އެންމެ ފަހުން އޮތް ރިޔާސީ އިންތިޚާބުގައި އެއްވެސް އޮޅުވާލުމެއް ނެތްކަމަށް އިލެކްޝަން ކޮމިޝަންގެ ކުރީގެ ނާއިބުރައީސް އަހުމަދު އަކްރަމް ވިދާޅުވެއްޖެއެވެ.

އެންމެ ފަހުން 2018ވަނަ އހަރު އޮތް ރިޔާސީ އިންތިޚާބުގައި އޮޅުވާލުންތަކެއް އޮތް ކަމަށް އިދިކޮޅު ކޯލިޝަނުން އަނެއްކާވެސް ބުނަމުންދާ ދަނޑިވަޅެއްގައި، އަކްރަމް ކުރެއްވި ޓްވީޓެއްގައި ވިދާޅުވީ، އަނެއްކާވެސް ދައްކަނީ 2018ވަނަ އަހަރުގެ އިންތިޚާބުގެ ވާހަކަ ކަމަށާއި، އެ އިންތިޚާބުގައި އެއްވެސް އޮޅުވާލުމެއް ނޯންނާނެ ކަމަށާއި، އިންތިޚާބުގެ ނަތީޖާ ރައްޔިތުންނަށް ފޯރުކޮށްދިނީ ބަދަލުކުރުމަކާ ނުލައިކަމަށް މާތްﷲ ގަންދީ ހުވާ ކުރައްވާ ކަަމަށެވެ. ނަތީޖާ އިއުލާން ކޮށްފައިވާނީ ރައްޔިތުން ވޯޓުލާފައިވާ ގޮތަށް ކަމަށް އަކްރަމް ވިދާޅުވިއެވެ.

2018ވަނަ އަހަރުގެ ރިޔާސީ އިންތިޚާބުގައި އޮޅުވާލާފައިވާ ކަމަށްބުނެ އިދިކޮޅުން އޭރު ސުޕްރީމް ކޯޓަށްވެސް މައްސަލަ ހުށަހެޅިއެވެ. އެހެންނަމަވެސް އިންތިޚާބުގެ ނަތީޖާއަށް ބަދަލު އަންނަ ވަރުގެ އެއްވެސް ކަމެއް ހިނގާފައިނުވާ ކަމަށް ކަނޑައަޅައި އިންތިޚާބު ބާތިލް ނުކުރާ ގޮތަށް ސުޕްރީމް ކޯޓުން އޭރު ވަނީ ކަނޑައަޅާފައެވެ. މި މައްސަލަ ހުށަހެޅުއްވީ، ކުރީގެ ރައީސް އަދި އޭރު ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔާމީން ޢަބްދުލްގައްޔޫމްގެ ފަރާތްޕުޅުންނެވެ. ފުލުހުންނާއި ސިފައިން މެދުވެރިކޮށް އިންތިޚާބުގައި ހިނގާފައިވާ ކަންކަން ތަހުގީގު ކޮށްދިނުމަށް މައްސަލަ ހުށަހެޅުއްވި ފަރާތުން އެދިފައިވީ ނަމަވެސް އެކަން އެގޮތަށް ތަހުގީގު ކޮށްދޭން ޖެހޭ އެއްވެސް ސަބަބެއް ނެތް ކަމަށް ސްޕްރީމް ކޯޓުން އޭރު ވަނީ ކަނޑައަޅާފައެވެ.

2018ވަނަ އަހަރުގައި އޮތް ރިޔާސީ އިންތިޚާބުގެ ރަސްމީ ނަތީޖާ ދައްކާގޮތުން ޕީޕީއެމްގެ ރިޔާސީ ކެންޑިޑޭޓް ރައީސް ޢަބްދުﷲ ޔާމީން ޢަބްދުލްގައްޔޫމަށް ލިބިވަޑައިގެންފައިވަނީ 96،052 ވޯޓެވެ. އަދި އެމްޑީޕީގެ ކެންޑިޑޭޓް އިބްރާހީމް މުހައްމަދު ސާލިހަށް ލިބިވަޑައިގެންފައިވަނީ 134،705 ވޯޓެވެ.