ރަޖިސްޓަރީނުކޮށް ހުރި ގޯތިތައް ރަޖިސްޓަރީކުރުމަށް 4 މަސްދުވަސް ދީފި
16 ޑިސެމްބަރު 2021 | ބުރާސްފަތި 14:23ރަޖިސްޓަރީ ހެއްދުމަށް، މިމަހުގެ 16 ވަނަ ދުވަހުން ފެށިގެން 4 މަސް ތެރޭގައި އެ އިދާރާއަށް ހުށަހެޅުމަށް، ގޯތި ދޫކޮށްފައިވާ ފަރާތްތަކަށް ކައުންސިލުން ވަނީ އަންގާފައި
ކުޅުދުއްފުށި ސިޓީ ކައުންސިލްގެ ބައްދަލުވުމެއް ކުރިއަށްދަނީ
ކުޅުދުއްފުށީ ސިޓީން ދިރިއުޅުމަށް ދޫކޮށްފައިވާ ގޯތި ތަކުގެ ތެރެއިން ރަޖިސްޓަރީ ހައްދާފައިނުވާ ގޯތިތަކުގެ ރަޖިސްޓްރީ، 4 މަސްތެރޭގައި ހެއްދުމަށް ކުޅުދުއްފުށީ ސިޓީ ކައުންސިލުން އަންގައިފިއެވެ.
ރާއްޖޭގެ ބިމާބެހޭ ގާނޫނު (ގާނޫނު ނަންބަރު 1/2002)ގެ ދަށުން ހަދާފައިވާ "ބަންޑާރަ ގޯއްޗާއި، އަމިއްލަ ގޯއްޗާއި، އެފަދަ ގޯތީގައި ހަދާ އިމާރާތް ރަޖިސްޓަރީ ކުރުމާބެހޭ ޤަވާއިދު"ގެ 5 ވަނަ މާއްދާގައި ބަޔާން ކޮށްފައިވާ ފަދައިން، ދިރިއުޅުމަށް ގޯތިދޫކުރާތާ 1 އަހަރު ދުވަހު ތެރޭގައި މި ގަވާއިދުގެ 6 ވަނަ މާއްދާގައިވާ ކަންކަން ފުރިހަމަކޮށް، ގޯތި ރަޖިސްޓަރީކުރަން ހުށަހަޅަންޖެހޭނެ ކަމަށްވެސް އެ ކައުންސިލުން ވަނީ ބުނެފައެވެ.
އެހެންކަމުން ދިރިއުޅުމަށް ދޫކޮށްފައިވާ ގޯތިތަކުގެ ތެރެއިން ރަޖިސްޓަރީ ނުކޮށްހުރި ގޯތިތަކުގެ ރަޖިސްޓަރީ ހެއްދުމަށް މިމަހުގެ 16 ވަނަ ދުވަހުން ފެށިގެން 4 މަސް ތެރޭގައި އެ އިދާރާއަށް ހުށަހެޅުމަށް ގޯތި ދޫކޮށްފައިވާ ފަރާތްތަކަށް ވަނީ ކައުންސިލުން އަންގާފައެވެ.
އަދި މި އެންގުމާ އެއްގޮތަށް އަމަލު ނުކުރާ ފަރާތްތަކާމެދު، ހެދިފައިވާ ގާނޫނާއި ގަވާއިދުތަކާ އެއްގޮތްވާގޮތުގެ މަތިން އަމަލު ކުރަމުންދާނެ ކަމަށްވެސް އެ އިދާރާއިންވަނީ ބުނެފައެވެ.
