ކުޅުދުއްފުށި ސިޓީގައި ޗައިލްޑް ޑިވެލޮޕްމެންޓް ސެންޓަރެއް ގާއިމުކުރަނީ
15 ޑިސެމްބަރު 2021 | ބުދަ 10:28ކުރިއަށް އޮތްތަނުގައި މަސައްކަތްކުރަމުން ދަނީ އޮކިއުޕޭޝަނަލް ތެރަޕީ އާއި ކްލިނިކަލް ސައިކޮލޮޖީ އަދި އޯޑިއޯމެޓްރީ ފަދަ ޚިދުމަތްތައް ކޭއާރުއެޗުގައި ތައާރަފުކުރުމަށްކަމަށް
ޝާމިލް ކުރުމުގެ ސިޔާސަތައް އަހުލުވެރި ކުރުމަށް ސަރަހައްދީ ފެންވަރުގައި ފެށި މަސައްކަތްު ބައްދަލްވުމުގައި އަހުމަދު ދާއޫދު ޥާހަކަ ދައްކަވަނީ
މި ސަރަހައްދަށް އަމާޒުކޮށްގެން ކުޅުދުއްފުށި ސިޓީގައި ޗައިލްޑް ޑިވެލޮޕްމެންޓް ސެންޓަރެއް ގާއިމުކުރުމަށް ސަރުކާރުން ނިންމާފައިވާކަމަށް، ކުޅުދުއްފުށީ ރީޖަނަލް ހޮސްޕިޓަލްގެ ޑެޕިއުޓީ ސީއީއޯ އަހުމަދު ދާއޫދު ވިދާޅުވެއްޖެއެވެ.
ޝާމިލުކުރުމުގެ ސިޔާސަތަށް އަހުލުވެރިކުރުމަށް ސަރަހައްދީ ފެންވަރުގައި ބުދަ ދުވަހު ކުޅުދުއްފުށީގައި ފެށި މަސައްކަތު ބައްދަލުވުން ޝަރަފުވެރިކޮށްދެއްވައި ވާހަކަދައްކަވަމުން އަހުމަދު ދާއޫދު ވިދާޅުވީ ޚާއްޞަ އެހީއަށް ބޭނުންވާ ކުދިންނަށް ޚިދުމަތްތައް ފޯރުކޮށްދިނުމުގައި ކޭއާރުއެޗަށް ދިމާވެފައިވާ އެންމެ ބޮޑު ގޮންޖެހުމަކީ އިމާރާތުގެ ދަތިކަމާއި ވަސީލަތްތައް އަދި އިންސާނީ ވަސީލަތް އެކަށީގެންވާ ގޮތުގައި ނުލިބުމުގެ ދަތިކަން ކަމަށެވެ. އެގޮތުން އެކަމުގައި ހުރި ދަތިތައް ސަރުކާރާ ހިއްސާކޮށްފައިވާކަން ވެސް ދާއޫދު ފާހަގަކުރެއްވިއެވެ.
އަހުމަދު ދާއޫދު ވިދާޅުވީ، މިސަރަހައްދަށް އަމާޒުކޮށްގެން ޗައިލްޑް ޑިވެލޮޕްމެންޓް ސެންޓަރެއް ކުޅުދުއްފުށީގައި ގާއިމުކޮށްދެއްވާނެކަމުގެ އުފާވެރި ޚަބަރު ނައިބު ރައީސް ފައިސަލް ނަސީމް ދެއްވާފައިވާ ކަމަށެވެ.
މި ސަރުކާރުން ރާއްޖޭގެ އެކި ސަރަހައްދުތަކުގައި ތެރަޕިޓިކް ޚިދުމަތްތައް ތައާރަފުކުރަމުންދާ ކަމަށާއި، އެގޮތުން ކޭއާރުއެޗުގައި ސްޕީޗް ތެރަޕިސްޓުންގެ ގޮތުގައި ދެ ބޭފުޅަކު މަސައްކަތްކުރައްވަމުންގެންދަވާކަމަށް ވިދާޅުވިއެވެ. އަދި ކުރިއަށް އޮތްތަނުގައި މަސައްކަތްކުރަމުން ދަނީ އޮކިއުޕޭޝަނަލް ތެރަޕީ އާއި ކްލިނިކަލް ސައިކޮލޮޖީ އަދި އޯޑިއޯމެޓްރީ ފަދަ ޚިދުމަތްތައް ކޭއާރުއެޗުގައި ތައާރަފުކުރުމަށްކަމަށް އޭނާ ވިދާޅުވިއެވެ. މިއީ މިހާރުވެސް ގިނަބަޔަކު ހޯދުމަށް އެދެމުން އަންނަ ޚިދުމަތްތަކެއް ކަމުގައި ދާއޫދު ވިދާޅުވިއެވެ.
ދާއޫދު އިތުރަށް ވިދާޅުވީ އިންސާނީ ވަސީލަތްތައް ބިނާކުރުމަށްޓަކާ މިސަރަހައްދަށް އަމާޒުކޮށްގެން އޮކިއުޕޭޝަނަލް ތެރަޕީ އާއި ސްޕީޗް ތެރަޕީ އަދި ކްލިނިކަލް ސައިކޮލޮޖީގެ ދާއިރާއިން ސްކޮލަޝިޕްތަކެއް ވެސް ފޯރުކޮށްދެއްވާފައިވާ ކަމަށާއި، އެކަމަކު އެކަމުގައި ވެސް އެކަށީގެންވާ އަދަދަށް މީހުން ކުރިމަތިލާފައިނުވުމަކީ ހިތާމަކުރާކަމެއް ކަމަށް އޭނާ ފާހަގަކުރެއްވިއެވެ.
ކުޅުދުއްފުށީގައި މި މަހުގެ 15 ،16 މި ދެދުވަހު ކުރިއަށްގެންދާ ޝާމިލުކުރުމުގެ ސިޔާސަތަށް އަހުލުވެރިކުރުމުގެ ސަރަހައްދީ ބައްދަލްވުމުގައި ބައިވެރިވަނީ ހއ އަދި ހދ އަތޮޅުގެ ސްކޫލްތަކުގެ މުދައްރިސުންނެވެ.
