"ރާއްޖެޓީވީ"ގައި ރޯކޮށްލި މައްސަލައިގައި ޓެރަރިޒަމްގެ ދައުވާ އުފުލާފައިވާ ހ. ގަސްވާ މުހައްމަދު މީއާދުގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ހުކުމް ކޮށްފިއެވެ.

މީއާދުގެ މައްޗަށް ކުށް ސާބިތުވާކަމަށް ނިންމައި، ބުރާސްފަތި ދުވަހު ކްރިމިނަލް ކޯޓުން ވަނީ އޭނާގެ މައްޗަށް 2 އަހަރުގެ ޖަލު ހުކުމެއް އިއްވާފައެވެ. އެގޮތުން ގާޒީ އަލީ އާދަމް ވަނީ، ޝައްކެއް ނެތް މިންވަރަށް އޭނާގެ މައްޗަށް ކުށް ސާބިތުވާކަމަށް ކަނޑައަޅުއްވާފައެވެ.

މި މައްސަލައިގެ ޚުލާސާ ބަޔާން އިއްވާފައިވަނީ މިއަހަރުގެ އޯގަސްޓު މަހުގެ 29 ވަނަ ދުވަހުއެވެ.

މައްސަލައިގެ ޚުލާސާ ބަޔާން އިއްވަވަމުން ދައުލަތުގެ ވަކީލާ ވިދާޅުވީ، މީއާދު އިތުރު 5 މީހުންނާ ބައިވެރިވެގެން ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލާފައިވާ ކަމަށާއި، ދައުވާ އިއްވުމުން ދައުވާއަށް މީއާދު އިންކާރު ކޮށްފައިވާ ކަމަށެވެ. މައްސަލަ ސާބިތު ކުރުމަށް ޕީޖީ އޮފީހުން ވަނީ ޝަފަހީ ހެކިންނާއި ކިތާބީ ހެކިންގެ ހެކިބަސް ނަގާފައެވެ.

ޚުލާސާ ބަޔާން އިއްވަވަމުން ވަކީލު ވިދާޅުވީ، ރާއްޖެޓީވީ ރޯކޮށްލި މީހުންގެ ތެރޭގައި މީއާދު ހިމެނޭކަން ސިއްރު ހެކިވެރިންގެ ބަހުން އެނގޭ ކަމަށެވެ. އަދި އޭނާ މޫނުގައި މާސްކް އަޅަން ހުރިތަން ފެނުނު ކަމަށާއި، އޭނާ ބީކޭޓީ އިމާރާތަށް ވަދެގެން ދިޔަތަން ފެނުނުކަމަށް ވެސް ސިއްރު ހެކިންގެ ހެކިބަހުން އެނގޭކަމަށް ދައުލަތުގެ ވަކީލާ ވިދާޅުވިއެވެ. އޭގެ އިތުރުން، ރާއްޖެޓީވީ ރޯކޮށްލަން ބޭނުންކުރި ދަތް ދަގަނޑު ހިފައިގެން މީއާދުއާއެކު އިތުރު 5 މީހަކު އުޅުނުކަމަށް ވެސް ދައުލަތުގެ ވަކީލާ ވިދާޅުވިއެވެ.

ބަރުދަނުގައި 690ގުރާމް، ދިގުމިނުގައި 15.5އިންޗި، ވަށަމިނުގައި 2އިންޗި ހުރި އެއްކޮޅު ލަންބާފައިވާ މި ދަގަނޑުގަނޑަކީ ރާއްޖެޓީވީ އިމާރާތުގެ ދަގަނޑުގޭޓުގެ ތަޅު ހަލާކު ކޮށްލައި، އެއަށްފަހު ލަކުޑި ގޭޓު ފުނޑާލައިގެން އެތެރެއަށް ވަނުމަށް ބޭނުންކުރި ހަތިޔާރެވެ. ރާއްޖެޓީވީގެ ސްޓޭޝަން ރޯކޮށް އަންދާލުމަށްފަހު އެކަންކުރި މީހުން އެތަނުން ނިކުމެގެން ދިޔައިރު އެމީހުން ހަތިޔާރުގެ ގޮތުގައި ބޭނުންކުރި މި ދަތްދަގަނޑު އޮތީ އެތަނުގެ އެތެރޭގައެވެ.

