަސައްކަތް ހުއްޓުމެއްނެތި ކުރިޔަށް ގެންގޮސްފައިވާކަމަށް މިފްކޯއިން ބުނެފައިވެއެވެ. އަދި ކޯލްޑް ސްޓޯރުތައް ފުރެމުން އަންނާތީ، މެދުކެނޑުމެއްނެތި ކެރިއަރ ބޯޓުތައްގެނެސް ލޯޑުކޮށް އެކްސްޕޯޓް ކުރުމުގެ މަސައްކަތްވެސް ކުރަމުންދާކަމަށް މިފްކޯއިން ވަނީ ބުނެފައެވެ.
މިގޮތަށް ޕްލޭންކޮށްގެން މަސްގަތުމުގެ މަސައްކަތް ކުރިނަމަވެސް މަސްކިރަން އަންނަ ދޯނިފަހަރާއި، އެދޯނިތަކުން ގެންނަ އަދަދުތައް މާބޮޑަށް ގިނަވެ، މިހާރު ކިޔުގައިހުރި ދޯނިފަހަރުގެ މަސްކިރައި، ފްރީޒްކުރުމަށް ވަގުތު ބޭނުންވާތީ 25 ޑިސެމްބަރ 2021 އިން ފެށިގެން ދޯންޏަކުން 5 ޓަނުގެ މަސް ކިރާ ގޮތަށް ހަމަޖައްސާފައިވާކަމަށް މިފްކޯއިން ބުނެފައިވެއެވެ. މިގޮތަށް ނިންމި ނަމަވެސް ސެންޓަރުތަކުން ކިއު ނަމްބަރު ދީފައިހުރި ދޯނިފަހަރު މަސްކިރައި ނިމެންދެން، އެދޯނިފަހަރުގެ މަސް ކޮންޓްރޯލް ނެތި ކިރަމުންދާނެ ކަމަށް މިފްކޯއިން ބުނެފައިވެއެވެ.
ފާއިތުވެދިޔަ 2020 އަހަރު މިފްކޯއިން ގަނެފައިވަނީ 49,392 ޓަނު މަހެވެ. ނަމަވެސް މިއަހަރުގެ މިހާތަނަށް 56,198 ޓަނުމަސް ގަނެވިފައިވެއެވެ. ހަމައެކަނި މި ޑިސެމްބަރ މަހުގެ މިހިސާބަށް 8,796 ޓަނު މަސް ގަނެފައިވެއެވެ. މިއީ މިފްކޯގެ ތާރީޚުގައި މަހެއްގެ ތެރޭގައި އެންމެ ގިނައިން މަސްލިބޭނެ މަސްކަމަށާއި މިމަސްނިމޭއިރު 10,500 ޓަނު މަސް ގަނެވޭކަމަށް އަންދާޒާކުރެވޭ ކަމަށް މިފްކޯއިން ބުނެފައިވެއެވެ. އެ ކުންފުނީގެ މަސް ގަތުމުގެ ކެޕޭސިޓީ އަށް ގެނެސްފައިވާ ހެޔޮ ބަދަލާއެކު މިހާރު ދުވާލަކު 400 ޓަނާއި 500 ޓަނުގެ މަސް ގަންނަމުންދާކަމަށް މިފްކޯއިން ބުނެފައިވެއެވެ.
