އިނގިރޭސި ވިލާތުގެ ވައިގެ ދަތުރުފަތުރަށް ހޯމަދުވަހު ހުރަސް އެޅުނީ ސައިބަރ އެޓޭކެއްގެ ސަބަބުން ނޫން ކަމަށް އިނގިރޭސި ސަރުކާރުން ބުނެފިއެވެ.

އެގައުމުގެ ނެޝަނަލް އެއާ ޓްރެފިކް ސަރވިސަސްއަށް ދިމާވި މައްސަލައެއްގެ ސަބަބުން އެގައުމުން ހޯމަ ދުވަހު ފުރަން އަދި ޖައްސަން އޮތް ފްލައިޓްތަކުގެ ހަތަރުބައިކުޅަ އެއްބައިހާ ފްލައިޓްގެ ގަޑި އޮޅުނެވެ. ނަތީޖާއެއްގެ ގޮތުން ވަރަށް ގިނަ އަދަދެއްގެ ފްލައިޓް ކެންސަލްކޮށް، އަދި ރީޝެޑިއުލްކުރަން ޖެހިފައިވެއެވެ. މުޅި އަންގާރަ ދުވަހުވެސް ފްލައިޓްގެ ގަޑިތައް ހަމައަކަށް ނޭޅޭކަމަށް ޚަބަރުތައް ބުނެއެވެ.

އިނގިރޭސި ސިވިލް އޭވިއޭޝަން އޮތޯރިޓީގެ ތަރުޖަމާން އަންގާރަ ދުވަހު ބުނީ، މިކަމެއް ދިމާވީ ސައިބަރ އެޓޭކަކުން ނޫން ކަމުގައެވެ. އަދި ޕްރައިމިނިސްޓަރުގެ ރަސްމީ ތަރުޖަމާނުވެސް ވަނީ ސިވިލް އެވިއޭޝަން އޮތޯރިޓީން މައްސަލަ ތަހުގީގު ކުރުމަށްފަހު ސަރުކާރަށް ރިޕޯޓް ހުށަހަޅާނެ ކަމަށް ބުނެފައެވެ.

ފްލައިޓްތަކުގެ ގަޑިއޮޅި ކެންސަލްވާން ފެށުމުން އެތައްހާސް ބަޔަކު ވަނީ އެއާޕޯޓުތަކުގައި ބަންދުވެފައެވެ. ޓްރާންސްޕޯޓް ސެކްރެޓަރީ މާކް ހާޕަރ ވިދާޅުވީ މިމައްސަލަ ހައްލުވެ ހުރިހާކަމެއް ހަމަޔަކަށް އެޅެން އެތައް ދުވަހެއް ނަގާނެ ކަމުގައެވެ. މިފަދަ ކަމެއް މީގެ ކުރިން އެންމެ ފަހުން ދިމާވެފައިވަނީ މީގެ ދިހަވަރަކަށް އަހަރު ކުރިން ކަމަށް ވެއެވެ.

އެވިއޭޝަން ޑޭޓާ އެއްކުރާ ފަރމް ސިރިއަމްއިން ބުނެފައިވާގޮތުގައި، އަންގާރަ ދުވަހު 9 ޖަހަންވާއިރަށް 147 ޑިޕާޓިންގ ފްލައިޓުގެ އިތުރުން 134 އެރައިވަލްސް ވަނީ ކެންސަލް ކުރަން ޖެހިފައެވެ. އަދި ހޯމަ ދުވަހު 790 ޑިޕާޓިންގ ފްލައިޓާއި 785 އިންކަމިންގ ފްލައިޓް ކެންސަލް ކުރަން ޖެހިފައި ވެއެވެ.

ބޮޑުވަޒީރު ރިޝީ ސުނާކް ވިދާޅުވީ ޓްރާންސްޕޯޓް ސެކްރެޓަރީ ހާޕަރ ގެންދަވަނީ މެދުނުކެނޑި އިންޑަސްޓްރީގެ އެކި ފަރާތްތަކާ ގުޅުއްވަމުން ކަމަށާއި އަދި އެކި އެއާލައިންތަކާވެސް ވާހަކަދައްކަވަމުން ގެންދަވާކަމުގައެވެ.

ދުނިޔޭގެ އެންމެ ކާރޫބާރޫ ބޮޑު ދެ ރަންވޭ އޮންނަ ހީތުރޯ އެއާޕޯޓުން އަންގާރަ ދުވަހު ބުނީ، އޭރުވެސް އެމީހުންގެ ޝެޑިއުލް އަދިވެސް އޮތީ ވަރަށް ބޮޑަށް ހަމަ ގެއްލިފައިކަމަށެވެ. އަދި އީޒީ ޖެޓުންވެސް ބުނެފައިވަނީ ބައެއްފްލައިޓުތައް އޭރުވެސް އޮޕަރޭޓް ނުކުރެވޭކަމަށެވެ.

އިނގިރޭސި ވިލާތުގެ އެއާޓްރެފިކް ސަރިސަސްއަށް މައްސަލަޖެހި ފްލައިޓްތައް ތޮއްޖެހެން ދިމާވީ ހޯމަ ދުވަހު މެންދުރެއްހާއިރުއެވެ. އަދި ތިނެއް ޖަހާ އެހާކަންހާއިރު މައްސަލަ ފާހަގަކުރެވި، ރަނގަޅުކުރުމަށް މަސައްކަތް ކުރަމުންދާކަމަށް އެފަރާތުން ބުނެފައިވެއެވެ.