ކީރިތި ގުރުއާނުގެ ތަރުޖަމާ ޗާޕުކުރަން ނޮވެލްޓީއަށް ދިން 30 މިލިއަން ރުފިޔާ ހޯދުމަށް އަންގައިފި
ޗާޕް ކުރަން ދިން ފޮތްތަކުގެ ދެބައިކުޅަ އެއްބަޔަށް ވުރެ ގިނަ ފޮތް ސަރުކާރާ ހަވާލުނުކުރާ ކަމަށް އޭސީސީން ބުނޭ
ކީރިތި ގުރުއާން
ކީރިތި ގުރުއާނުގެ ދިވެހި ތަރުޖަމާ ޗާޕުކުރަން ހަވާލުކުރި ނޮވެލްޓީ ޕްރިންޓާސް އަށް ސަރުކާރުން ދިން 30 މިލިއަން ރުފިޔާ އަނބުރާ ހޯދަން މިނިސްޓްރީ އޮފް ފިނޭންސް އެންޑް ޓްރެޒަރީ އާއި އެޓާރނީ ޖެނެރަލްގެ އޮފީހަށް އެންޓި ކޮރަޕްޝަން ކޮމިޝަން (އޭސީސީ) އިން އަންގައިފި އެވެ.
އޭސީސީން ނެރެފައިވާ ބަޔާނެއްގައި ބުނެފައިވަނީ ކީރިތި ޤުރުއާނުގެ ދިވެހި ތަރުޖަމާގެ ޗާޕް ތައްޔާރުކުރުމަށް މިނިސްޓްރީ އޮފް ފިނޭންސް އެންޑް ޓްރެޜަރީއާއި އެމަސައްކަތް ޙަވާލުކުރި ކުންފުންޏާ ދެމެދު ވެފައިވާ އެއްބަސްވުމުގައިވާ ޖުމުލަ އަގު 30,801,000.00 (ތިރީސް މިލިއަން އައްލައްކަ އެއްހާސް) ރުފިޔާ ވަނީ އެ ކުންފުންޏަށް ދޫކޮށްފައިވާކަން ހާމަވެފައިވާ ކަމަށާއި އެ މަސައްކަތުގެ ފުރިހަމައަގު ދަޢުލަތުން އެ ކުންފުންޏަށް ދައްކާފައިވާއިރު، ޗާޕްކުރަން ޙަވާލުކޮށްފައިވާ 150000 ކީރިތި ޤުރުއާނުގެ ތަރުޖަމާގެ ތެރެއިން، އެކުންފުނިން ޗާޕްކޮށް ދަޢުލަތަށް ފޯރުކޮށްދިން 51840 ކީރިތި ޤުރުއާނުގެ ތަރުޖަމާގެ ޗާޕުތަކުގައި ކުށް ހުރުމާއި އަދި ޕްރިންޓްކުރުމުގައި މައްސަލަތަކެއް ހުރުމުން، އެއީ އޭގެއިން އެއްވެސް ބޭނުމެއް ކުރެވޭފަދަ ފޮތްތަކަކަށްނުވުމާއި، އަދި ބާކީ ހުރި 98160 ކީރިތި ޤުރުއާނުގެ ތަރުޖަމާގެ ޗާޕު ވެސް ދަޢުލަތަށް ލިބިފައި ނުވާތީ، އެމަސައްކަތް ކުރުމަށް އެކުންފުންޏަށް ދަޢުލަތުން ދީފައިވާ ޖުމުލަ އަގު ކަމަށްވާ 30,801,000.00 (ތިރީސް މިލިއަން އައްލައްކަ އެއްހާސް) ރުފިޔާ ދަޢުލަތަށް އަނބުރާ ހޯދުމަށް، މިނިސްޓްރީ އޮފް ފިނޭންސް އެންޑް ޓްރެޒަރީ އާއި އެޓާރނީ ޖެނެރަލްގެ އޮފީހަށް އަންގާފައިވާ ކަމަށެވެ.
އޭސީސީން ބަޔާނުގައި ބުނީ ޗާޕުކޮށް ހަވާލުކުރި 51،840 ތަރުޖަމާގައި ކުށް ހުރުމުންނާއި ޕްރިންޓްކުރުމުގައި މައްސަލަތަކެއް ހުރުމުން އޭގެ ބޭނުން ކުރެވިފައި ނުވާ ކަމަށެވެ. އަދި ބާކީ ހުރި 98،160 ފޮތް ސަރުކާރަށް ލިބިފައި ނުވާ ކަމަށް ވެސް އޭސީސީން ބުންޏެވެ.
ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި ގުރުއާނުގެ ދިވެހި ތަރުޖަމާގެ 150،000 ފޮތް ޗާޕްކުރަން އިސްލާމިކް މިނިސްޓްރީން ނޮވެލްޓީ ޕްރިންޓާސްއާ ހަވާލުކޮށްފައިވާއިރު ޗާޕް ކުރަން ދިން ފޮތްތަކުގެ ދެބައިކުޅަ އެއްބަޔަށް ވުރެ ގިނަ ފޮތް ސަރުކާރާ ހަވާލުނުކުރާ ކަމަށް އޭސީސީން ބުނެ އެވެ. އަދި ޗާޕުކުރި ފޮތްތަކުގައި ކުށް ހުރި މައްސަލަ ވެސް އޭސީސީގެ ރިޕޯޓްގައި ފާހަގަކޮށްފައިވެ އެވެ.
އޭސީސީން ބުނީ އެ މެމޯގައި ސްޓޭޓް މިނިސްޓަރު ސޮއިކުރެއްވި ކަމަށް އެއްބަސްވެވަޑައިގެންފައިވާ ކަމަށާއި އެ މެމޯގައި ކުރި ސޮޔަކީ އޭނާގެ ސޮއިކަން އެނަލިސް ރިޕޯޓުން އެނގޭ ކަމަށެވެ.
އޭސީސީން ބުނި ގޮތުގައި ހުރިހާ ފޮތެއް ލިބުނު ކަމަށް ބުނެ، އިންޓާނަލް މެމޯއެއް ތައްޔާރުކޮށް ފައިސާ ދޫކުރުމަށް އެންގި އެންގުމަކީ ނުލިބޭ މުދަލަކަށް ފައިސާ ދޫކުރަން އެންގުމެވެ. އަދި އެ ފައިސާ ދޫކުރުމަކީ ވަކި ފަރާތަކަށް ނާޖައިޒު ފައިދާ ހޯދައި ދިނުމަށް ހިންގާފައިވާ އަމަލެއްކަން ތަހުގީގަށް ފާހަގަކުރެވިފައިވާ ކަމަށް ވެސް އޭސީސީން ބުންޏެވެ.
ގުރުއާނުގެ ދިވެހި ތަރުޖަމާ ޗާޕްކޮށް ހަމައަށް ނުލިބެނީސް ފައިސާ ދެއްކި މައްސަލާގައި ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރެއްގެ މައްޗަށް، މަގާމުގެ ނުފޫޒު ބޭނުންކޮށްގެން ވަކި ފަރާތަކަށް ނާޖާއިޒު ފައިދާއެއް ހޯދައި ދިނުމުގެ ކުށުގެ ދައުވާކޮށް ދިނުމަށް އޭސީސީން ވަނީ ޕްރޮސިކިއުޓާ ޖެނެރަލްގެ އޮފީހަށް ފޮނުވައިފަ އެވެ
