ހުސްވި އަހަރުގެ އޮކްޓޯބަރ މަހުގެ 7 ގައި ހަމާސް އިން އިޒްރޭލަށް ދިން ހަމަލާއަށް ތާއީދު ކޮށް، އެ ހަމަލާ އާ ގުޅިގެން ހުސްވި އަހަރު ބޭއްވި އެއްވުމެއްގައި، އެ ހަމަލާގެ ސަބަބުން އުފާވެރި އިހުސާސެއް ކުރެވޭ ކަމަށް ބުނި މައްސަލަ ތަހުގީގުކޮށް އިނގިރޭސިވިލާތުގައި ކިޔަވަމުންދާ ދަރިވަރެއްގެ ވިސާ ކެންސަލް ކޮށްލައިފިއެވެ.
އުމުރުން 19 އަހަރުގެ ދާނާ އަބޫގަމަރު އަލްޖަޒީރާއާ ވާހަކަ ދައްކަމުން ބުނެފައިވަނީ، އޭނާގެ ވިސާ އިނގިރޭސި ވިލާތުގެ ހޯމް އޮފީހުން ބާތިލް ކުރީ އޭނާއަކީ ގައުމީ ސަލާމަތައް ހުރި ނުރައްކަލެއް ކަމަށް ބުނެއެވެ.
ވިސާ ކެންސަލް ކުރި ދަރިވަރަކީ އޭނާ ކިޔަވަމުންދާ މެންޗެސްޓަރ ޔުނިވަރސިޓީގެ ފްރެންޑްސް އޮފް ޕެލެސްޓައިން ސޮސައިޓީގައި އިސްކޮށް ހަރަކާތްތެރިވާ ދަރިވަރެވެ.
ދާނާ އަބޫގަމަރު ބުނި ގޮތުގައި ޚިޔާލު ފާޅު ކުރުމުގެ މިނިވަންކަމަކީ އަސާސީ އިންސާނެއް ހައްގެއް ކަމަށް އެންމެވެސް ގަބޫލު ކުރާކަމަށާއި ނަމަވެސް އެހައްގަކީ މުސްލިމުންނަށާއި ފަލަސްތީންގެ ރައްޔިތުންނަށް އޮންނަ އެއްޗެއް ނޫން ކަން ހާމަވެއްޖެ ކަމުގައެވެ.
ދާނާ އަބޫގަމަރުގެ އާއިލާއަށް ނިސްބަތްވާ 15 މެމްބަރުން އިޒްރޭލުން ގާޒާއަށް ދިން ހަމަލާތަކުގައި މަރުވެފައިވާ ކަމަށް އޭނާ ބުނެއެވެ.
ދާނާގެ ވިސާ ކެންސަލް ކޮށްލީ ލޯ ޑިގުރީ ކޯހުގެ ފަހު އަހަރުގެ ކިޔެވުން ކުރިއަށް ގެންދަނިކޮށްނެވެ.
