ލިވަޕޫލް، ޗެލްސީ އަދި ޓޮޓެންހަމް ސެމީއަށް

އިނގިރޭސި ލީގު ކަޕުގެ ކުއާޓާ ފައިނަލުގައި ބުދަ ދުވަހުގެރޭ ކުޅުނު މެޗުތަކުން މޮޅުވެ ލިވަޕޫލާއި، ޗެލްސީ އަދި ޓޮޓެންހަމް ހޮޓްސްޕާ މުބާރާތުގެ ސެމީ ފައިނަލަށް ދަތުރުކޮށްފިއެވެ.

ސެމީގެ ޖާގައެއް ލިވަޕޫލުން ހޯދީ އަމިއްލަ ދަނޑުގައި ކުޅުނު މެޗުން ފަހަތުން އަރައި ލެސްޓާ ސިޓީއާ 3-3 އިން އެއްވަރުކޮށް، ޕެނަލްޓީ ޖަހައިގެން 5-4 ގެ ނަތީޖާއަކުން މޮޅުވެގެންނެވެ.

ޒުވާން ގިނަ ކުޅުންތެރިންތަކެއް ހިމަނައިގެން މި މެޗަށް ލިވަޕޫލް ނުކުތްއިރު، މެޗު ފަށައިގެން 13 މިނެޓު ތެރޭ ލެސްޓާގެ ޖޭމީ ވާޑީ ވަނީ ދެ ލަނޑ ޖަހާފައެވެ. އަދި އޭގެ ހަ މިނެޓު ފަހުން އަލެކްސް އޮކްސްލޭޑް-ޗަމްބަލެއިންގެ ލަނޑުން ލިވަޕޫލުން ފަރަގު ކުޑަކުރި ނަމަވެސް، ފުރަތަމަ ހާފު ނިމުމުގެ ކުރިން ޖޭމްސް މެޑިސަން ވަނީ ލަނޑެއް ޖަހައި، ލެސްޓާގެ ލީޑު އަލުން ފުޅާކޮށްދީފައެވެ.

މި މެޗުގެ ދެވަނަ ހާފުގައި ލިވަޕޫލުން ބަދަލުތަކެއް ގެނައިރު، މެޗުގެ 68 ވަނަ މިނެޓުގައި ޑިއޯގޯ ޖޮޓާ ވަނީ އެ ޓީމަށް ފަރަގު ކުޑަކޮށްދީފައެވެ. އަދި މި މެޗުން ލިވަޕޫލް ސަލާމަތްވީ މެޗުގެ އިތުރު ވަގުތުގައި ޓަކޫމީ މިނަމީނޯ ކާމިޔާބުކޮށްދިން ލަނޑާއެކުއެވެ.

އެއާއެކު ނަތީޖާ ނެރުމަށް ޕެނަލްޓީ ޖެހިއިރު، ލިވަޕޫލުން ވަނީ އެ ޓީމުން ފޮނުވާލި ހަ ޕެނަލްޓީގެ ތެރެއިން ފަސް ޕެނަލްޓީ ކާމިޔާބުކޮށްފައެވެ. ލިވަޕޫލަށް ކާމިޔާބުނުވީ މިނަމީނޯގެ ޕެނަލްޓީއެވެ. އެގޮތުން އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑިމަތިން ބޭރަށެވެ. އެކަމަކު ޕެނަލްޓީ ޝޫޓްއައުޓުގައި ލިވަޕޫލުގެ ޒުވާން ގޯލްކީޕަރު ކޮއިމްހިން ކެލަހާ ވަނީ ލެސްޓާގެ ދެ ޕެނަލްޓީއެއް ހުއްޓުވާފައެވެ.

ދެން މި މުބާރާތުގެ ސެމީގެ ޖާގައެއް ޗެލްސީން ހޯދީ ރަށުން ބެރުގައި ކުޅުނު މެޗުން ބްރެންޓްފޯޑް އަތުން 2-0 ގެ ނަތީޖާއަކުން މޮޅުވެގެންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، މެޗުގައި ބްރެންޓްފޯޑް ކޮޅަށް ޗެލްސީން ދެ ލަނޑުވެސް ޖަހާފައިވަނީ މެޗުގެ ފަހު ވަގުތުގައެވެ. އެގޮތުން މެޗު ނިމެން 10 މިނެޓަށް ވެފައި ވަނިކޮށް ޗެލްސީން ލީޑު ނެގިއިރު، މި ލަނޑަކީ ބްރެންޓްފޯޑުގެ ޕޮންޓަސް ޖެންސަން އަތުން ބައިކޮޅަށް ވަން ލަނޑެކެވެ. އަދި އޭގެ ފަސް މިނެޓު ފަހުން ޗެލްސީގެ ޖޯޖީނިއޯ ވަނީ ލިބުނު ޕެނަލްޓީއެއް ކާމިޔާބުކޮށް، އެ ޓީމަށް ސެމީ ކަށަވަރުކޮށްދީފައެވެ.

މީގެ އިތުރުން ބުދަ ދުވަހުގެރޭ ކުޅުނު މެޗުގައި 2-1 ގެ ނަތީޖާއަކުން ވެސްޓް ހޭމް ޔުނައިޓެޑް ބަލިކޮށް ޓޮޓެންހަމް ހޮޓްސްޕާވެސް ވަނީ ސެމީގެ ޖާގައެއް ހޯދާފައެވެ. އެއާއެކު ސެމީގައި ޓޮޓެންހަމް ބައްދަލުކުރަން ޖެހޭނީ ޗެލްސީއާއެވެ. އަދި ސެމީގައި ލިވަޕޫލް ނުކުންނާނީ އާސެނަލާ ދެކޮޅަށެވެ.

މި މުބާރާތުގެ ސެމީއަށް އާސެނަލް ދަތުރުކޮށްފައިވަނީ އަންގާރަ ދުވަހުގެރޭ ކުޅުނު ކުއާޓާގެ މެޗުން ތިންވަނަ ޑިވިޝަނުގައި ވާދަކުރަމުން އަންނަ ސަންޑަލެންޑް އަތުން 5-1 ގެ ތަފާތު ބޮޑު ނަތީޖާއަކުން މޮޅުވެގެންނެވެ.