މިއަހަރުގެ ނޮވެމްބަރ މަހުގެ ތެރޭގައި ދައުލަތަށް އެންމެ ބޮޑު އާމްދަނީއެއް ލިބިފައިވަނީ ޖީއެސްޓީން ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ން ބުނެފިއެވެ.

މީރާއިން ނެރުނު މިއަހަރުގެ ނޮވެމްބަރ މަހުގެ ތަފާސްހިސާބުތަކުން ދައްކާގޮތުގައި، ޓެކްސްގެ ގޮތުގައި ދައުލަތަށް 976 މިލިއަން ރުފިޔާ ވަނީ ލިބިފައެވެ. ޓެކްސް ނޫން އެހެނިހެން ގޮތްގޮތުން މިދިޔަ މަހު ދައުލަތަށް ލިބުނީ 267.4 މިލިއަން ރުފިޔާއެވެ. މިދިޔަ މަހުގެ ތެރޭގައި ދައުލަތަށް ޖުމްލަ 1،243.4 މިލިއަން ރުފިޔާ ވަނީ ލިބިފައެވެ.

މީރާގެ ތަފާސްހިސާބުތަކުން ދައްކާ ގޮތުން ޖީއެސްޓިގެ ގޮތުގައި މިދިޔަ މަހު ދައުލަތަށް ލިބުނީ 773.39 މިލިއަން ރުފިޔާއެވެ. އަދި އިންކަމް ޓެކްސްގެ ގޮތުގައި 80.82 މިލިއަން ރުފިޔާ ލިބުނު އިރު، ގްރީން ޓެކްސްގެ ގޮތުގައި ލިބިފައި ވަނީ 75.85 މިލިއަން ރުފިޔާއެވެ. މީގެ އިތުރުން ލީސް އެކްސްޓެންޝަންގެ ގޮތުގައި 77 މިލިއަން ރުފިޔާ ދައުލަތަށް ލިބުނެވެ.

މިދިޔަ އަހަރާ އަޅާބަލާއިރު މިއަހަރުގެ ނޮވެމްބަރ މަހުގެ ތެރޭގައި ދައުލަތަށް ލިބުނު އާމްދަނީ ވަނީ 168.4 އިންސައްތަ އިތުރުވެފައެވެ. މިއީ މިއަހަރުގެ ނޮވެމްބަރ މަހަށް އަންދާޒާ ކުރިވަރަށްވުރެ 51.8 އިންސައްތައިގެ އިތުރުވުމެކެވެ. މި އަހަރާ އަޅާބަލާއިރު މިދިޔަ އަހަރުގެ ނޮވެމްބަރ މަހު އާމްދަނީ އެހާ ބޮޑުތަން ދަށްވީ ކޮވިޑް-19ގެ ސަބަބުން ރާއްޖެއަށް މައިގަނޑު ގޮތެއްގައި އާމްދަނީ ވަންނަ ހުރިހާ ދޮރެއް ބަންދުވުމާ ގުޅިގެންނެވެ.

މީރާއިން ބުނީ މިއަހަރުގެ ނޮވެމްބަރ މަހު އާމްދަނީ އިތުރުވީ އިންކަމް ޓެކްސްއާއި، ޓޫރިޒަމް ބިމު ކުއްޔާއި، ޖީއެސްޓީއާއި، ގްރީން ޓެކްސް، އަދި އެއާޕޯޓް ޓެކްސް އިތުރުވުމުގެ ސަބަބުން ކަމަށެވެ. މީގެ އިތުރުން މިދިޔަ މަހު ލީސް އެކްސްޓެންޝަން ފީވެސް މީރާއަށް ވަނީ ލިބިފަ އެވެ. މިއީ މިދިޔަ އަހަރުގެ ނޮވެމްބަރު މަހު އެ އިދާރާއަށް ނުލިބޭ ފީއެކެވެ.

ގްރީން ޓެކްސްއާއި އެއާޕޯޓް ޓެކްސް އިތުރުވީ މި އަހަރުގެ އޮކްޓޯބަރު މަހު ރާއްޖެ އައި ޓޫރިސްޓުންގެ އަދަދު އިތުރުވުމާ ގުޅިގެން ކަމަށް މީރާއިން ބުންޏެވެ. އެގޮތުން މިދިޔަ އަހަރުގެ އޮކްޓޯބަރު މަހާ އަޅާބަލާއިރު މި އަހަރުގެ އޮކްޓޯބަރު މަހު އައި ޓޫރިސްޓުންގެ އަދަދު ވަނީ ހަތް ގުނަ އިތުރުވެފަ އެވެ.