ޔުއެފާ ޗެމްޕިއަންސް ލީގުގެ ދެވަނަ ބުރުގެ ގުރުއަތުލުން އަލުން ބޭއްވިއިރު، މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑާއި ޕީއެސްޖީ ކުރިމަތިލާން ޖެހިއްޖެއެވެ.

ޗެމްޕިއަންސް ލީގުގެ ގަދަ 16 ގެ ގުރުނެގުން އެންމެ ފުރަތަ ހޯމަ ދުވަހުގެ ހަވީރު ސްވިޓްޒަލެންޑުގެ ނިޔޯނުގައި ހުންނަ ޔުއެފާ ހެޑްކުއާޓަރުގައި ކުރިއަށްދިޔައިރު، އެ ފަހަރު ޕީއެސްޖީއަށް ދިމާވީ މެންޗެސްޓާ ޔުނައިޓެޑެވެ. އެކަމަކު ޗެމްޕިއަންސް ލީގުގެ ދެވަނަ ބުރުގެ މެޗުތަކުގެ ގުރުއަތުލުން އަލުން ބާއްވަން ޔުއެފާއިން ނިންމީ ޔުނައިޓެޑާއި އެތުލެޓިކޯ މެޑްރިޑުގެ ގުރުއަތުލުންތައް ކަނޑައެޅުމުގައި ހެދުނު ގޯސްތަކެއްގެ މައްސަލަ ހޫނުވެ، ގިނަ ޓީމުތަކަކުން އަލުން ގުރުއަތުލުން ބާއްވަން އެދުމާ ގުޅިގެންނެވެ.

އެގޮތުން އެންމެ ފުރަތަމަ ބޭއްވި ގުރުލުމުގައި ފާހަގަކުރެވުނު ފުރަތަމަ މައްސަލައަކީ މެންޗެސްޓާ ޔުނައިޓެޑާއި ވިޔަރެއާލް ކުޅެން ޖެހޭގޮތަށް ގުރުއަތުން ދިމާވުމެވެ. ޔުއެފާގެ ގަވާއިދުގައިވާ ގޮތުން އެއް ގްރޫޕެއްގައި އޮތް ދެ ޓީމަކަށް ދެވަނަ ބުރުގައި ނުކުޅެވޭނެއެވެ. އެހެންކަމުން އަލުން ގުރުއަތުލައިގެން ޔުނައިޓެޑަށް އެ ފަހަރު ދިމާވީ ޕީއެސްޖީއެވެ.

ދެން ފާހަގަކުރެވުނު އަނެއް މައްސަލައަކީ ލިވަޕޫލުގެ ބޯޅަ އެތުލެޓިކޯއާ ކުޅެން ޖެހޭ ގުރުއަތުލުމުގައި ހިމެނުމެވެ. އެތުލެޓިކޯ އާއި ލިވަޕޫލް އެއް ގްރޫޕެއްގައި ކުޅެފައިވާއިރު، މި ދެ ޓީމަށް ދެވަނަ ބުުރުގައި ބައްދަލުނުކުރެވޭނެއެވެ. މީގެ އިތުރުން އެތުލެޓިކޯގެ ގުރުއަތުލުމުގައި ޔުނައިޓެޑް ހިމަނާފައިނުވުންވެސް ވަނީ ފާހަގަވެފައެވެ.

އެއާއެކު އަލުން ގުރުލާން ޔުއެފާގެ ކޮމްޕެޓިޝަން ޑިޕާޓްމަންޓުން ނިންމިއިރު، ހޯމަ ދުވަހުގެރޭ ކުރިއަށްދިޔަ ގުރުއަތުލުމުގައި ރެއާލާއި ޕީއެސްޖީ ބައްދަލުކުރަން ވަނީ ޖެހިފައެވެ. މި ފަހަރުގެ ޗެމްޕިއަންސް ލީގުގެ ދެވަނަ ބުރުގައި ރެއާލާއި ޕީއެސްޖީ ބައްދަލުކުރާއިރު، މި މުބާރާތުގައި މިހާތަނަށް މި ދެ ޓީމު ކުޅުނު ހަ މެޗުގެ ތެރެއިން ތިން މެޗުން ރެއާލް ވަނީ މޮޅުވެފައެވެ. ރެއާލް އަތުން ޕީއެސްޖީއަށް ލިބުނު ހަމައެކަނި މޮޅަކީ 2019-2020 ވަނަ އަހަރުގެ ސީޒަނުގެ ގްރޫޕް ސްޓޭޖުގައި އަމިއްލަ ދަނޑުގައި ކުޅުނު މެޗުން ލިބުނު މޮޅެވެ.

