ލިވަޕޫލާއި ޗެލްސީ އެއްވަރު، ސިޓީއަށް ލީޑެއް

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކުޅުނު މެޗުތަކުން ލިވަޕޫލާއި ޗެލްސީ އެއްވަރުވިއިރު، ނިއުކާސަލް ޔުނައިޓެޑް ބަލިކޮށް އެންމެ ފަހުގެ ޗެމްޕިއަން މެންޗެސްޓާ ސިޓީން ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން ލިވަޕޫލް އެއްވަރުވީ ޓޮޓެންހަމް ހޮޓްސްޕާއާ ވާދަކޮށް 2-2 ގެ ނަތީޖާއަކުންނެވެ.

މި މެޗު ފަށައިގެން 13 ވަނަ މިނެޓުގައި ހެރީ ކޭން ވަނީ ޓޮޓެންހަމަށް ލީޑު ނަގައިދީފައެވެ. އޭގެ ފަހުން ލިވަޕޫލުގެ އެންޑީ ރޮބަޓްސަނަށް ކޭން ކުރި ނުރައްކާތެރި ފައުލަކަށް އޭނާއަށް ރީނދޫ ކާޑެއް ދެއްކި ނަމަވެސް، ލިވަޕޫލުގެ ކުޅުންތެރިން ވަނީ ކޭނަށް ރަތް ކާޑެއް ދައްކަން ޖެހޭ ކަމަށް އެޕީލްކޮށްފައެވެ.

މި މެޗުގައި ލިވަޕޫލުން ނަތީޖާ އެއްވަރުކޮށްފައިވަނީ މެޗުގެ 35 ވަނަ މިނެޓުގައެވެ. ރޮބަޓްސަން ނެގި ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑިއޯގޯ ޖޮޓާއެވެ. އަދި 69 ވަނަ މިނެޓުގައި ޓްރެންޓް އަލެކްސަންޑަ-އާނޯލްޑްގެ އެހީތެރިކަމާއެކު ރޮބަޓްސަން ވަނީ ލަނޑެއް ޖަހައި، ލިވަޕޫލަށް ލީޑު ނަގައިދީފައެވެ. އެކަމަކު އޭގެ ހަތަރު މިނެޓު ފަހުން ލިވަޕޫލުގެ ގޯލްކީޕަރު އެލިސަން ބެކާއަށް ހެދުނު ގޯހެއްގެ ފައިދާނަގައި ސޮން ހެއުން-މިން ވަނީ ޓޮޓެންހަމަށް ނަތީޖާ އެއްވަރުކޮށްދީފައެވެ.

މި މެޗުގެ 77 ވަނަ މިނިޓްގައި ޓޮޓެންހަމުގެ އެމާސަންއަށް ކުރި ފައުލަކަށް ރޮބަޓްސަނަށް އެންމެ ފުރަތަމަ ރީނދޫ ކާޑެއް ދެއްކި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ވަނީ އޭނާއަށް ސީދާ ރަތް ކާޑެއް ދައްކާފައެވެ.

މި މެޗުން ލިވަޕޫލް އެއްވަރުވިއިރު، ލީގުގައި އާދީއްތަ ދުވަހުގެރޭ ޗެލްސީ އާއި ވުލްވްސް ބައްދަލުކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. އެއާއެކު ރަށުން ބޭރުގައި ކުޅުނު މެޗުން 4-0 ގެ ނަތީޖާއަކުން ނިއުކާސަލް ބަލިކޮށް ސިޓީން ތާވަލުގެ އެއްވަނައިގައި ތިން ޕޮއިންޓުގެ ލީޑެއް ނަގާފައެވެ.

މި މެޗުގައި ސިޓީން މޮޅު ކުޅުމެއް ދެއްކިއިރު، މެޗު ފަށައިގެން ފަސްވަނަ މިނެޓުގައި ރުބެން ޑިއާޒް ވަނީ އެ ޓީމަށް ލީޑު ނަގައިދީފައެވެ. އަދި މެޗުގެ 27 ވަނަ މިނެޓުގައި ސިޓީން ލީޑު ފުޅާކުރިއިރު، އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޖޮއާއޯ ކަންސޭލޯއެވެ. ދެން މި މެޗުގައި ސިޓީން ކާމިޔާބުކުރި އަނެއް ދެ ލަނޑު ދެވަނަ ހާފުގައި ޖަހައިދިނީ ރިޔާދު މާރޭޒް އާއި ރަހީމް ސްޓާލިންއެވެ.

މި މެޗުން ސިޓީ މޮޅުވިއިރު، އެ ޓީމުން ވަނީ މި މެޗުގައި ދެ ރިކޯޑެއް ހަދާފައެވެ. އެގޮތުން ލީގުގައި އެއް އަހަރު ތެރޭ އެންމެ ގިނަ މޮޅު ހޯދައިން 1983 ވަނަ އަހަރު 33 މޮޅާއެކު ލިވަޕޫލުން ހެދި ރިކޯޑު ސިޓީން މުގުރާލިއިރު، ސިޓީން ވަނީ މި އަހަރު 106 ލަނޑު ޖަހައި އަހަރެއްގެ ތެރޭ އެންމެ ގިނަ ލަނޑު ޖަހައިގެން އެ ޓީމުން ހަދާފައިވާ އަމިއްލަ ރިކޯޑު އާކޮށްފައެވެ.

އާދީއްތަ ދުވަހުގެރޭގެ ނަތީޖާތަކަށްފަހު ތާވަލުގެ އެއްވަނައިގައި ސިޓީން ތިން ޕޮއިންޓުގެ ލީޑެއް ނެގިއިރު، އެ ޓީމަށް ކުޅުނު 18 މެޗުން ވަނީ 44 ޕޮއިންޓް ލިބިފައެވެ. އަދި ދެވަނައިގައި އޮތް ލިވަޕޫލަށް 18 މެޗުން 41 ޕޮއިންޓް ލިބިފައިވާއިރު، ތިންވަނައިގައި އޮތް ޗެލްސީއަށް 18 މެޗުން ލިބިފައިވަނީ 38 ޕޮއިންޓެވެ.