ގައުމީ ފުޓުބޯޅަ ޓީމުގެ އެސިސްޓަންޓް ކޯޗުގެ މަގާމަށް ޕޯޗުގަލުގެ ކޯޗު ސިމާއޯ ކޮސްޓާ ހަމަޖައްސައިފިއެވެ.

އުމުރުން 46 އަހަރުގެ ކޮސްޓާ އަކީ ކުރިން ޕޯޗުގަލުގެ ކުލަބުތަކުގައި މިޑްފީލްޑަރަކަށް ކުޅުނު ކުޅުންތެރިއެކެވެ. އޭގެ ފަހުން ދެކުނު ކޮރެއާގެ ޑައިޖިއަން ސިޓިޒަންގައި ކޯޗިންގެ މަސައްކަތްތަކެއްވެސް ކުރި ކޮސްޓާ އެންމެ ފަހުން ހަވާލުވެހުރީ ސްވިޓްޒަލެންޑުގެ ކުލަބެއް ކަމަށްވާ ބެރޯޝް-ގޯޖިއާއާއެވެ.

ކޮސްޓާއަށް އެންމެ ފުރަތަމަ ރާއްޖޭގެ ގައުމީ ޓީމުގެ އެސިސްޓެންޓް ކޯޗުގެ މަގާމު ހުށަހަޅާފައިވަނީ މިދިޔަ ސެޕްޓެމްބަރު މަހުގެ ތެރޭގައެވެ. އެއީ ގައުމީ ކޯޗުގެ މަގާމަށް އިޓަލީގެ ކޯޗު ފްރެންސެސްކޯ މޮރިއޭރޯ ހަމަޖެއްސުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މަޝްވަރާކުރިއިރުއެވެ. އެކަމަކު އޭރު ސީޒަނުގެ މެދުތެރެއިން ބެރޯޝް-ގޯޖިއާ ދޫކޮށްލަން ބޭނުން ނުވާތީ ކޮސްޓާ އެ ހުށަހެޅުން ބަލައިގެންފައެއް ނުވެއެވެ. އެއަށްފަހު އޭނާ ރާއްޖޭގެ ގައުމީ ޓީމުގެ ވަޒީފާއާ ހަވާލުވީ ބެރޯޝް-ގޯޖިއާއަށް ސީޒަން ނިމުމުންނެވެ.

އަންގާރަ ދުވަހު އިންސްޓަގްރާމުގައި ކުރި ޕޯސްޓެއްގައި ކޮސްޓާ ވަނީ ރާއްޖޭގެ ގައުމީ ޓީމުގެ އެސިސްޓަންޓް ކޯޗުގެ ފުރުސަތު ހޯދައިދޭން މަސައްކަތްކޮށްދިން އެންމެނަށް ޝުކުރުއަދާކޮށްފައެވެ.

އެފްއޭއެމުން މައުލޫމާތުދޭ ގޮތުން މޮރިއޭރޯގެ އެސިސްޓަންޓެއްގެ ގޮތުގައި ކޮސްޓާ ހަމަޖެއްސައި، އެއްބަސްވުން ފައިނަލްކުރުމުގެ މަސައްކަތް މިހާރު އަންނަނީ ކުރަމުންނެވެ. އަދި ކޮސްޓާގެ އިތުރުން މިހާރު ގައުމީ ޓީމުގެ އެސިސްޓަންޓް ކޯޗަކަށް ހުރި އަލީ ސުޒޭނުވެސް އެ މަގާމުގައި ދެމި ހުންނާނެ ކަމަށް އެފްއޭއެމުން މައުލޫމާތުދެއެވެ.

މި އަހަރުގެ އޮކްޓޯބަރު މަހުގެ ތެރޭގައި ގައުމީ ޓީމުގެ ކޯޗުގެ މަގާމާ މޮރިއޭރޯ ހަވާލުވިއިރު، އޭނާ ވެގެންގޮސްފައިވަނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭ ތިންވަނަ ކޯޗަށެވެ. އެގޮތުން މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ބޭއްވި "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ ސުޒޭނެވެ.

މޮރިއޭރޯގެ އިރުޝާދުގެ ދަށުން ގައުމީ ޓީމު ކުޅުން ފުރަތަމަ މުބާރާތަކީ ސްރީ ލަންކާގައި މިދިޔަ މަހު ބޭއްވި މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އެވެ. އެކަމަކު އެ މުބާރާތުގެ ފައިނަލަށް ނުގޮސް ރާއްޖެ ކެޓިއިރު، އެ މުބާރާތުގައި ރާއްޖެ އެއްވެސް މެޗަކުން މޮޅުވެފައެއް ނުވެއެވެ.