މި މަހުގެ 18 ވަނަ ދުވަހު ރެކޯޑު އަދަދަކަށް ފަތުރުވެރިން އައިސްފައިވާކަމަށް ޓުއަރިޒަމް މިނިސްޓްރީން ބުނެފިއެވެ.

ޓުއަރިޒަމް މިނިސްޓްރީން ބުނީ ބޯޑަރު ހުޅުވާލި ފަހުން އެއް ދުވަހެއްގައި ގިނަ އަދަދެއްގެ ފަތުރުވެރިން އައިސް އަނެއްކާވެސް ރެކޯޑެއް ހަދާފައިވާކަމަށެވެ. މި މަހުގެ 18 ވަނަ ދުވަހު 6،955 ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ.

އެއް ދުވަހެއްގެ މައްޗަށް ގިނަ އަދަދެއްގެ ފަތުރުވެރިން އައިސް އެންމެ ފަހުން ރެކޯޑެއް ހެދީ މި ޑިސެމްބަރު މަހުގެ 5 ވަނަ ދުވަހުއެވެ. އެ ދުވަހު 6،269 ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ.

ސަރުކާރުން މަސައްކަތްކުރަމުންދަނީ މި އަހަރު ނިމުމުގެ ކުރިން 1.3 މިލިއަން ފަތުރުވެރިން ރާއްޖެ ގެނައުމަށެވެ. މި އަހަރު ނިމުމުގެ ކުރިން 1.3 މިލިއަން ފަތުރުވެރިން ގެނެވޭނެ ކަމުގެ ޔަގީންކަން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވަނީ ދެއްވާފައެވެ.

މީގެ އިތުރުން މި އަހަރުގެ މިހާތަނަށް 10.7 މިލިއަން ބެޑްނައިޓް ހަމަކޮށްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. އެއީ 2019 ވަނަ އަހަރުގައި ރާއްޖޭގެ ބެޑްނައިޓް ހުރި މިންވަރެވެ. މިހާރު މިވަނީ އެ ރެކޯޑު މުގުރާލައި، 11 މިލިއަން ބެޑްނައިޓްގެ އަމާޒަށް ވާސިލްވުމަށް މަސައްކަތް ފަށާފައެވެ.

ކޮވިޑް-19އާއެކު ރާއްޖޭގެ ފަތުރުވެރިކަމުގެ ރިކަވަރީއަށް ކުރި މަސައްކަތުގައި ރާއްޖެއިން ވަނީ އަހަރަކަށްވުރެ އަހަރެއް ކުރިއަރައިދިއުމަށް އަމާޒުތައް ކަނޑައަޅާފައެވެ. މި އަމާޒުތަކާއެކު ކުރި މަސައްކަތުން ރާއްޖެއިން ވަނީ ވިދިވިދިގެން ދެއަހަރު ވޯލްޑް ޓްރެވަލް އެވޯޑްސްއިން ދޭ "ވޯލްޑް ލީޑިންގ ޑެސްޓިނޭޝަން" އެވޯޑު ވެސް ކާމިޔާބުކޮށްފައެވެ.