ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރ ހުސައިން ވަހީދަކީ ދަތި އުނދަގޫ ދަނޑިވަޅުގައި ވިސްނުންތެރިކަމާއެކުގައި ވަރަށް ރަނގަޅު ލަފާ ދެއްވަމުން ގެންދެވި ބޭފުޅެއްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މަރުހޫމް ހުސައިންގެ ހަނދާނުގައި ތައުޒިޔާގެ ދަފްތަރު ހުޅުވުމަށް ބުދަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ކޮމަންޑޫ ދާއިރާއަށް ގެއްލިގެންދިޔައީ ޚިދުމަތްތެރި ޚާދިމެއްކަމަށެވެ. އަދި އާއިލާއަށް ގެއްލިގެންދިޔައީ ލޯބިވާ އަޚެއްކަމަށެވެ.
ޑިމޮކްރަސީގެ ހަޔާތުގައި އިސްދައުރެއް އަދާކުރެއްވި އެއް ބޭފުޅަކަށް މަރުހޫމް ހުސައިން ވާކަން ފާހަގަކުރައްވާ ރައީސް ވިދާޅުވީ ހުސައިން އަކީ މަޑުމައިތިރިކަމާއި ކެތްތެރިކަމާއި ވިސްނުންތެރިކަމާއެކުގައި މަސައްކަތްކުރެއްވި ބޭފުޅެއް ކަމަށެވެ. 2009 ވަނަ އަހަރު ފެށުނު 17 ވަނަ ރައްޔިތުންގެ މަޖިލީހުގައި ހުސައިން އާއެކު މަސައްކަތްކުރެއްވި ކަމަށް ރައީސް ވިދާޅުވިއެވެ. އެދުވަސްވަރަކީ އެމްޑީޕީ ވެރިކަމުގައި އޮތް ދުވަސްވަރަށް ވިޔަސް މަޖިލީހުގައި އެމްޑީޕީގެ މެޖޯރިޓީއެއް ނެތްކަމަށް ރައީސް ވިދާޅުވިއެވެ.
އެދުވަސްވަރަކީ މަޖިލީހުގެ ހަޔާތުގައި ހޭދަކުރެއްވި އެންމެ އުނދަގޫ އެއް ދުވަސްވަރު ކަމަށް ރައީސް ވިދާޅުވިއެވެ.
އެދުވަސްވަރު އަޅުގަނޑުމެން ޑިމޮކްރަސީއަށް ކުރި މަސައްކަތުގެ ނަތީޖާ ހޯދުމަށްޓަކައި މަޖިލިސް ތެރޭގައި ވަރަށް އުނދަގޫ ބުރަ މަސައްކަތްތަކެއް ކުރަންޖެހުނު. އެދަތި އުނދަގޫ ދަނޑިވަޅުގައި ވިސްނުންތެރިކަމާއެކުގައި ވަރަށް ރަނގަޅު ލަފާ އަޅުގަނޑުމެންނަށް ދެއްވަމުން ގެންދެވި. އެހަނދާންތައް އަދިވެސް އަޅުގަނޑުގެ ހިތުގައި އެބަހުރި. އެއަށްފަހުގައި 2012 ވަނަ އަހަރު ވެރިކަން ބަދަލުވެގެން ގޮސް އަޅުގަނޑުމެން މަގުމަތިވެ އިދިކޮޅުގައި މަސައްކަތްކުރަމުންދިޔައިރުގައި ވަރުބަލިކަމެއްނެތި ހުރިހާ ކަމެއްގައި ބައިވެރިވެވަޑައިގެން އަޅުގަނޑުމެންނާ އެކީގައި ދެމިހުންނެވި މަސައްކަތުގައި. އެއީ ހަނދާން ނެތޭނެ ދުވަސްތަކެއް ނޫން.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ ސިޔާސީ ގޮތުން ހުސައިންއާ އޮތް ގުޅުމުގެ މާކުރިން ވެސް އެއީ ރަހުމަތްތެރިއެއްކަމަށެވެ. އެހެންކަމުން ގެއްލިގެން އެދިޔައީ ތެދުވެރި ހެޔޮއެދޭ ގާތް ރަހުމަތްތެރިއެއްކަމަށް ރައީސް ވިދާޅުވިއެވެ.