ވަކީލާ ވިދާޅުވީ، މީއާދު ޑޮކްޓަރަށް ދައްކާފައިވާ ބޭސް ސިޓީން އޭނާގެ ގައިގެ އެކި ތަންތަން ފިހިފައިވާކަން އެނގޭ ކަމަށާއި، ރާއްޖެޓީވީ ރޯކޮށްލުމަށްފަހު އެތަނުގެ ސެކިއުރިޓީ ގާޑަށް ވެސް އޭނާ ހަމަލާދީފައި ވާކަމަށެވެ. އަދި މީއާދު ފުލުހުންގެ ބެލުމުގެ ދަށަށް ގެނައުމަށްފަހު ނަގާފައިވާ ފޮޓޯތަކުން އެކަންކަމަށް އިތުރަށް ބާރު ލިބިދޭ ހެކިތައް ފެނިފައިވާކަން ދައުލަތުން ފާހަގަކުރިއެވެ.

އޭގެ އިތުރުން، ހާދިސާ ހިނގި ދުވަހު ހުރީ ދަތުރު ގޮސްފައިކަމަށް ދިފާއީ ހެކިން ބުނި ނަމަވެސް، އެ ހެކިންގެ ހެކިބަސްތަކުގައި ބޮޑެތި ފުށުއެރުންތަކެއް ހުރިކަން ދައުލަތުގެ ވަކީލު ފާހަގަކުރެއްވިއެވެ. ވަކީލު ވިދާޅުވީ، ދަތުރު ދިޔަ ރަށުގެ ނަން ވެސް ހަނދާން ނެތްކަމަށް ދިފާއީ ހެކިން ބުނި ކަމަށެވެ. އަދި ދައުލަތުން ހުށަހަޅާފައިވާ ހެކި ގަރީނާ ނަފީ ކުރެވޭ ވަރުގެ ހެއްކެއް ދިފާއުން ހުށައަޅާފައިނުވާކަން ވެސް ވަކީލު ފާހަގަކުރެއްވިއެވެ.

ދައުލަތުން އޭރުވެސް ވަނީ މި މައްސަލަ އެކަށީގެންވާ ޝައްކެއް ނެތި ސާބިތުވާކަމަށް ކަނޑައަޅައިދެއްވުމަށް އެދިފައެވެ.

ރާއްޖެޓީވީ ހިންގަމުން ގެންދިޔަ އިމާރާތުގައި ރޯކޮށްލުމުގެ ޖަރީމާ ހިންގާފައިވަނީ 2013 ވަނަ އަހަރުގެ އޮކްޓޯބަރު 7 ވަނަ ދުވަހުގެ ރޭ މެންދަމުގެ ވަގުތެއްގައެވެ. ރާއްޖެޓީވީގެ ސްޓޫޑިއޯ ހިންގަމުން ދިޔަ ބީކޭޓީ އިމާރާތުގައި އަލިފާން ރޯކޮށްލައި ހުރިހާ އިކުއިޕްމެންޓެއް އަންދައި އަޅިއަށް ހަދާލާފައިވަނީ، ރާއްޖެޓީވީއަށް ހަމަލާދޭން އުޅޭކަމުގެ މައުލޫމާތު ލިބި، އެކަން ފުލުހުންގެ ސަމާލުކަމަށް ގެނެސްފައިވަނިކޮށެވެ. މި ޖަރީމާގެ ސަބަބުން 11.65 މިލިއަން ރުފިޔާގެ ގެއްލުން ރާއްޖެޓީވީއަށް ލިބިފައިވެއެވެ.