ޝުކުރުވެރިނުވާނަމަ ހާލަތު ބަދަލުވެގެން ދިއުމަކީ ދުރުގައިވާ ކަމެއް ނޫން: ޚުތުބާ
17 ޑިސެމްބަރު 2021 | ހުކުރު 08:30ނިއުމަތްތަކަށް އެމީހުން ޝުކުރުވެރިނުވާ ނަމަ ބަލިމަޑުކަމާއި، މުސީބާތުން އެމީހުން ހަލާކުވެގެންދާނެ
ިއިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން،
އިމާންކަން ބަލިކަށިވެ، މާތްﷲގެ ނިއުމަތްތަކަށް ޝުކުރުވެރިނުވާނަމަ، އެނިއުމަތްތައް ބީވެ، ހާލަތު ބަދަލުވެގެން ދިއުމަކީ ދުރުގައިވާ ކަމެއް ނޫން ކަމަށް ހުކުރު ޚުތުބާގައި ބުނެފިއެވެ.
''ބުއްދީގެ އަހުލުވެރިންނޭވެ، ފަހެ ތިޔަބައިމީހުން އިބްރަތް ލިބިގަންނާށޭ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ބައެއް ގައުމުތަކުގައި ގާއިމްވެފައިވާ އަމަންއަމާންކަމާއި ހަމަޖެހުމުގެ ސަބަބުން، ﷲ ގެ ރިޒުގު ތަނަވަސްވެ، ބަނޑުހައި ހޫނުކަން އިހުސާސް ކުރަންނުޖެހި، ތަރައްގީވެ ކުރިއަރައިގެން ދިޔަ ކަމަށެވެ. ނަމަވެސް އެގައުމުތަކުގެ މީސްތަކުންގެ އީމާންކަން ބަލިކަށިވެ ހިތްތަކުގައި ﷲ ތައާލާއަށް އޮތް ބިރުވެތިކަން ފިލައިގޮސް އެކަލާނގެއަށް އުރެދުމުގެ ސަބަބުން ކުޑަ ވަގުތުކޮޅެއްގެ ތެރޭގައި މާތްﷲ އެމީހުންގެ ޙާލަތު ބަދަލު ކުރެއްވި ކަމަށެވެ. އަދި އެފަދަ ހާދިސާތަކުން މިއުންމަތް އިބްރަތް ހާސިލް ކުރަން ޖެހޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މާތް ﷲ ދެއްވި ނިއުމަތްތަކަށް އެމީހުން ޝުކުރުވެރިނުވާ ނަމަ ބަލިމަޑުކަމާއި، މުސީބާތުން އެމީހުން ހަލާކުވެގެންދާ ކަމަށެވެ. އޭގެ ތެރެއިން އެއްބަޔަކީ ސަބަބުގެ އަހުލުވެރިން ކަމަށް ޚުތުބާގައި ބުނެފައިވެއެވެ.
އާއްމު ގޮތެއްގައި މިދުނިޔޭގައި ދިރި އުޅެވޭނީ ފަސްދޮޅަސް ނުވަތަ ހަތްދިހަ ވަރަކަށް އަހަރުކަން ފާހަގަކޮށް ޚުތުބާގައި ބުނީ ދުނިޔޭގައި ދިރިއުޅުމަށް ލިބޭ މަދު ދުވަސްތައް ހެޔޮ ގޮތުގައި ހޭދަކޮށްފި މީހަކީ، މާތް ﷲ ގެ އިރާދަފުޅުން އަބަދުގެ އަބަދަށް ﷲ ނިއުމަތުގައި ދެމިހުންނާނެ މީހެއް ކަމަށެވެ. ނަމަވެސް ﷲ ހަރާމް ކުރައްވާފައިވާ ﷲ ކަންތައްތައް ކުރުމުގައި އެމީހެއްގެ އުމުރު ހޭދަކޮށްފި މީހަކީ ﷲގެ ކޯފާއާއި، އަޒާބަށް ހުށަހެޅިގެންދާނެ މީހެއް ކަމަށެވެ.
އެހެންކަމުން އަހަރަކަށްފަހު އަހަރެއް ފާއިތުވަމުން ދާއިރު ޣާފިލުކަމުގެ ތަންމަތިން ނިދާ ހޭލުމަށް ޚުތުބާގައި ވަނީ ގޮވާލާފައެވެ.
