ކަލިއަރީ ބަލިކޮށް ޔުވެންޓަސް ކުރިއަށް

އިޓާލިއަން ލީގުގައި އަންގާރަ ދުވަހުގެރޭ ކުޅުނު މެޗުގައި ކަލިއަރީ ބަލިކޮށް ތާވަލުގެ ފަސްވަނައަށް ޔުވެންޓަސް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ ކަލިއަރީ އަތުން 2-0 ގެ ނަތީޖާއަކުންނެވެ.

މި މެޗު ފަށައިގެން ޔުވެންޓަސްއިން ގިނަ ހަމަލާތަކެއް އުފެއްދިއިރު، ފުރަތަމަ ހާފުގައި އެ ޓީމުގެ މޮއިސް ކީން ބޮލުން ފޮނުވާލި ނުރައްކާތެރި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އެކަމަކު ފުރަތަމަ ހާފު ނިމުމުގެ ކުރިން ޔުވެންޓަސްއިން ވަނީ ލީޑު ނަގާފައެވެ. މި ހާފު ނިމެން ފަސް މިނެޓަށް ވެފައި ވަނިކޮށް ފެޑެރީކޯ ބެނަޑެސްކީގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ކީންއެވެ.

މި މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގެ ކުރީކޮޅު ކަލިއަރީގެ ޑަލްބާޓަށް ވަނީ ހުސް ފުރުސަތެއް ލިބިފައެވެ. އެކަމަކު ހުހަށްހުރެ އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އެއާއެކު މެޗު ހަތް މިނެޓަށް ވެފައި ވަނިކޮށް އޭރިއާ ތެރެއިން ފޮނުވާލި ހަމަލާއަކުން ބެނަޑެސްކީ ވަނީ ލަނޑެއް ޖަހައި، ޔުވެންޓަސްގެ ލީޑު ފުޅާކޮށްދީފައެވެ. މިއީ މިދިޔަ 60 މެޗުގައި ބެނަޑެސްކީ ކާމިޔާބުކުރި ފުރަތަމަ ލަނޑެވެ.

މި މެޗުން ޔުވެންޓަސް މޮޅުވިއިރު، އެންމެ ފަހުން ކުޅުނު ފަސް މެޗުގެ ތެރެއިން ހަތަރު މެޗުން އެ ޓީމު ވަނީ މޮޅުވެފައެވެ. އަދި މި ފަސް މެޗުގައި ޔުވެންޓަސްގެ ކޮޅަށް ވަދެފައިވަނީ އެންމެ ލަނޑެކެވެ. މި ނަތީޖާއާއެކު ތާވަލުގެ ފަސްވަނައަށް ޔުވެންޓަސް ޖެހިލިއިރު، އެ ޓީމަށް ވަނީ ކުޅުނު 19 މެޗުން 34 ޕޮއިންޓް ލިބިފައެވެ. އަދި ތާވަލުގެ ހަވަނައިގައި އޮތް ރޯމާ އާއި ހަތްވަނައިގައި އޮތް ފިއޮރެންޓީނާއަށް 18 މެޗުން ލިބިފައިވަނީ 31 ޕޮއިންޓެވެ.