އެލްޖީއޭގެ ނިންމުމަށް ޖޭމްސް ޑޯރިސްގެ ފާޑުކިއުންތައް

ހޯމް މިނިސްޓްރީގެ ހާއްސަ ހުއްދައެއް ލިބިގެން މެނުވީ ބޭރުގެ ޖަމާއަތްތަކާ ޑިޕްލޮމެޓުންނާ ބައްދަލުނުކުރުމަށް ކައުންސިލްތަކަށް އެލްޖީއޭ އިން އެންގި އެންގުމަށް އިނގިރޭސިވިލާތުން ރާއްޖެއަށް ކަނޑައަޅާފައި ހުންނަވާ ސަފީރު ޖޭމްސް ޑޯރިސް ފާޑުވިދާޅުވެއްޖެއެވެ.

ސޯޝަލް މީޑިއާ މެދުވެރިކޮށް ޑޯރިސް ވިދާޅުވެފައިވަނީ ކައުންސިލްތަކުގެ ބެލެނިވެރިފަރާތުން ނިންމާފައިވާ މިނިންމުމަކީ ރާއްޖެއިން ނިންމި އެންމެ ފަހުގެ ހިތާމަވެރި ނިންމުން ކަމަށެވެ.

ޑޯރިސް މިހެންވިދާޅުވެފައިވަނީ އެބޭފުޅާ މިވަގުތު ތިނަދޫގައި ހުރެ ހޯމަ ދުވަހު އެރަށު މީހުންނާ ބައްދަލުކުރައްވައި އެރަށުގެ ކައުންސިލަރުންނާ ބައްދަލުކުރައްވަން ނިންމަވައިފައިވަނިކޮށް އެލްޖީއޭއިން ކައުންސިލްތަކަށް އެންގި އެންގުމާ ގުޅިގެންނެވެ.

ހޯމަ ދުވަހު އެލްޖީއޭއިން ނެރުނު ސާކިއުލަރގައި ބުނެފައިވަނީ ލޯކަލް ކައުންސިލުތަކަކީ ސަރުކާރުގެ ޚިދުމަތުގެ ފަށަލައަކަށްވީ ހިނދު ކައުންސިލުގެ އަމަލުތަކާއި ކުރާ މުއާމަލާތްތައް ރައްދުވާ ފަރާތަކީ ދިވެހި ސަރުކާރު ކަމަށްވީ ހިނދު، ބޭރުގެ އެކި އެކި ފަރާތްތަކާއި ލޯކަލް ކައުންސިލުތަކުން މުއާމަލާތުކޮށް ބައްދަލުވުންތައް ބާއްވާނަމަ ޔުނިޓަރީ ދައުލަތުގެ ސިފަ ގެއްލި، ދިވެހިރާއްޖޭގެ ހާރިޖީ އަދި ދާހިލީ ސިޔާސަތުތަކަށް ބުރޫ އަރައި ދިވެހި ރާއްޖެއިން ތަސްދީޤް ކޮށްފައިވާ ބައެއް މުއާހަދާތަކާއި އެއްބަސްވުންތަކަށް ފުށޫއަރާ ގޮތްވުމަކީ އެކަށީގެންވާ ކަމެއް ކަމުގައި ބުނެފައިވެއެވެ.