އިންޑިއާ އައުޓް ކެމްޕެއިނަކީ ކުރީ ސަރުކާރުން ހިންގާފައިވާ ކޮރަޕްޝަންގެ ކަންކަމުގައި މަތިޖެހުމުގެ ޖަރީމާއެއް: ނާޒިމް

އިދިކޮޅު ޕީޕީއެމް ޕީއެންސީ ކޯލިޝަނުން ކުރިއަށްގެންދާ އިންޑިއާ އައުޓް ކެމްޕެއިނާ އެމްއެންޕީއިން ދެކޮޅުކަން ހާމަކޮށްފިއެވެ.

އާދިއްތަ ދުވަހު އެމްއެންޕީއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޕާޓީގެ ރައީސް ކާނަލް ރިޓަޔަރޑް މުހައްމަދު ނާޒިމް ވިދާޅުވީ މިއީ ރާއްޖޭގެ މުޅި އިޤްތިޞާދު ފުނޑާލުމަށްޓަކައި ބަޔަކު ސިޔާސީ ބޭނުމެއްގައި ކުރާ މަސައްކަތެއް ކަމަށެވެ. ލީޑަރެއްގެ އަމިއްލަ ބޭނުމަކަށްޓަކައި ގައުމު ފުނޑާނުލުމަށް ނާޒިމް ވަނީ އިލްތިމާސްކުރައްވާފައެވެ. އަދި އިންޑިއާ އައުޓް ކެމްޕެއިނަކީ ގައުމީ ކެމްޕެއިނެއް ނޫން ކަމަށް ނާޒިމް ވިދާޅުވިއެވެ. އެއީ ރައީސް ޔާމީންގެ ސަރުކާރުގައި ހިންގާފައި ހުރި ކޮރަޕްޝަންގެ ކަންކަން މަތި ޖެހުމުގެ ނިޔަތުގައި ހިންގާ ޖަރީމާއެއް ކަމަށް ނާޒިމް ވިދާޅުވިއެވެ.

ނާޒިމް ވިދާޅުވީ އެމްއެންޕީގެ ސަރުކާރެއްގައި ރައްޔިތުން ނޭދޭ ބަޔަކަށް މި ގައުމުގައި ތިބުމުގެ ފުރުސަތެއް ނޯންނާނެ ކަމަށެވެ. އެހެންނަމަވެސް ހުރިހާ ގައުމެއްގެ ބަޔަކާ އެކުވެސް މަސައްކަތްކުރުމުގެ ފުރުސަތު އޮންނަންވާނެ ކަމަށް ނާޒިމް ވިދާޅުވިއެވެ. ޚާރިޖީ ސިޔާސަތު އޮންނަން ވާނީ ވަކި ބަޔަކަށް ބަރޯސާވެގެން ނޫން ކަމަށް ނާޒިމް ވިދާޅުވިއެވެ. އެހެންކަމުން ސިޔާސީ ލީޑަރުންގެ މަންފާއަށް ރައްޔިތުން ނިކަމެތި ނުކުރުމަށް ނާޒިމް އެދިވަޑައިގެންނެވިއެވެ. އަދި ރައްޔިތުން ވެސް އެކަންކަމަށް އެއްބާރުލުން ނުދިނުމަށް ނާޒިމް ގޮވައިލެއްވިއެވެ.

ރައީސް ޔާމީން ޖަލު ބަންދުން މިނިވަންވެވަޑައިގެން ފަހުން އިންޑިއާ އައުޓްގެ ނަމުގައި އިދިކޮޅު ކޯލިޝަނުން ކުރިއަށްގެންދާ ކެމްޕެއިން ވަނީ އިތުރަށް ވަރުގަދަކޮށްފައެވެ. އެމަނިކުފާނު އިސްވެ ހުންނަވައި، އަތޮޅުތެރެއަށް ވެސް ދަތުރުކުރައްވާފައިވާއިރު، އަތޮޅުތެރޭގައި މި ކެމްޕެއިން ފުޅާކުރުމުގެ މަސައްކަތްތައް މިހާރުވެސް ކުރިއަށްދެއެވެ. އަދި މާލޭގައި ވެސް މި ކެމްޕެއިންތައް ކުރިއަށްދެއެވެ.

މިކަމާ ގުޅިގެން ދިވެހި ސަރުކާރުން ބުނަމުންގެންދަނީ މިއީ ރާއްޖެއާއި އިންޑިއާއާ ދެމެދު އޮތް ގާތް ގުޅުމަށް ބުރޫ އެރުވުމަށް ކުރިއަށްގެންދާ ކެމްޕެއިނެއް ކަމަށެވެ. އަދި އިންޑިއާ އައުޓޭ ނުބުނެވޭނެ ކަމަށް ވެސް ސަރުކާރުން ގެންދަނީ ބުނަމުންނެވެ.