ތަރައްގީގެ މަޝްރޫއުތައް އަންނައިރު، ހުރިހާ ފަރާތްތައްވެސް ޝާމިލްވާނެ ފަދަ ގޮތަކަށް އެ މަޝްރޫއުތައް ބައްޓަންކުރަންޖެހޭ - މޭޔަރ އާތިފް
16 ޑިސެމްބަރު 2021 | ބުރާސްފަތި 16:55ދެވަނަ ފިޔަވަހީގެ މަގުތައް ހެދޭއިރު، މަގުތައް ހުންނާނީ ޚާއްސަ އެހީއަށް ބޭނުންވާ ފަރާތްތަކަށް ފަސޭހަކަމާއެކު ބޭނުންކުރެވޭނެހެން ޑިޒައިންކޮށްފައި
ޝާމިލް ކުރުމުގެ ސިޔާސަތަށް އަހުލުވެރިކުރުމަށް ބޭއްވި ސަރަހައްދީ މަސައްކަތު ބައްދަލްވުން ނިންމުމުގެ ރަސްމިއްޔާތުގައި މޭޔަރ އާތިފް ވާހަކަ ދައްކަވަނީ
ތަރައްގީގެ މަޝްރޫއުތައް އަންނައިރު ހުރިހާ ފަރާތްތައްވެސް ޝާމިލްވާނެ ފަދަ ގޮތަކަށް އެ މަޝްރޫއުތައްވެސް ބައްޓަންކުރަންޖެހޭ ކަމަށް ކުޅުދުއްފުށީ ސިޓީގެ މޭޔަރ މުހައްމަދު އާތިފް ވިދާޅުވެއްޖެއެވެ.
އާތިފް މިހެން ވިދާޅުވީ، ޝާމިލުކުރުމުގެ ސިޔާސަތަށް އަހުލުވެރިކުރުވުމަށް ސަރަހައްދީ ފެންވަރުގައި ކުޅުދުއްފުށީގައި ބޭއްވި މަސައްކަތު ބައްދަލުވުމުގެ ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ.
އާތިފް ވިދާޅުވީ ކުޅުދުއްފުށި ސިޓީގެ މަގުތަކުގެ ދެވަނަ ފިޔަވަހީގެ ދަށުން ހަދާ މަގުތައް ޑިޒައިންކޮށްފައިވާނީ ނުކުޅެދުންތެރިކަން ހުންނަ ފަރާތްތަކަށް ފަސޭހަކަމާއެކު މަގުގެ ޕޭވްމެންޓް ބޭނުންކުރެވޭ ގޮތަށްކަމަށެވެ. މަގުތަކާއި ޕާރކް އަދި ބީޗް އޭރިއާ ފަދަ ތަންތަން ތަރައްގީކުރާއިރު، ވީލް ޗެއަރގައި އުޅޭ ފަރާތްތަކަށް ބޭނުންނުކުރެވޭ ގޮތަށް ޑިޒައިންކޮށްފައި ހުންނަ މަންޒަރު ފެންނަ ކަމަށާއި، ޝާމިލުކުރުމުގެ ވާހަކަދައްކާއިރު މި ވާހަކަތައްވެސް ދައްކަންޖެހޭ ކަމަށް މޭޔަރު ވިދާޅުވިއެވެ.
މޭޔަރު ވިދާޅުވީ، ދެވަނަ ފިޔަވަހީގެ މަގުތައް ހެދޭއިރު ޚާއްސަ އެހީއަށް ބޭނުންވާ ފަރާތްތަކަށް ފަސޭހަކަމާއެކު މަގުތައް ބޭނުންކުރެވޭނެ ކަމަށެވެ. އެގޮތުން ވީލް ޗެއަރގައި އުޅޭ ފަރާތްތަކަށް ޕޭވްމެންޓަށް އަރާފޭބޭނެހެން ތިރިކޮށްފައި ހުންނާނެ ކަމަށް އޭނާ ވިދާޅުވިއެވެ.
އަދި ހަމައެއާއެކު، ލޯފަން މީހުންނަށް ޕޭވްމެންޓްގައި ހިނގާ ބިނގާވެ އުޅުމަށް ފަސޭހަކުރުމަށް ބްރެއިލް ބުލޮކްސް ހިމެނޭތޯ މަސައްކަތްކުރާ ކަމަށާއި، އެހެންނަމަވެސް އަދި އެކަން ފައިނަލްވެފައިނުވާ ކަމަށް މޭޔަރު ވިދާޅުވި އެވެ. އެހެން އެކަން ވެއްޖެކަމަށްވާނަމަ އެފަރާތްތަކަށް ފަސޭހަތަކެއް ލިބިގެންދާނެކަން މޭޔަރު ފާހަގަކުރެއްވި އެވެ.
މޭޔަރު ވިދާޅުވީ ޚާއްސަ އެހީއަށް ބޭނުންވާ ފަރާތްތަކަށް އަންނަ އަހަރުގެ ވޯކްޕްލޭންގައި ގިނަ ކަންތައްތަކެއް ހިމަނާފައިވާނެ ކަމަށެވެ.
