ކޮމަންޑޫ ދާއިރާގެ މެމްބަރ ހުސައިން ވަހީދު އަވަހާރަވުމުގެ ހިތާމައިގައި ރައްޔިތުންގެ މަޖިލީހުން ހަމަހިމޭންކަމުގެ ސުކޫތެއް ގެނެސްފިއެވެ.

މިސުކޫތު ގެނެސްފައިވަނީ ދައުރުން ބޭރުން ބާއްވާ 5 ވަނަ ޚާއްސަ ޖަލްސާ ފެށުމުގެ ކުރިންނެވެ.

ރައްޔިތުންގެ މަޖިލީހުގައި ކޮމަންޑޫ ދާއިރާ ތަމްސީލުކުރައްވަމުން ގެންދެވި ހުސައިން ވަހީދު އަވަހާރަވެފައިވަނީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށެވެ. ހުސައިން ވަހީދު އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް، މިމަހުގެ 13ވީ ހޯމަ ދުވަހުގެ މެންދަމު 1:25ހާއިރުއެވެ.

ބުރާސްފަތި ދުވަހު ކުރިއަށް ގެންދާ ރައްޔިތުންގެ މަޖިލީހުގެ ޖަލްސާގައި ސުކޫތެއް ގެނެސްފައިވާއިރު، ތައުޒިޔާގެ ދަފްތަރެއް ވެސް މަޖިލީހުގެ އިދާރާގައި ހުޅުވާފައިވެއެވެ. ތައުޒިޔާގެ ދަފްތަރު ހުޅުވާފައި ހުންނާނީ 16 ޑިސެމްބަރ ވާ ބުރާސްފަތި ދުވަހުގެ 11ން ހަވީރު 4ށް އަދި 19 ޑިސެމްބަރ ވާ އާދިއްތަ ދުވަހުގެ ހެނދުނު 9ން މެންދުރުފަހު 2 އަށެވެ.

މެންބަރު ހުސައިން ވަހީދު ވަނީ 17 ވަނަ ރައްޔިތުންގެ މަޖިލީހުގައި ވެސް ކޮމަންޑޫ ދާއިރާގެ މެމްބަރުކަން ކުރައްވާފައެވެ. 19 ވަނަ ރައްޔިތުންގެ މަޖިލީހުގައި ހުސައިން ވަނީ މާލިއްޔަތު ކޮމިޓީ، އިމްތިޔާޒު އަދި ސުލޫކު ކޮމިޓީ، ބަޖެޓް ދިރާސާކުރާ ކޮމިޓީ، މުޅި މަޖިލީހުގެ ކޮމިޓީއާއި މާލިއްޔަތު ކޮމިޓީ އަދި ލާމަރުކަޒީ ކޮމިޓީގެ ޖޮއިންޓް ކޮމިޓީގައި މަސައްކަތްކުރައްވާފައެވެ.

މެންބަރު ހުސައިން ވަހީދު ވަނީ ދުބާއީގައި ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވާފައެވެ. އެއަށްފަހު މާލެ ވަޑައިގެންނެވީ މި އަހަރުގެ މާޗް މަހުގެ ތެރޭގައެވެ. އެއަށްފަހު ވެސް ކެންސަރު ބައްޔަށް ފަރުވާ ހޯއްދަވަމުން ގެންދެވިއެވެ. މާޗް މަހުން ފެށިގެން ހުސައިން ވަހީދު ގެންދެވީ މަޖިލީހުގެ ޖަލްސާތަކަށް ނިކުންނަވަމުންނެވެ.

ހުސައިން ވަހީދަކީ ވިޔަފާރީގެ ރޮނގުން ވެސް ފާހަގަ ކޮށްލެވޭ ބޭފުޅެކެވެ. އޭނާ ވަނީ ފުޅާ ދާއިރާއެއްގައި ލަކުޑީގެ ވިޔަފާރި ވެސް ކުރައްވާފައެވެ.