ޕާކިސްތާނުގެ ބޭންކެއްގައި ބާރުގަދަ އެއްޗެއް ގޮވައި 15 މީހުން މަރުވެއްޖެ
19 ޑިސެމްބަރު 2021 | އާދީއްތަ 00:29ގޮވުން ގޮވާފައިވަނީ ގޭސް ލީކުވުމުގެ ސަބަބުން ކަމަށް ބެލެވޭ
ޕާކިސްތާނުގެ ކަރާޗީގައި ހުރި ބޭންކެއްގައި ބާރުގަދަ އެއްޗެއް ގޮވުމާއި ގުޅިގެން އެސަރަހައްދުގައި މީހުން ހަރަކާތްތެރިވަނީ
ޕާކިސްތާނުގެ ކަރާޗީގައި ހުރި ބޭންކެއްގައި ބާރުގަދަ އެއްޗެއް ގޮވުމާއި ގުޅިގެން 15 މީހުން މަރުވެ 16 މީހުން ޒަޚަމްވެފައިވާކަމަށް ޕާކިސްތާނުގެ ފުލުހުން ބުނެފިއެވެ.
ކަރާޗީގައި ހުންނަ ހަބީބު ބޭންކުގެ ބްރާންޗެއްގައި ގޮވި މިގޮވުމާއި ގުޅޭގޮތުން ސީނިއަރ ޕޮލިސް އޮފިސަރަކު ވިދާޅުވީ ގޮވާފައިވަނީ ގޭސް ލީކުވުމުގެ ސަބަބުން ކަމަށް ބެލެވޭކަމަށެވެ. އަދި އިމާރާތްކޮށްފައިވަނީ ފެންހިންދާ ނިޒާމެއްގެ މަތީގައިކަމަށް ބެލެވޭކަމަށްވެސް ވިދާޅުވިއެވެ.
ގޮވަންޖެހުނު ސަބަބު ދެނެގަތުމަށް މަސައްކަތްކުރާކަމަށް އޮފިސަރ ވިދާޅުވިއެވެ. ގޮވުމާއި ގުޅިގެން ހަބީބް ބޭންކުން ކޮށްފައިވާ ޓްވީޓެއްގައި ބުނެފައިވަނީ އިމާރާތަށް ގެއްލުންލިބިފައިވާ ކަމަށާއި އަދި މީހުން މަރުވެފައިވާކަމަށެވެ. މިހާދިސާގައި ގެއްލުން ލިބުނު ފަރާތްތަކަށާއި އާއިލާތަކަށް ތައުޒިޔާ ކިޔާކަމަށްވެސް ބަޔާނުގައި ބުނެފައިވެއެވެ.
ބޭންކާއި ޖެހިގެން ހުރި ޕެޓްރޯލް ސްޓޭޝަނަކަށްވެސް ވަނީ ބޮޑެތި ގެއްލުންތަކެއް ލިބިފައެވެ. އަދި އެތާ ކައިރީގައި ޕާކުކޮށްފައި ހުރި ކާރުތަކަކަށްވެސް ގެއްލުން ލިބިފައިވާކަމަށް ރިޕޯޓްތައް ބުނެއެވެ.
ޕޮލިހުންގެ ސީނިއަރ އެހެން އޮފިސަރަކު ވިދާޅުވެފައިވާ ގޮތުގައި މިހާދިސާގައި މަރުވި މީހުންނާއި ޒަޚަމްވި މީހުންގެ ސީދާ އަދަދު އަދި ނޭނގެއެވެ.
