ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު ހުސައިން ވަހީދު އަވަހާރަ ވެއްޖެއެވެ.
މެމްބަރު ހުސައިން ވަހީދު ކެންސަރު ބައްޔަށް ފަރުވާ ހޯއްދަވަމުން ގެންދަވާތާ ވަނީ ގިނަ ދުވަސްތަކެއް ވެފައެވެ. މައުލޫމާތު ލިބޭގޮތުގައި ހުސައިން ވަހީދު އަވަހާރަވީ އޭޑީކޭ ހޮސްޕިޓަލުގައި ފަރުވާ ހޯއްދަވަމުން ދަނިކޮށް ހޯމަ ދުވަހުގެ މެންދަމު 1:25 އެހާއިރުއެވެ.
މެންބަރު ހުސައިން ވަހީދު ގެންދެވީ ދުބާއީގައި ގިނަ ދުވަސްތަކެއް ވަންދެން ކެންސަރު ބައްޔަށް ފަރުވާ ހޯއްދަވަމުންނެވެ. އެއަށްފަހު މާލެ މަޑައިގެންނެވީ މިއަހަރުގެ މާޗް މަހުގެ ތެރޭގައެވެ. އެއަށްފަހުވެސް ކެންސަރު ބައްޔަށް ފަރުވާ ހޯއްދަވަމުން ގެންދެވިއެވެ.
މާޗް މަހުން ފެށިގެން ހުސައިން ވަހީދު ގެންދެވީ މަޖިލީހުގެ ޖަލްސާތަކަށް ނިކުންނަވަމުންނެވެ. ހުސައިން ވަހީދު ވަނީ 17 ވަނަ ރައްޔިތުންގެ މަޖިލީހުގެ މެމްބަރުކަންވެސް ކުރައްވާފައެވެ.
ހުސައިން ވަހީދަކީ ވިޔަފާރީގެ ރޮނގުންވެސް ފާހަގަ ކޮށްލެވޭ ބޭފުޅެކެވެ. އޭނާ ވަނީ ފުޅާ ދާއިރާއެއްގައި ލަކުޑީގެ ވިޔަފާރި ކުރައްވައިފައެވެ.
