އައްޑޫސިޓީ ފޭދޫގެ މިސްކިތަކަށް މީހަކު ބޮޑުކަމުގޮސް، އިތުރު 2 މިސްކިތަށް ގެއްލުންދީފި
16 ޑިސެމްބަރު 2021 | ބުރާސްފަތި 11:44މިމައްސަލައާ ގުޅިގެން އުމުރުން 47 އަހަރުގެ މީހަކުވަނީ ފުލުހުންގެ ބެލުމުގެ ދަށަށް ގެންގޮސްފައި
އައްޑޫސިޓީ ފޭދޫ، މަސްޖިދުލް އަމާން
އައްޑޫސިޓީ ފޭދޫގެ މިސްކިތަކަށް މީހަކު ބޮޑުކަމުގޮސް، އިތުރު 2 މިސްކިތަކަށް ބަޔަކު ގެއްލުން ދީފި އެވެ. މިމައްސަލައާ ގުޅޭގޮތުން ފުލުހުން ވިދާޅުވީ، ފޭދޫގެ މިސްކިތަކަށް ބޮޑުކަމުގޮސްފައިވާ ކަމަށާއި އިތުރު 2 މިސްކިތެއްގެ ތަކެއްޗަށް ގެއްލުން ދީފައިވާ ކަމުގެ މައްސަލައެއް މިއަދު ފަތިހު 5.45ގައި އެއިދާރާއަށް ރިޕޯޓް ކޮށްފައިވާ ކަމަށެވެ.
މިމައްސަލައާއި ގުޅިގެން 47 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުން ވިދާޅުވެއެވެ. މައުލޫމާތު ލިބިފައިވާ ގޮތުގައި، ބޮޑުކަމުގޮސްފައިވަނީ އައްޑޫސިޓީ ފޭދޫ އަވަށުގެ މިސްކިތަކަށެވެ. މިމަންޒަރު ފުރަތަމަ ފެނުނީ އެއަވަށުގައި ހުންނަ މަސްޖިދުލް އަމާން މިސްކިތަށް ފަތިސް ނަމާދަށް ބަންގި ގޮވުމަށް ދިޔަ، މިސްކިތުގެ އިމާމަށެވެ. ރޭ ދަންވަރު އައްޑޫގެ އިތުރު 2 މިސްކިތަކަށް ވަން ބަޔަކުވެސް، މިސްކިތުގެ ހުރުމަތްކަނޑާލައި، މިސްކިތުގައި ބެހެއްޓިފައިވާ ޚަތިމްތައް ބިންމައްޗަށް ވައްޓާލައި ގެއްލުން ދީފައިވާކަމަށް މައުލޫމާތު ލިބެއެވެ.
މި މައްސަލަ ފެންމަތި މިވީ، މިފަހަކަށް އައިސް މާލޭގައިވެސް މިސްކިތުގެ ހުރުމަތް ކެނޑޭފަދަ އަމަލުތައް ހިންގުން ތަކުރާރުވެ، އެކަމުގެ ކަންބޮޑުވުން އޮތް ދަނޑިވަޅެއްގައެވެ. މާލޭގެ މިސްކިތްތަކަށާއި އާންމުތަންތަނަށްވެސް ގަސްތުގައި ކުޑަކަމުގޮސް، ޚަތިމަށް ކުޅުޖަހައި އުޅުނު މ. ޝޭޑީހޯމް ހަސަން ޒިޔާދު ވަނީ ބަންދުކޮށްފައެވެ.
އޭނާއަށް ވަނީ އިސްލާމީ މަރުކަޒަށާއި ޖުމްހޫރީ މައިދާނަށް ކުޑަކަމުދިޔަ މައްސަލާގައި، އާންމު މަސްލަހަތަށް ގެއްލުން ހުރި އަމަލެއް ކުރުމުގެ ކުށުގެ ދެ ދައުވާއެއް ކޮށްފައެވެ. މި ދެ ދައުވާއަށް ވެސް ޒިޔާދު ވަނީ ޝަރީއަތުގެ މަޖިލީހުގައި އިއުތިރާފް ވެފައެވެ.