މީގެ އިތުރުން ރެއާލާއި ޕީއެސްޖީގެ ކުރިމަތިލުން ޚާއްސަވާނެ ކުޅުންތެރިއަކީ މި ސީޒަނުގައި ރެއާލް ދޫކޮށް ޕީއެސްޖީއަށް ބަދަލުވި ތަޖުރިބާކާރު ޑިފެންޑަރު ސާޖިއޯ ރާމޯސްއަށެވެ. އެގޮތުން މިއީ ރާމޯސް ފުރަތަމަ ފަހަރަށް އޭނާގެ ކުރީގެ ކުލަބާ ދެކޮޅަށް ކުޅެން ލިބޭ ފުރުސަތެވެ. ރާމޯސް އެންމެ ފަހުން ހުރީ ރެއާލުގެ ކެޕްޓަނެއްގެ ގޮތުގައި ހުރިއިރު، އޭނާ ވަނީ އެ ޓީމާއެކު ޗެމްޕިއަންސް ލީގު ހަތަރު ފަހަރު ކާމިޔާބުކޮށްފައެވެ.

ޔުއެފާ ޗެމްޕިއަންސް ލީގުގެ ދެވަނަ ބުރުގެ ގުރުއަތުލުން އަލުން ބޭއްވިއިރު، މި ފަހަރު ޔުނައިޓެޑަށް ދިމާވީ އެތުލެޓިކޯ މެޑްރިޑެވެ. އަދި މުޅިން އަލަށް ޗެމްޕިއަންސް ލީގުގެ ދެވަނަ ބުރުގައި ކުޅޭ ސާލްޒްބާގުން ބަޔާން މިއުނިކާ ދެކޮޅަށް ކުޅޭއިރު، ސްޕޯޓިން ލިޒްބަން ކުޅޭނީ މެންޗެސްޓާ ސިޓީއާއެވެ. އަދި ދެވަނަ ބުރުގައި ބެންފީކާ އިން އަޔަކްސްއާ ދެކޮޅަށް ކުޅޭއިރު، މިދިޔަ އަހަރުގެ ޔުއެފާ ޔޫރޮޕާ ލީގުގެ ޗެމްޕިއަން ވިޔަރެއާލް ކުޅޭނީ ޔުވެންޓަސްއާއެވެ.

މީގެ އިތުރުން އިންޓަ މިލާނުން ލިވަޕޫލާ ދެކޮޅަށް ކުޅޭއިރު، އެންމެ ފަހުގެ ޗެމްޕިއަން ޗެލްސީ ބައްދަލުކުރާނީ ލިލްއާއެވެ. ޗެމްޕިއަންސް ލީގުގެ ގުރުއަތުލުން އަލުން ބޭއްވިއިރު، ދެވަނަ ބުރުގެ އަށް މެޗުގެ ތެރެއިން ބަދަނުވެ އޮތީ ޗެލްސީ އާއި ލިލްގެ މެޗު އެކަންޏެވެ.

ޗެމްޕިއަންސް ލީގުގެ މި ފަހަރުގެ ފައިނަލް މެޗު އަންނަ އަހަރު މެއި މަހު ރަޝިއާގެ ސެއިންޓް ޕީޓާސްބާގުގައި ކުޅޭއިރު، ދެވަނަ ބުރުގެ މެޗުތައް ކުޅޭނީ އަންނަ އަހަރުގެ ފެބްރުއަރީ 15-16 އަދި 22-23 ގައެވެ.