ހިޔާގެ 21 މުވައްޒަފުން ވަކިކުރަން ނިންމި ނިންމުން ބާތިލްކޮށްފި

ޖެންޑާ މިނިސްޓްރީގެ ބެލުމުގެ ދަށުން ހިންގަމުން އަންނަ، ކުޑަކުދިންގެ ހިޔާގައި މަސައްކަތް ކުރަމުންދިޔަ 21 މުވައްޒަފަކު ވަޒީފާއިން ވަކިކުރަން ނިންމި ނިންމުން ބާތިލްކޮށްފިއެވެ.

ޖެންޑަރ މިނިސްޓްރީން ވަނީ އެ ނިންމުން ބާތިލްކުރިކަން މުވައްޒަފުންނަށް ސިޓީއަކުން އަންގާފައެވެ. ރާއްޖެ އެމްވީއަށް މައުލޫމާތުދެމުން ޖެންޑަރ މިނިސްޓްރީން ބުނީ ހިޔާގައި މަސައްކަތްކުރަމުންދިޔަ 21 މުވައްޒަފަކު ވަޒީފާއިން ވަކިކުރަން ނިންމި ނިންމުން ބާތިލްކުރަން ނިންމީ ސިވިލް ސަރވިސް ކޮމިޝަނުން އެކަން ހިނގާފައިވާގޮތް އަލުން ރިވިއުކުރަން ބޭނުންވާތީ ކަމަށެވެ.

ކުޑަކުދިންގެ ހިޔާގައި މަސައްކަތްކުރަމުންދިޔަ 21 މުވައްޒަފަކު ވަޒީފާއިން ވަކިކުރަން ނޯޓިސް ދީފައިވަނީ ހިޔާގައި ތިބި ކުދިންތައް އަތޮޅު ތެރޭގެ އަމާންވެށިތަކަށް ބަދަލުކުރުމުން އެމީހުންގެ ޒިންމާތަކެއް ނެތި މަސައްކަތް ކުރަމުން އަންނާތީ، މިނިސްޓްރީގެ އެހެން މަސައްކަތްތައް ކުރުމަށް ބަދަލުވުމުގެ ފުރުސަތު ދިނުމަށްފަހު ކަމަށް މިނިސްޓްރީން ވަނީ ބުނެފައެވެ. އަދި އެ ފުރުސަތު ދިންތާ އަހަރަކަށްވުރެ ގިނަ ދުވަސްވެފައިވާ ކަމަށް މިނިސްޓްރީން ބުނެފައިވެއެވެ.

ޖެންޑާ މިނިސްޓްރީން ބުނީ 71 މުވައްޒަފުންގެ ތެރެއިން ތިން މީހުން ޝައުގުވެރިކަން ފާޅުކުރީ އަތޮޅުތަކުގެ އަމާންވެށިތަކުގައި މަސައްކަތްކުރުމަށް ކަމަށާއި، ހިޔާގެ 43 މުވައްޒަފަކު އަންނަނީ އެކި ތަންތަނުގައި މަސައްކަތް ކުރަމުން ކަމަށެވެ. އަދި އަމިއްލައަށް ބޭނުންވެގެން ހަތް މުވައްޒަފަކު ވަޒީފާއިން ވަކިވެފައިވާ ކަމަށެވެ. ނަމަވެސް ބާކީ ތިބި 21 މުވައްޒަފުން ވަޒީފާއިން ވަކިކުރަން ނޯޓިސް ފޮނުވީ ސިވިލް ސާވިސްގެ އުސޫލުގެ ދަށުން ކަމަށް ޖެންޑަރ މިނިސްޓްރީން ބުނެއެވެ.

21 މުވައްޒަފުން ވަޒީފާއިން ވަކިކުރަން ނޯޓިސް ދީފައިވަނީ ސިވިލް ސަރވިސް ކޮމިޝަނުން ބަލަންޖެހޭ ކަންކަން ބެލުމަށްފަހުގައި ކަމަށް ޖެންޑަރ މިނިސްޓްރީން ބުނެއެވެ.