އައިޖީއެމްއެޗްގައި އިތުރު ޚިދުމަތްތައް ތައާރަފުކޮށް ފަސޭހަ އިންތިޒާމްތައް ހަމަޖައްސަނީ!
ސެންޓަރ ފޯ މެންޓަލް ހެލްތް އިންޕޭޝަންޓްގެ ވޯޑް ޖެނުއަރީ މަހުގެ ތެރޭގައި ހުޅުވާނެ
އިންދިރާގާދީ މެމޯރިއަލް ހޮސްޕިޓަލް (އައިޖީއެމްއެޗް)
އިންދިރާގާދީ މެމޯރިއަލް ހޮސްޕިޓަލް (އައިޖީއެމްއެޗް)ގައި އިތުރު ޚިދުމަތްތައް ތައާރަފްކޮށް، ރައްޔިތުންނަށް ލުއި ފަސޭހަވާނެ ގޮތަށް އިންތިޒާމްތައް ހަމަޖައްސައިދިނުމުގެ މަސައްކަތްތައް ކުރިއަށްދާ ކަމަށް އެހޮސްޕިޓަލްގެ ސީއީއޯ އިބްރާހިމް ސަލީމް ވިދާޅުވެއްޖެއެވެ.
ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި ސަލީމް ވިދާޅުވީ އައިޖީއެމްއެޗްގެ ޚިދުމަތްތައް ފުޅާކުރުމަށް ގިނަ މަސައްކަތްތައް ކުރަމުންދާ ކަމަށާއި، ކުރިއަށް އޮތްތަނުގައި އައު ޚިދުމަތްތަކެއް ތައާރަފް ކުރެވިގެންދާނެ ކަމަށެވެ. އެގޮތުން މިއަންނަ އަހަރުގެ ތެރޭގައި ''ސެންޓަރ ފޯ މެންޓަލް ހެލްތް އިންޕޭޝަންޓްގެ ވޯޑް'' ހުޅުވި ބޭނުން ކުރަން ފެށޭނެ ކަަމަށް ސަލީމް ވިދާޅުވިއެވެ. ޖެނުއަރީ މަހުގެ ތެރޭގައި ހުޅުވުމަށް ނިންމާފައިވާއިރު، އެއީ ނަފްސާނީ ބަލިތަކަށް ފަރުވާ ހޯދާ މީހުން ބައިތިއްބައިގެން ފަރުވާ ދޭނެ ވޯޑެއް ކަމަށް ސަލީމް ވިދާޅުވިއެވެ.
އެނިޒާމުގެ ތެރެއިން ނަފްސާނީ ބަލި ތަހައްމަލް ކުރާ މީހުންނަށް ދެވޭ ފަރުވާ އިތުރަށް ހަރުދަނާ ކުރާނެ ކަމަށް ސަލީމް ވިދާޅުވިއެވެ. މީގެ އިތުރުން ވިދާޅުވީ، ކުރިއަށް އޮތްތަނުގައި އިތުރު ޚިދުމަތްތައް އިއުލާން ކުރެވިގެންދާނެ ކަމަށެވެ.
އައިޖީއެމްއެޗުން ގާއިމްކުރަމުންދާ ސޮފްޓްވެއަރއަށް އިޝާރާތް ކުރައްވައި ސަލީމް ވިދާޅުވީ އެސޮފްޓްވެއަރގެ މަސައްކަތް ގާތްގަނޑަކަށް ނިމިފައިވާ ކަމަށާއި، 2022 ވަނަ އަހަރުގެ ފުރަތަމަ ކުއާޓަރުގައި ތައާރަފް ކުރެވިގެންދާނެ ކަމަށެވެ.
ސަލީމް ވިދާޅުވީ ކުރިއަށް އޮތްތަނުގައި އެސޮފްޓްވެއަރ މެދުވެރިކޮށް ޑޮކްޓަރުންގެ ޝެޑިއުލް ބަލައިލެވޭނެ ކަމަށާއި، ކުރިއަށް އޮތްތަނުގައި މަސް ދުވަހަށް ޑޮކްޓަރުންގެ ޝެޑިއުލް ހެދިގެންދާނެ ކަމަށެވެ. އަދި މިހާރު އެޕޮއެންޓްމެންޓް ހެއްދުމުން ދޭ ނަންބަރުގެ ބަދަލުގައި ޑޮކްޓަރަށް ދެއްކުމަށް އަންނަން ޖެހޭ ދުވަސް އެނގިގެންދާނެ ކަަމަށް އޭނާ ވިދާޅުވިއެވެ.
ސަލީމް ވިދާޅުވީ އަބަދުވެސް މަސައްކަތް ކުރަމުންދަނީ ރައްޔިތުންނާއި ގާތުން ރަނގަޅު ޚިދުމަތްތަކެއް ފޯރުކޮށްދިނުމަށް ކަމަށެވެ.
