އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން މީގެ ކުރިން ތާވަލުގެ ދެވަނައިގައި އޮތް އޭސީ މިލާން ބަލިކޮށް ތާވަލުގެ ދެވަނައަށް ނާޕޮލީ ޖެހިލައިފިއެވެ.

މިލާނުގެ ދަނޑުގައި ކުޅުނު މެޗުން ނާޕޮލީ މޮޅުވީ 1-0 ގެ ނަތީޖާއަކުންނެވެ. މިއީ އެންމެ ފަހުން ކުޅުނު ހަތަރު މެޗުގެ ތެރެއިން ނާޕޮލީއަށް ލިބުނު ފުރަތަމަ މޮޅެވެ. 

މި މެޗުގައި ނާޕޮލީން ޖެހި ހަމައެކަނި ލަނޑު ފެނިގެންގޮސްފައިވަނީ މެޗު ފަށައިގެން ފަސްވަނަ މިނެޓުގައެވެ. ޕިއޮޓްރޭ ޒިއެލީންސްކީ ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ އެލިފް އެލްމާސްއެވެ. އޭގެ ފަހުން ނަތީޖާ އެއްވަރުކުރަން ފުރަތަމަ ހާފުގައި ޒްލަޓާން އިބްރަހިމޮވިޗަށް ރަނގަޅު ފުރުސަތެއް ލިބުނު ނަމަވެސް، އޭނާ ބޮލުން ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ. އަދި އޭގެ ފަހުން އޭރިއާ ބޭރުން މިލާނުގެ އަލެސަންދްރޯ ފްލޮރެންޒީ ފޮނުވާލި ބާރު ހަމަލާއެއްވެސް ދިޔައީ ގޯލުގެ އަރިމަތީ ދަަނޑި ކައިރިން ބޭރަށެވެ.

މި މެޗުގެ ދެވަނަ ހާފުގައިވެސް މިލާނުން ގިނަ ހަމަލާތަކެއް އުފެއްދިއިރު، މި ހާފުގެ ކުރީކޮޅު އެ ޓީމުގެ އިބްރަހިމޮވިޗް ފޮނުވާލި ހަމަލާއެއް ނާޕޮލީގެ ގޯލްކީޕަރު ޑޭވިޑް އޮސްޕީނާ ވަނީ ދިފާއުކޮށްފައެވެ. އަދި މެޗުގެ އިތުރު ވަގުތުގައި މިލާނުގެ ފްރޭންކް ކެސިއޭ ލަނދެއް ޖެހި ނަމަވެސް، އޭގެ ކުރިން އެ ޓީމުގެ އޮލިވިއޭ ޖިރޫޑް އޮފްސައިޑް މަގާމެއްގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ.

މި މޮޅާއެކު ތާވަލުގެ ދެވަނައަށް ނާޕޮލީ ޖެހިލީ ޕޮއިންޓުގެ ގޮތުން މިލާނާ އެއްވަރު ކޮށްގެންނެވެ. އެގޮތުން ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން އިންޓަ މިލާނަށް ކުޅުނި 18 މެޗުން 43 ޕޮއިންޓް ލިބިފައިވާއިރު، ދެވަނައިގައި އޮތް ނާޕޮލީ އާއި ތިންވަނައިގައި އޮތް މިލާނަށް ވަނީ 18 މެޗުން 39 ޕޮއިންޓް ލިބިފައެވެ.