އީއައިއޭ ރިޕޯޓްގައި ފާހަގަކޮށްފައިވާ ގޮތަށް، އެއަރޕޯޓް ފެންސުކައިރީގައި މަގެއް ހަދަން ކައުންސިލުން ނިންމައިފި
އެއާޕޯޓް ފެންސު ކައިރިން 50 ފޫޓްގެ ފުޅާ މަގެއް ހަދައި، ކުޅިއަށް ވެލިތައް ނުފައިބާނެހެން ބަންޑުވޯލް ޖަހައި ހިމާޔަތްކުރުމަށް ކައުންސިލުން ވަނީ ނިންމާފައި
އެއަރޕޯޓް ފެންސް ސަރަހައްދު
ކުޅުދުއްފުށީގައި ތަރައްްގީކުރި އެއާޕޯޓް ހިއްކުމަށް ނެގި ވެލި ކުޅިތެރެއަށް ފައިބައިގެން ދިޔުން ހުއްޓުވުމުގެ ގޮތުން އެތަނުގައި މަގެއް ހަދައި، ކުޅި ހިމާޔަތްކުރުމަށް ބަންޑުވޯލް ޖެހުމަށް ސިޓީ ކައުންސިލުން ނިންމައިފިއެވެ.
އެއާޕޯޓް ހެދިއިރުވެސް އެތަނުގައި މަގެއް ހަދައި ވެލިތައް ކުޅިއަށް ނުފައިބާނޭހެން ބަންޑުވޯލު ޖެހުމަށް އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ) ރިޕޯޓްގައި ފާހަގަކޮށްފައިވެ އެވެ. އެހެންނަމަވެސް އެކަން ކޮށްފައިނުވާތީ، ކުޅި ތެރެއަށް ގިނަ އަދަދެއްގެ ވެލި އެޅި، ވަނީ ފެތުރިފަ އެވެ.
ސިޓީ ކައުންސިލުން ބުނީ އެއާޕޯޓް ފެންސު ކައިރިން 50 ފޫޓްގެ ފުޅާ މަގެއް ހަދައި، ކުޅިއަށް ވެލިތައް ނުފައިބާނެހެން ބަންޑުވޯލް ޖަހައި ހިމާޔަތްކުރުމަށް ނިންމާފައިވާކަމަށެވެ.
ކުޅުދުއްފުށީ ސިޓީ މޭޔަރު މުހައްމަދު އާތިފް ވިދާޅުވީ، މިވަގުތު ހުރި ވަސީލަތްތައް ބޭނުންކޮށްގެން ކުޅީގެ ބާކީ ބައި ހިމާޔަތްކުރުމަކީ މުހިންމުކަމެއް ކަމަށާއި، އަދި މިވަގުތު ބަންޑުވޯލް ޖެހުމަށް ހަމަޖެހިފައިވަނީ ބަނދަރު ކޮނުނުއިރު ނެގި ބޮޑެތި ގާތަށް ބޭނުންކޮށްގެން ކަމަށެވެ. އަދި އެމަގު ގުޅުވާލާނީ އެއާޕޯޓްގެ ޓަރމިނަލަށް ދަތުރުކުރެވޭނެ ގޮތަށް ކަމަށްވެސް މޭޔަރު ވިދާޅުވިއެވެ.
އެއާޕޯޓް ތަރައްގީކުރިއިރު އީއައިއޭ ރިޕޯޓްގައި ފާހަގަކޮށްފައި ހުރި ގިނަ ކަންތައްތައް ނުކޮށް ދޫކޮށްލާފައިވާކަން ފާހަގަކުރައްވަމުން ޑެޕިއުޓީ މޭޔަރު އަލީ އަހުމަދު ވިދާޅުވީ، ބަންޑުވޯލްގެ ސަބަބުން ކުޅިތެރެއަށް ވެލިގަނޑު ފައިބައިގެން ދިޔުން ހުއްޓޭނެ ކަމަށެވެ. އަދި މަގާއެކު، އެ ސަރަހައްދުގެ ފެންހިންދާ ނިޒާމުވެސް ރަނގަޅު ގޮތަކަށް ބަންޓަންކުރެވިގެންދާނެ ކަމަށެވެ.
ބަންޑުވޯލު ނުޖަހާ ދޫކޮށްލުމުގެ ސަބަބުން މިހާރުވެސް ކުޅި ތެރެއަށް ގިނަ އަދަދަކަށް ވެލި އެޅި، ވަނީ ފެތުރިގެންގޮސްފަ އެވެ.
