ރާއްޖެއަކީ ހުރިހާ އެއްޗެއް ބޭރުން އެތެރެކުރާ ގައުމަކަށްވާއިރު ކޮމާޝަލް ބަނދަރުތަކުގެ ހާލަތު ހުރީ އެންމެ ރަނގަޅަކަށް ނޫން
އެމްޕީއެލްގެ ޗެއަރމަން ފަލަސުރުޚީ ޕްރޮގްރާމްގައި ވާހަކަދައްކަވަނީ
މާލޭގެ ބަނދަރު ތަރައްގީކުރުމުގެ މަސައްކަތްތަކެއް ކުރެވެމުންދާއިރު ބަނދަރަށް ބޭނުންވާ ސާމާނު ޒަމާނީ ކުރުމުގެ މަސައްކަތްތައް ވެސް ކުރެވެމުންދާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޗެއާމަން މުހައްމަދު ޝަރީފް (ސެންކޯ ޝަރީފް) ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން ޝަރީފް ވިދާޅުވީ ބަނދަރުގައި މިހާރު ބޭނުންކުރަމުންދާ އާލާތްތަކަކީ ވަރަށް ކުރީގެ އާލާތްތަކެއްކަމަށެވެ. އެހެންކަމުން މިޒަމާނަށް ފެތޭ ސާމާނު ގެންނަން ފަށާފައިވާކަމަށް ޝަރީފް ވިދާޅުވިއެވެ. ކުރިޔަށް އޮތް އަހަރު ތެރޭގައި ވެސް ބަނދަރަށް ބޭނުންވާ ޒަމާނީ އާލާތްތައް ގެނައުމުގެ މަސައްކަތް ކުރާނެކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ރާއްޖެއަކީ ހުރިހާ އެއްޗެއް ބޭރުން އެތެރެކުރާ ގައުމަކަށްވާއިރު ރާއްޖޭގެ ކޮމާޝަލް ބަނދަރުތަކުގެ ހާލަތު ހުރީ އެންމެ ރަނގަޅަށް ނޫންކަމަށެވެ. މަލޭގެ ކޮމާޝަލް ހާބަރަށްވެސް 35 އަހަރުވަރު ވެދާނެކަމަށާއި އެތަން ޑިޒައިންކޮށްފައިވަނީ އެންމެ ބޯޓަކަށް ކައިރިވޭގޮތަށްކަމަށެވެ. މާލޭގައި އޮތީ ކޮމާޝަލް ބަނދަރެއް ނޫންކަމަށާއި މަގަތު ފާލަމެއްކަމަށް ޝަރީފް ވިދާޅުވިއެވެ. ބަނދަރުގައި ކޮންޓެއިނަރ ބާލާނެ ޖާގަ ނޯންނައިރު ދެންޖެހެނީ ބޭރު ބަނދަރުގައި ބާއްވައިގެން ބާޖު ގެންގޮސްގެން މުދާ ބާލަންކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ކުޅުދުއްފުއްޓާއި އައްޑޫ ސިޓީގައި ހަދާފައިވާ ބަނދަރުތަކުގެ ހާލަތުވެސް ހުރީ ވަރަށް ދަށްކޮށްކަމަށެވެ. ޝަރީފް ވިދާޅުވީ 2021 ވަނަ އަހަރު އައިއިރު ރާއްޖޭގައި ހުންނަންވާނީ ޓްރާންސިޓް ބަނދަރު ވެސް ހެދިފައިކަމަށެވެ.
ރަނގަޅު ބަނދަރެއް އޮތުމަކީ ރާއްޖޭގެ ތަރައްގީއަށްވެސް ވަރަށް މުހިންމު ކަމެއްކަމަށް ޝަރީފް ވިދާޅުވިއެވެ. ރަނގަޅު ބަނދަރެއް އޮންނަނަމަ ދެ ދުވަހެއްގެ ތެރޭގައި ކޮންޓެއިނަރތައް ހުސް ކުރުމުގެ ފުރުސަތުވެސް ލިބިގެންދާނެކަމަށް ޝަރީފް ވިދާޅުވިއެވެ.
