ކޮރަޕްޝަނާއި ވެރިކަމުގެ ބާރު ނަހަމަ ގޮތުގައި ބޭނުންކުރުމުގެ ކުށުގައި ޖަލު ބަންދުގައި ހުންނެވި ސައުތު ކޮރެއާގެ ކުރީގެ ރައީސް ޕާކް ގެއުން ހައިއަށް އަފުއާމުގެ ދަށުން ދޫކޮށްލަން ނިންމައިފިއެވެ.

ރިޕޯޓުތައް ބުނާ ގޮތުން ޕާކް ޖަލުން ދޫކޮށްލަނީ ޑިސެންބަރު މަހުގެ 31 ވަނަ ދުވަހުއެވެ.

ކުރިން ސައުތު ކޮރެއާގެ ރައްޔިތުންގެ މެދުގައި ބޮޑު މަގުބޫލުކަމެއް އޮތް ޕާކަށް ލިބިފައިވެއެވެ. ނަމަވެސް ޕާކްގެ ވަރަށް ގާތް ރަހުމަތްތެރިއެއް ކަމަށްވާ ޗޮއި ސޫން-ސިލް އަށް ދެއްވި ބާރުތަކާ ގުޅިގެން ގިނަ ބައެއްގެ ފާޑު ކިޔުން އަމާޒުވެގެންދިޔައެވެ. އަދި އެ ބާރު ބޭނުންކޮށްގެން ޗޮއި ވަނީ ސިޔާސީ ގޮތުން އެހީތެރިކަން ލިބޭނެކަމަށް ބުނެ ސައުތު ކޮރެއާގެ ކުންފުނިތަކުން ފައިސާ ނަގައިފައެވެ. އޭގެ ތެރޭގައި ސެމްސަންގް ވެސް ހިމެނެ އެވެ. މިފަދަ އެއްވެސް ކަމެއްގައި ހަރަކާތްތެރިވެފައި ނުވާ ކަމަށް ޕާކް ވިދާޅުވެފައިވެއެވެ. މިހުރިހާ ކަމަކާ ގުޅިގެން ޕާކަށް އޮތް ތާއީދު ވަރަށް ބޮޑަށް ދަށްވެގެން ދިޔައެވެ.

ޕާކްގެ މައްޗަށް ކޮށްފައިވާ ތުހުމަތަކީ ރިޝްވަތު ނެންގެވުމާއި ބާރުގެ ބޭނުން ނާޖާއިޒު ގޮތުގައި ބޭނުންކުރެއްވުމާއި ދައުލަތުގެ ސިއްރު ހާމަ ކުރުމެވެ. މި ކުށުގެ ތުހުމަތުތައް ސާބިތުވުމާ ގުޅިގެން 24 އަހަރަށް ޖަލަށްލާން އެ ގައުމުގެ ކޯޓުން ހުކުމް ކޮށްފައިވަނީ 2018 ވަނަ އަހަރުގެ އޭޕްރީލް މަހުގެ ތެރޭގައެވެ. އަދި 17 މިލިއަން ޑޮލަރުން ޖޫރިމަނާކޮށްފައިވެއެވެ.

ޕާކް އަކީ ޖިނާއީ ތުހުމަތުތަކެއްގައި ހައްޔަރުކުރި ސައުތު ކޮރެއާގެ ތިން ވަނަ ރައީސްއެވެ.