ފައިޒަރގެ ކޮވިޑް ޕިލް، އިމަރޖެންސީކޮށް ބޭނުންކުރުމުގެ ހުއްދަ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)އިން ދީފިއެވެ.

ޕެކްސްލޮވިޑް ނަމަކަށް ކިޔާ މި ގުޅަ ބޭސް ބޭނުންކުރުމުގެ ހުއްދަ ދީފައިވަނީ ބޮޑެތި މީހުންނަށާއި އުމުރުން 12 އަހަރުގެ ކުދިންނަށާއި ހައި ރިސްކް މީހުންނަށެވެ.

އެފްޑީއޭއިން ބުނީ މި އެޅުނު ވަރަށް ބޮޑު ފިޔަވަޅެއް ކަމަށެވެ. މި ކޮވިޑް ޕިލްއަކީ ކޮވިޑުން ދިފާއުވުމަށް ބޭނުންކުރާ ވެކްސިނަކަށް ނުވާއިރު، މިއީ ހައިރިސްކް މީހުންނަށް ފަރުވާ ފޯރުކޮށްދިނުމުގައި އެހީތެރިވެދޭނެ ގުޅަ ބޭހެކެވެ.

އޮމިކްރޯން ވޭރިއަން ފެތުރިފައިވާ މި ދަނޑިވަޅުގައި، މި ބޭހާއެކު ފަރުވާ ފޯރުކޮށްދިނުމުގައި އިތުރަށް ފަސޭހަވެގެންދާއިރު، މީގެ މި ބޭސްގުޅައިގެ ސަޕްލައި ކުރާނީ ވަކި މިންވަރަކަށްކަމަށް ކަމާގުޅޭ މާހިރުން ލަފާ ކުރެއެވެ.

ފައިޒަރގެ ސީއީއޯ އެލްބާޓް ބުދަ ދުވަހު ނެރުއްވި ބަޔާނެއްގައި ވިދާޅުވީ، އެ ކުންފުނިން މި ގުޅަ ބޭސް އެމެރިކާއަށް ފޯރުކޮށްދިނުމުގެ ކަންތައްތައް ވަރަށް އަވަހަށް ފަށަން ތައްޔާރު ކަމަށެވެ. ފަރުވާ ހޯދާ މީހުންގެ ތެރެއިން މީހުން އެނދުމަތި ކުރެވޭ މިންވަރާއި މަރުވާ މިންވަރު، މި ބޭހުގެ ސަބަބުން ދަށްކޮށްދޭނެ ކަމަށް ވެސް އޭނާ ވިދާޅުވިއެވެ. އަދި ސިއްހީ ޚިދުމަތްތެރިންނަށާއި ސިއްހީ ނިޒާމަށް ދިމާވެފައިވާ ކަންތައްތަކުގައި އަރައިގަތުމަށް ވެސް އެހީތެރިވެދޭނެ ކަމަށް އެލްބާޓް ވިދާޅުވިއެވެ.

ފައިޒަރ ކުންފުނިން ހެދި ދިރާސާއެއްގައި ބުނެފައިވަނީ ހައި ރިސްކް މީހުން އެނދުމަތި ކުރުމުންނާއި، މަރުވުމުން ސަލާމަތްކުރުމަށް، 89 އިންސައްތަ، މި ބޭސް އެހީތެރިވެދޭނެ ކަމަށެވެ.

މި ބޭސް ޖުމްލަ 30 ފަހަރު ބޭނުންކުރަން ޖެހެއެވެ. އެއީ ކޮންމެ ދުވަހަކަށް ތިން ގުޅަ، ފަސް ދުވަސްވަންދެންނެވެ. އެޗްއައިވީ ހުންނަ މީހުންނާއި ހަށިގަނޑުގެ ގުނަވަން ޓްރާންސްޕާންޓް ކޮށްފައިވާ މީހުން މި ބޭސް ބޭނުންކުރުން ރަނގަޅު ނޫން ކަމަށް ވެސް ފައިޒަރ ކުންފުނިން ބުންޏެވެ.

މީގެ އިތުރުން އޮމިކްރޯން ވޭރިއަންޓާ ދެކޮޅަށް ވެސް މި ބޭސް މަސައްކަތް ކުރާނެ ކަމަށް ވަނީ ބުނެފައެވެ.