ބޮލޯނިއާ އަތުން ޔުވެންޓަސްއަށް މުހިންމު މޮޅެއް

އިޓާލިއަން ލީގުގައި ހޮނިހިރު ދުުވަހުގެރޭ ކުޅުނު މެޗުން ބޮލޯނިއާ އަތުން ޔުވެންޓަސް މުހިންމު މޮޅެއް ހޯދައިފިއެވެ.

ރަށުން ބޭރުގައި ކުޅުނު މެޗުން ޔުވެންޓަސް މޮޅުވީ ބޮލޯނިއާ އަތުން 2-0 ގެ ނަތީޖާއަކުންނެވެ.

މި މެޗުގައި ޔުވެންޓަސްއިން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ހަވަނަ މިނެޓުގައި ފެޑެރީކޯ ބެނަޑެސްކީ ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ އަލްވާރޯ މޮރާޓާއެވެ. އޭގެ ފަހުން ފުރަތަމަ ހާފުގައި ލީޑު ފުޅާކުރަން ޔުވެންޓަސްގެ އޭޑްރިއަން ރަބިއޯއަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ.

މި މެޗުގެ ދެވަނަ ހާފުގައި ބޮލޯނިއާއިންވެސް ރަނގަޅު ފުރުސަތުތަކެއް ތަނަވަސްކުރިއިރު، މި ހާފުގެ ކުރީކޮޅު އެ ޓީމުގެ ނިކޮލަސް ޑޮމިންގޭޒް ފޮނުވާލި ހަމަލާއެއް ޔުވެންޓަސްގެ ގޯލްކީޕަރު ވޮސިއެޗް ޝެޒްނީ ވަނީ ދިފާއުކޮށްފައެވެ. އެކަމަކު މެޗުގެ 69 ވަނަ މިނެޓުގައި ޔުވެންޓަސްއިން ލީޑު ފުޅާކުރިއިރު، އޭރިއާ ތެރެއިން ފޮނުވާލި ރީތި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ހުއާން ކުއަޑްރާޑޯއެވެ.

މި މޮޅާއެކު ތާވަލުގެ ހަވަނައިގައި ޔުވެންޓަސް އޮތީ ކުޅުނު 18 މެޗުން ލިބުނު 31 ޕޮއިންޓާއެކުއެވެ. ތާވަލުގެ ފަސްވަނައަށް ޖެހިލި ރޯމާއަށްވެސް 18 މެޗުން 31 ޕޮއިންޓް ލިބިފައިވާއިރު، ލީގުގައި ހޮނިހިރު ދުވަހުގެރޭ ކުޅުނު މެޗުން އެ ޓީމު ވަނީ އެޓަލާންޓާ އަތުން 4-1 ގެ ނަތީޖާއަކުން މޮޅުވެފައެވެ.