ޤުރުއާނާއި އިސްލާމް ފޮތްތަކުގައި ހުރި އާޔަތްތައް އުނިކުރަން ނިންމުމަށްފަހު އަލުން އެ ނިންމުން ބާތިލްކޮށް، ފޮތްތަކުގައި އާޔަތްތައް ހިމެނުމަށް އެޑިއުކޭޝަން މިނިސްޓްރީން ނިންމައިފިއެވެ.
އެޑިއުކޭޝަން މިނިސްޓްރީން މިގޮތަށް ނިންމާފައިވަނީ ޤުރުއާނާއި އިސްލާމް ފޮތްތަކުގައި ހުރި އާޔަތްތައް އުނިކުރަން ނިންމުމަށްފަހު އެކަން ނެޝަނަލް އިންސްޓިޓިއުޓް ފޮރ އެޑިއުކޭޝަނަށް އެންގި ސިޓީ ލީކުވުމާ ގުޅިގެންނެވެ. މިކަމާ ގުޅިގެން މީޑިއާތަކުން ސުވާލު ކުރިނަމަވެސް އެޑިއުކޭޝަން މިނިސްޓްރީން މީގެ ކުރިން ވަކި އެއްޗެއް ބުނެފައެއް ނުވެއެވެ. މީގެ ކުރިން އެޑިއުކޭޝަން މިނިސްޓްރީން ބުނެފައިވަނީ ޤުރުއާނާއި އިސްލާމް ފޮތްތަކުގައި ހުރި އާޔަތްތައް އުނިކުރަން ނިންމާފައި ނުވާ ކަމަށެވެ.
މި މައްސަލަ ހޫނުވެފައިވަނިކޮށް އެޑިއުކޭޝަން މިނިސްޓްރީން ބުރާސްފަތި ދުވަހު ނެރުނު ނޫސްބަޔާނެއްގައި ބުނެފައިވަނީ އަލަށް ޗާޕްކޮށްގެން ނެރުނު ބައެއް ފޮތްތަކާއި ކުރީގެ ޗާޕްތަކުގައި ޤުރުއާނުގެ ބައެއް އާޔަތްތަކާއި ކަލިމަތައް ލިޔުމުގައި ކުށް ހުރިކަން ފާހަގަކުރެވި، މިކަން ހައްލުކުރުމަށް ކުރެވުނު މަޝްވަރާތަކުގައި ޤުރުއާނުގެ އާޔަތްތައް ފޮތްތަކުގައި ލިޔުމުގެ ބަދަލުގައި ޚަތިމަށް ނުވަތަ އައްމާފޮތަށް ހަވާލާދިނުމަށް (ރިފަރެންސް ދިނުމަށް) މަޝްވަރާކުރެވި މިކަން ބަޔާންކޮށް އެންއައިއީ އަށް ސިޓީއެއްފޮނުވުނު ކަމަށެވެ.
އަދި މިގޮތަށް މަޝްވަރާ ކުރެވުނީ އެއްވެސް ހާލެއްގައި ދަރިވަރުން ޤުރުއާނަށް ދޭ އަހައްމިއްޔަތުކަން ކުޑަކުރުމުގެ ނިޔަތެއްގައިނޫން ކަމުގައެވެ. އެ ގޮތަށް މަޝްވަރާ ކުރެވުނީ ޤުރުއާން ލިޔާއިރު ޖެހޭ ކުށްތައް ތަކުރާރު ނުވާނެގޮތެއް ހެދުމަށާއި، މިފޮތްތައް ނައްތާލާއިރު ޤުރުއާންގެ އާޔަތްތަކަށް އިހާނެތިކޮށް ބައެއް ފަހަރު ޢަމަލުކުރެވޭކަމަށް ބައެއް ޢިލްމުވެރިން ވިދާޅުވާތީއެވެ. ނަމަވެސް އެއީ ރަނގަޅު ކަމެއް ނޫން ކަމަށް ވިސްނި، އަދި ދަރިވަރުންނަށް ކޮންމެ ފަހަރަކު ޚަތިމަށް ނުވަތަ އައްމާފޮތަށް ބެލުމަކީ ދަތި ކަމަކަށް ވާނެ ކަމުން އެ ސިޓީއަށް ޢަމަލު ނުކުރުމަށް ޖެހިގެން އައި ދުވަހު އެންއައިއީ އަށް އަންގާފައިވާނެ ކަމަށެވެ. މިއާއެކު އެޑިއުކޭޝަން މިނިސްޓްރީން ވަނީ ލިޔުމުން ކުރިން ފޮނުވުނު ސިޓީ ބާތިލް ވެސް ކޮށްފައެވެ.
އެޑިއުކޭޝަނުން ބުނީ މިނިސްޓްރީން ނިންމީ އިސްލާމް ފޮތާއި ޤުރުއާން ފޮތްތަކުގައި ހުރި ކުށްތައް އިސްލާހުކޮށް ޕްރޫފް ރީޑިންގ ވަރުގަދަ ކުރުމަށް ކަމަށެވެ. އަދި މިފަހަރު ފޮތްތައް ޗާޕުކުރަން ފޮނުވާ އިރު ކުށްތައް އިސްލާހުވެފައިވާކަން ކަށަވަރު ކުރަން ވެސް އެންއައިއީ އަށް އަންގާފައިވާނެ ކަމަށާއި، މީގެ ދުވަސްކޮޅެއް ކުރިން މިސުވާލު މީޑިއާތަކުން ކުރުމުން ވެސް ޤުރުއާންގެ އާޔަތްތައް އެ ފޮތްތަކުން އުނި ނުކުރާނެ ކަމަށް ބުނެފައިވާނެ ކަމަށެވެ. އަދި މިކަމުގައި މިނިސްޓްރީން ޢަމަލުކުރަން ނިންމާފައިވާގޮތް ވެސް ވާނީ ހިއްސާކޮށްފައި ކަމަށާއި، މި ޚަބަރާ ގުޅިގެން ބެލެނިވެރީންގެ ހިތުގައި އުފެދުނު ނުތަނަސްކަމަށްޓަކައި ނިހާޔަތަށް މާފަށް އެދޭކަމަށް މިނިސްޓްރީން ބުނެއެވެ. އަދި މިނިސްޓްރީ އޮފް އެޑިޔުކޭޝަނުން އަބަދުވެސް މަސައްކަތްކުރަނީ ދަރިވަރުންގެ ހިތްތަކުގައި ދީނީ ރޫހު އާލާކޮށް، ދީނީ ލޯބި އަށަގެންނެވުމަށް ކަމަށް ބުނެފައިވެއެވެ.
