އިނގިރޭސިވިލާތުގައި ދިފާއީ ނިޒާމު ބަލިކަށި އުމުރުން 5 އަހާއި 11 އަހަރުގެ ކުދިންނަށް ވެކްސިން ދިނުމަށް ލަފާ ދީފި
މި އުމުރު ފުރައިގެ ހުރިހާ ކުދިންނަށް ވެކްސިން ދިނުމާއި މެދު އަދި ގޮތެއް ނުނިންމާ
އޮމިކްރޯން ވޭރިއަންޓާއި ގުޅިގެން އެފަދަ ކުދިންނަށް ވެކްސިން ދޭން ޖެހޭ ކަމަށް ވެކްސިން އެޑްވައިޒަރުން ވަނީ ބުނެފައި
އިނގިރޭސިވިލާތުގައި ދިފާއީ ނިޒާމު ބަލިކަށި 5 އަހަރާ 11 އަހަރުގެ އުމުރު ފުރާގެ ކުދިންނަށް ވެކްސިން ދިނުމަށް އެ ޤައުމުގެ ވެކްސިން އެޑްވައިޒަރުން ލަފާ ދީފިއެވެ.
އެމީހުން ބުނީ އޮމިކްރޯން ވޭރިއަންޓާއި ގުޅިގެން އެފަދަ ކުދިންނަށް ވެކްސިން ދޭން ޖެހެއެވެ. އެ އުމުރުގެ ކުދިންނަށް ވެކްސިންގެ ދަށް ޑޯޒެއް ދިނުމަށް އިނގިރޭސިވިލާތުން ވަނީ ހުއްދަ ދީފައެވެ. އެހެންނަމަވެސް އެ އުމުރުފުރައިގެ ހުރިހާ ކުދިންނަށް ވެކްސިން ދިނުމާއި މެދު އަދި ގޮތެއް ނުނިންމައެވެ.
ސައިންޓިފިކް އެކްސްޕާޓުން ދިން ލަފާ ބަލައިގެންފައިވާއިރު މި ކުދިންނަށް ވެކްސިން ދޭނެކަން އަދި ވަނީ ކަށަވަރު ނުވެފައެވެ. އެ ޤައުމުގައި މިހާރު އެންމެ އިސްކަމެއް ދީގެން ކުރާ މަސައްކަތަކީ އޮމިކްރޯން ވޭރިއަންޓް ފެނިފައިވާ މި ދަނޑިވަޅުގައި ބޮޑެތި މީހުންނަށް ބޫސްޓަރ ޑޯޒް ދިނުމެވެ.
ބޮޑެތި މީހުންނަށް ދޭ ވެކްސިނާއި އަޅާބަލާއިރު ފައިޒަރގެ ދަށް ޑޯޒް ވެކްސިންގައި ހިމެނެނީ ތިންބައި ކުޅަ އެއްބައި މިންވަރެވެ. މި ވެކްސިން އެހެން ޤައުމުތަކުގައި ވަރަށް ފުޅާކޮށް ބޭނުން ކުރަމުން ދާއިރު އެމެރިކާގައި އެކަނިވެސް 5 މިލިއަނަށްވުރެ ގިނަ ކުދިންނަށް ވެކްސިން ވަނީ ދީފައެވެ.
ކޮވިޑު ޖެހިގެން ކުޑަކުދިންނަށް ބޮޑަށް އަސަރު ކުރާ މިންވަރު ދަށްވެފައިވާއިރު އުމުރުން 12 އަހަރުން މަތީގެ ކުދިން ވެކްސިން ޖެހުމަށް އިނިގިރޭސިވިލާތުން ނިންމާފައިވަނީ ސްކޫލްތައް ހުޅުވުމަށް އެހީތެރިވުމުގެ ގޮތުންނެވެ.
މިދަނޑިވަޅުގައި ޤައުމުތަކުގައި އޮމިކްރޯން ވޭރިއަންޓް ފެތެރުމުން ދާއިރު ދުނިޔޭގެ 89 ގައުމަކުން މިހާތަނަށް އައިއިރު މި ވޭރިއަންޓް ފެނިފައި ވާކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)ން ވަނީ ބުނެފައެވެ. ޑަބްލިޔުއެޗްއޯއިން ބުނީ މިވޭރިއަންޓްގެ ނުރައްކާތެރިކަން ދެނެގަތުމަށް އަދިވެސް އިތުރު ޑާޓާތައް ބޭނުންވާ ކަމަށެވެ. އަދި މިވޭރިއަންޓްގެ މިޔުޓޭޝަންތަކުގެ ސަބަބުން، ވެކްސިނުން ކުރާ އަސަރު ކުޑަކުރޭތޯ ބެލުމަށް އިތުރު ދިރާސާތައް ކުރަމުންދާ ކަމަށެވެ.
މީގެ އިތުރުން ޑަބްލިޔުއެޗްއޯއިން ބުނީ، އޮމިކްރޯން ވޭރިއަންޓުގެ ކޭސްތައް މިލިއަނުން ފެނިދާނެ ކަމުގެ ބިރު އެބައޮތް ކަމަށާއި، ގައުމުތަކުގެ ސިއްހީ ނިޒާމުގައި ކެޕޭސިޓީ އިތުރުކުރަން ޖެހޭ ކަމަށެވެ. އަދި މިވޭރިއަންޓް ޖެހިގެން މަރުވާ މީހުންގެ އަދަދު އިތުރުވަމުން ދިޔުމަށް މަގުފަހިވެގެން ދާނެކަމަށް ޑަބްލިޔުއެޗްއޯއިން ބުނެއެވެ.
އޮމިކްރޯން ވޭރިއަންޓަކީ "ވޭރިއަންޓް އޮފް ކޮންސަރން"ގެ ގޮތުގައި ޑަބްލިޔުއެޗްއޯއިން ކަނޑައަޅާފައިވަނީ ނޮވެމްބަރ މަހުގެ 26 ވަނަ ދުވަހުއެވެ.
