އެންޓި ކޮރަޕްޝަން ކޮމިޝަން (އޭސީސީ) ގެ މެމްބަރުން އުސޫލާ ޚިލާފަށް ކަންކަން ކުރާތީ މިނިވަން މުއައްސަސާތަކުގެ ކޮމިޓީން އެ މައްސަލަ ބަލަން ނިންމައިފިއެވެ.

މި މައްސަލަ ބަލައި ގޮތެއް ނިންމުމަށް ބުދަ ދުވަހުގެ ރޭ ކޮމިޓީ ބައްދަލުވުމެއް ވަނީ ތާވަލްކޮށްފައެވެ. އޭސީސީގެ މެމްބަރުން މަގާމުން ވަކި ކުރުމަށް ކޮމިޓީން ނިންމައި ޖަވާބުދާރީ ވުމަށް 5 ދުވަހުގެ މުއްދަތު މި މަހުގެ 16 ވަނަ ދުވަހު ދީފައިވަނިކޮށް އުސޫލާ ޚިލާފަށް ކަންކަން ކުރަމުން އަންނަ ކަމުގެ މައުލޫމާތު ކޮމިޓީއަށް ލިބިފައިވާ ކަމަށް ކޮމިޓީން ބުނެއެވެ. އެހެންކަމުން މި މައްސަލަ ބެލުމަށް ކޮމިޓީގެ 3 މެމްބަރަކު ސޮއިކޮށް ސިޓީއެއް ފޮނުވާފައިވާތީ އެކަން ބެލުމަށް ކޮމިޓީންވަނީ ނިންމާފައެވެ.

އޭސީސީގެ މެމްބަރުން ވަކިކުރަން ކޮމިޓީން ނިންމާފައިވަނީ، ޕާރފޯމަންސް އޮޑިޓުން އޭސީސީގެ މެންބަރުންނަށް ގާނޫނުގައި ބުނާ މިންވަރަށް އަދި ކޮމިޓީގައި އެކޮމިޝަންގެ މެންބަރުން އެއްބަސްވެފައިވާ މިންވަރަށް ޕާރފޯމަންސް ދެއްކިފައި ނުވާތީއެވެ.

އެހެންކަމުން އޭސީސީގައި މިވަގުތު ތިއްބެވި މެންބަރުންނަށް ޖަވާބުދާރީވުމަށް ފުރުސަތެއް ދިނުމަށްފަހު ކޮމިޓީގެ ނިންމުން ތަޅުމަށް ފޮނުވުމަށް ކޮމިޓީން ވަނީ ނިންމާފައެވެ. މެމްބަރުން ވިދާޅުވީ، މިއީ މިގޮތަށް މުޅި ކޮމިޝަން ވަކިކުރުމަށް ހުށަހެޅިގެންދާ ފުރަތަމަ ފަހަރު ކަމަށްވުމާއި، މީގެ ކުރިން އޭސީސީގެ މެމްބަރުން ކޮމިޓީއަށް ހާޒިރުކޮށް ޖަވާބުދާރީ ކުރެވިފައިވަނީ އެ ކޮޝަންގެ މަސައްކަތްތަކާ ގުޅޭ ގޮތުން ކަމަށްވާތީ ޖަވާބުދާރީވުމަށް ފުރުސަތުދޭން ފެންނަ ކަމަށެވެ.

އެއާއެކު ފަސް ދުވަހުގެ މުއްދަތުގައި ލިޔުމުން ޖަވާބުދާރީވުމަށް ފުރުސަތު ދެއްވުމަށް ކޮމިޓީން ފާސް ކުރީ 5 މެމްބަރުންގެ ވޯޓުންނެވެ.