ޕިލިޕީންސްގައި ތިބި ދިވެހިންގެ ހާލު ރަނގަޅު: ފޮރިން މިނިސްޓްރީ
17 ޑިސެމްބަރު 2021 | ހުކުރު 07:55121 މޭލު ބާރުމިނުގައި ވައި ޖެހުނު
ޕިލިޕީންސްގައި އެރި ތޫފާނާއެކު، ގިނަ ހާދިސާތައް ދަނީ ހިނގަމުން | ރޮއިޓާސް
ޕިލިޕީންސްގައި ތިބި ދިވެހި ދަރިވަރުންގެ ހާލު ރަނގަޅު ކަމަށް ފޮރިން މިނިސްޓްރީން ބުނެފިއެވެ.
ފިލިޕީންސަށް އެރި އެންމެ ބާރުގަދަ އެއް ތޫފާން ކަމަށްވާ ޓައިފޫން ރާއީގެ ސަބަބުން ފިލިޕީންސަށް ވަރަށް ބޮޑަށް މޫސުން ގޯސްވެ، ބައެއް ސަރަހައްދުތަކަށް ދަނީ ބޮޑެތި ގެއްލުންތަކެއް ލިބެމުންނެވެ. އެގައުމުގައި ގިނަ ދިވެހި ދަރިވަރުން ދިރިއުޅެމުންދެއެވެ.
ފޮރިން މިނިސްޓްރީން ބުނީ ތޫފާނާ ގުޅިގެން ބައެއް ސަރަހައްދުތަކަށް ބޮޑެތި ގެއްލުންތަކެއް ލިބެމުންދާތީ، އެގައުމުގައި ތިބި ދިވެހި ދަރިވަރުންގެ ހާލު ވަރަށް ގާތުން ބަލަމުންދާ ކަމަށެވެ. އަދި ހުރިހާ ދަރިވަރުންގެ ވެސް ހާލު ރަނގަޅު ކަމަށް މިނިސްޓްރީން ބުނެއެވެ.
121 މޭލު ބާރުމިނުގައި ވައި ޖެހުނު ތޫފާނަށް ފަހު، ބިންގަނޑު ކަނޑައިގެން ދިއުމުގެ ހާދިސާތައް ދަނީ ހިނގަމުންނެވެ. އެތައް ބައެއްގެ ފުރާނައަށް ގެއްލުންވެފައިވާއިރު، ހާލުގައި ޖެހިފައިވާ މީހުން ރައްކާތެރި ހިސާބުތަކަށް ގެންދިއުމުގެ މަސައްކަތް ދަނީ ކުރަމުންނެވެ. ރިޕޯޓުތައް ބުނާ ގޮތުން މިހާތަނަށް 300،000ށް ވުރެ ގިނަ މީހުންގެ ގެދޮރު ވަނީ ގެއްލިފައެވެ. އަދި ގިނަ ބަޔަކު ހާލުގައި ޖެހިފައިވާތީ އެހީވުމުގެ މަސައްކަތް ވެސް ވަނީ ފަށާފައެވެ.