ހުސައިން އަކީ ދިމާވާ ކޮންމެ ކަމެއްވެސް ވަރަށް ޕޮޒިޓިވްކޮށް ވިސްނަވާ ކަންކަމާއި ހިތްހަމަޖެހިވަޑައިގެން ހުންނަވާ ބޭފުޅެއްކަމަށް ރައީސް ވިދާޅުވިއެވެ. އަދި ކިތަންމެ ބޮޑު އުނދަގުލެއް ކުރިމަތިވެގެންދާ ވަގުތުގައިވެސް އެކަމުގެ ރަނގަޅު ގޮތް އޮންނާނެކަން ގަބޫލުކުރައްވާ އެގޮތަަކަށް މަސައްކަތްކުރެއްވުމުގައި ހުސައިން ހުންނަވާކަމަށް ރައީސް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ވަކިވެގެން ދިޔައީ މަޖިލީހުގެ ހަޔާތުގައި ފާހަގަކުރެވޭ ޚިދުމަތްތަކެއް ކޮށްދެއްވާފައިވާ ބޭފުޅެއްކަމަށެވެ. ދެ ދައުރު މަޖިލީހަށް އިންތިޚާބު ވެވަޑައިގެން މަސައްކަތްކުރައްވާފައިވާކަމަށް ނަޝީދު ވިދާޅުވިއެވެ.
އަދި ހުސައިން އަކީ ނަފުރަތާއި ބައިބައިވުން އުފެދޭ ކަންކަމާ ބީރައްޓެހި ބޭފުޅެއްކަމަށް ނަޝީދު ވިދާޅުވިއެވެ.
ހުސައިން ވަހީދުގެ ވާހަކަފުޅުވެސް އަދި ވިސްނުންފުޅުވެސް ބަހައްޓަވަނީ މިސާލަކަށް ވާމިންވަރަށް. ފިތުނަވެރިކަމާއި ހަސަދަވެރިކަމާއި ބައިބައިވުމާއި ނަފްރަތާއި ނޭދެވޭ އަމަލުތަކަކީ އެބޭފުޅާއާ އެންމެ ބީރައްޓެހި އަމަލުތައް. އަޅުގަނޑުގެ ސިޔާސީ ހަޔާތުގައި ހުސައިން ވަހީދު ކަންކަން ހެޔޮކޮށް ދިނުމަށް ކަންކަން ހައްލުކޮށްދިނުމަށް ކަންކަމުގައި މަގު ދައްކައިދިނުމަށް ދެއްވާފައިވާ ހެޔޮލަފާ ނަސޭހަތާއި އަޅުގަނޑަށް ދެއްވިހާ އިރުޝާދު އިއްޔެ މެންދުރުގެ ކަމެއް ފަދައިން އަޅުގަނޑުގެ ހަނދާނުގައި ބިންވަޅު ނެގިފައި އެބަހުރި.ރައީސް މުހައްމަދު ނަޝީދު/ ރައްޔިތުންގެ މަޖިލީހުގެ ރައީސް
ނަޝީދު ވިދާޅުވީ މަރުހޫމް ހުސައިން އާއެކު 10 ކެމްޕެއިނެއްގައި މަސައްކަތްކުރެއްވި ކަމަށެވެ. އަދި އެކުގައި 32ށް ވުރެ ގިނަ ރަށަށް ވަޑައިގެންނެވިކަމަށް ނަޝީދު ވިދާޅުވިއެވެ.
މެމްބަރު ހުސައިން ވަހީދު އަވަހާރަވެފައިވަނީ ކެންސަރު ބައްޔަށް ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއް ވެފައިވަނިކޮށެވެ. ހުސައިން ވަހީދު އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް، ހޯމަ ދުވަހުގެ މެންދަމު 1:25 އެހާއިރުއެވެ.
މެންބަރު ހުސައިން ވަހީދު ވަނީ ދުބާއީގައި ވެސް ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވާފައެވެ. ހުސައިން ވަހީދަކީ ވިޔަފާރީގެ ރޮނގުންވެސް ފާހަގަ ކޮށްލެވޭ ބޭފުޅެކެވެ.
ހުސައިންގެ ޖަނާޒާ އޮތީ އަންގާރަ ދުވަހުގެ މެންދުރު ނަމާދުގެ ފަހުން އިސްލާމީ މަރުކަޒުގައި ކުރެވުނު ކަށުނަމާދަށްފަހު އާސަހަރާގައެވެ. މެންބަރުގެ ޖަނާޒާގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ނާއިބުރައީސް ފައިސަލް ނަސީމާއި ސަރުކާރުގެ އިސްވެރިންގެ އިތުރުން ވެސް ވަރަށް ގިނަ ބަޔަކު ބައިވެރިވިއެވެ.
