ކައުންސިލްތަކުގެ އެސްޖީގެ މަގާމަށް 92 މީހުން އައްޔަންކުރެވިފައިވޭ: ސީއެސްސީ
16 ޑިސެމްބަރު 2021 | ބުރާސްފަތި 09:2358 ރަށުގެ އެސްޖީ ކަމަށް ކުރިމަތިލުމުގެ ފުރުސަތު ހުޅުވާލާފައި ވަނީ މި މަހުގެ 26 ވަނަ ދުވަހުގެ ނިޔަލަށް
އެލްޖީއޭގެ ބައްދަލުވުމެއްގެ ތެރެއިން،
ކައުންސިލްތަކުގެ ސެކެޓްރީ ޖެނެރަލް (އެސްޖީ)ގެ މަގާމަށް 92 މީހުން އައްޔަންކުރެވިފައިވާ ކަމަށް ސިވިލް ސާވިސް ކޮމިޝަން (ސީއެސްސީ) އިން ބުނެފިއެވެ.
ރާއްޖެއެމްވީއަށް ސީއެސްސީގެ ސެކްރެޓަރީ ޖެނެރަލް އަބްދުﷲ ސައީދު ވިދާޅުވީ ކައުންސިލްތަކުގެ އެސްޖީގެ މަގާމަށް މީހުން ހޯދުމަށް ތިން ވަނަ ފަހަރަށް އިއުލާން ކޮށްފައިވާ ކަމަށެވެ. ސައީދު ވިދާޅުވީ ބައެއް ދާއިރާތަކަށް ޝަތުރުހަމަވާ ގާބިލް މީހުން ކުރިމަތިލާފައިނުވާއިރު، އެއްވެސް މީހަކު ކުރިމަތިލާފައިނުވާ ދާއިރާތައް ހިމެނޭ ކަމަށެވެ.
ސިޔާސީ ގޮތުން ބައެއް ފިއްތުންތައް ކުރިމަތިވާ ކަމަށް ދެކެވޭ ވާހަކަތަކަށް ރައްދުދެއްވައި ސައީދު ވިދާޅުވީ އެފަދަ ކަމެއް ކުރިމަތިނުވާ ކަމަށާއި، އޮންނަ އުސޫލުން ހުރިހާ ކަމެއް ކުރިއަށްދާ ކަމަށެވެ. ސައީދު ވިދާޅުވީ އެސްޖީން އައްޔަން ކުރުމުގެ މަސައްކަތްތައް ކުރިއަށްދާއިރު، އިވެލުއޭޝަންގެ މަސައްކަތްތައް ވެސް ކުރިއަށްދާ ކަމަށެވެ. މިއީ ދިގު ޕްރޮސެސްއެއްކަން ފާހަގަކުރައްވައި ސައީދު ވިދާޅުވީ ކައުންސިލްތަކުގެ ލަފަޔާއެކު، އިންޓަވިޔުއާއި އިމްތިހާން ހަދަން ޖެހުމަކީ ވެސް ވަގުތު ނަގާނެ ކަމެއް ކަމަށެވެ.
ސީއެސްސީން އެސްޖީން ހޯދުމަށް 58 ރަށުގެ އެސްޖީ ކަމަށް ކުރިމަތިލުމުގެ ފުރުސަތު ހުޅުވާލާފައި ވަނީ މި މަހުގެ 26 ވަނަ ދުވަހުގެ ނިޔަލަށެވެ.
ރަށު ކައުންސިލްގެ ސެކްރެޓަރީ ޖެނެރަލަކަށް މުސާރައިގެ ގޮތުގައި މަހަކު 9،300ރ. އަދި އެގްޒެކެޓިވް އެލަވަންސްގެ ގޮތުގައި 6،800ރ. ލިބޭނެއެވެ. އަތޮޅު ކައުންސިލްގެ ސެކްރެޓަރީ ޖެނެރަލްގެ މުސާރައިގެ ގޮތުގައި 12،130ރ. ލިބޭއިރު އެގްޒެކެޓިވް އެލަވަންސްގެ ގޮތުގައި 8،870ރ. ލިބޭނެ އެވެ. މީގެ އިތުރަށް ސިޓީ ކައުންސިލްގެ ސެކްރެޓަރީ ޖެނެރަލަކަށް މަހަކު 20،500ރ. އަދި އެގްޒެކެޓިވް އެލަވަންސްގެ ގޮތުގައި 15،000ރ. ލިބޭނެއެވެ.
އެސްޖީގެ މަގާމަކީ، ކައުންސިލްގެ އިދާރާގެ އިދާރީ އެންމެ އިސް މަގާމެވެ. ކައުންސިލްތަކަށް އެސްޖީން އައްޔަން ކުރަނީ ފަސް އަހަރަށެވެ.
